大航假期: 中秋節東莞三天之旅 2012年9月30日~10月2日 -- Day 1 (part 1)

暫時考完個試, 有時間可以update吓個BLOG, 原來由10月開始已經無寫過新BLOG了...

2012年9月30日, 我同流沙包參加咗大陸短線三天團去咗東莞, 團費每位$709.

中秋+國慶假期我一早講咗唔返大陸, 因為費鬼事同D強國人逼. 但流沙包又話唔返大陸留喺香港的話又唔知做乜好, 而家join團玩3日都只係七百幾蚊, 又唔駛自己諗節目, 留喺香港放假既消費肯定唔止七百蚊咁話喎...

長假期過關, 連福田口岸都逼爆人, 話就話八點喺福田口岸集合, 點知成九點半先齊人, 然後又要等司機駛架旅遊巴過黎, 跟住唔知係個司機問題定個導遊新入行比人老點, 等極都未見司機同架車出現, 導遊不斷打電話同司機溝通, 然後個導遊帶我地行行行, 點知原來帶我地兜咗個圈行咗去車站對面馬路, 於是團友開始鼓燥...  (下刪百多字)

上咗車之後, 第一站去到歡樂海岸, 都係D購物飲食消閒區咁囉...

有表演睇:

下一站去到深圳博物館.

 

離開博物館就去食lunch, 食飯既地方係華南城, 個司機唔知係咪玩野(因為朝早團友同佢嘈完), 明明餐廳喺2號交易廣場, 佢就停喺1號交易廣場, 個導遊又冧啤啤唔敢話司機, 於是成團友就山長水遠咁行去2號廣場.



呢餐飯喺個美食廣場食, D餸菜... 算把啦...

唔覺意比兩個BLOG出咗街添~

其實我真係好耐無寫BLOG, 因為我黎緊12月27日要考試呀, 所以我其實好耐無上過黎.

咁啱今日check email見到通知話有blog友喺我個blog度留言, 我先知自己有兩個隱藏blog出咗街.

對上兩篇blog(包括"去勻日本全國47都道府縣", 及"同friends一齊去日本...? 咪搞") 其實係我一, 兩年前無無聊聊當日記咁寫落, 而日期就求其set做2012年某日. 最近因為太耐無上黎, 唔記得改番D setting, 結果唔覺意比呢兩個日記blog出咗街.

既然出咗街咁就算啦, 哈哈~~ 所以其實我根本無諗過出年農曆年去旅行(果個係兩年前寫落既blog, 講緊兩年前既心情)

最近我就梗係忙溫書啦, 我而家日日主要係對住呢堆野, 加埋同事比我既補習notes. 到而家都未有時間操past paper, 唉... 唔知點算...

同D friends一齊去日本...? 咪搞!

上兩個blog講開我想去勻全日本47都道府縣, 突然又諗起一個topic想講.

好多friends見我讀日文, 又好似成日去日本旅行, 會覺得我係日本通(其實我唔係呀~~). 有時佢地去日本旅行會問我意見, 不過我唔係每處地方都識架, 如果佢地將會去既地方係我去過, 我當然比到意見啦. 不過我既意見只限某某景點好值得去, 某某景點係咁咁咁之類; 但如果你問我果度有咩好食既餐廳, 一定要買既潮物, 又或者想買乜乜乜可以去邊度買 etc., 咁我就真係答你唔到啦...

另外, 我有啲friends話我成日去日本, 不如下次再去日本果陣叫埋佢地一齊去啦, 叫我做"領隊"喎. 當然我只會當佢地講笑, 不過就算佢地係認真, 我都唔會肯同啲friends一齊去日本. 說實在, 我喺日本去過咁多地方, 再去既話就未必會去D好大路既旅遊景點; 但好多無乜去過日本既人, 心目中一定會有D想去既熱門景點. 如果個fd話想去迪士尼, 想去東京鐵塔, 想去睇富士山, 咁我係遷就你 去一D我已經去過N次既景點? 還是迫你跟我去D非熱門地方呢...?

另外如果同啲fd一大班人去旅行, 到時A見到啲得意野會停低睇吓; B見到啲野想買又駐足望吓; C見到啲野吸引又停低研究吓... 一條街可能一粒鐘都行唔完, 我真係會發忟憎囉, 我唔想嘥呢啲咁既時間呀! 所以我只會同流沙包兩個人去日本.

同埋我去日本好癲架, 我會plan好每日要去既地方, 計劃好晒幾點鐘要去到邊, 搭咩野車, 用盡每分每秒. 我唔係果D"行到邊咪睇到邊囉, 無詳情計劃架"既人. 難聽D講成個旅程我係獨裁既, 所以同fd去的話, 應該好大機會搞到反面, 所以都係唔好搞我...  

(以上言論只適用於去日本既旅程, 如果去其他國家, 就算同其他fd一齊去, 去到點hea 點無plan我都無咩所謂)

去勻日本全國47都道府縣??

最近同流沙包傾緊出年農曆年假期去邊度旅行好(我地一向唔鍾意係香港過年, 因為覺得拜年係超無聊既事, 我地會預先擺低D利是叫兩老幫我地派比親戚), 暫時諗緊可能去馬來西亞. 但日本就一定唔會再去住勒, 我唔係果D一定要年年都去日本既日本迷.

不過講開日本, 其實我有個好無聊既夢想, 就係想去勻日本全國47都道府縣.

日本包括了1都(東京都), 1道(北海道), 2府(京都府, 大阪府), 同埋43縣, 暫時黎講我己經去佐27個啦... 包括:


北海道地方
北海道: 札幌, 小樽, 旭川, 登別, 層云峽, 網走.


東北地方
青森縣: 八戶, 奧入瀨溪流, 十和田湖
秋田縣: 田沢湖, 角館, 八幡平
岩手縣: 盛岡
山形縣: 銀山溫泉
宮城縣: 仙台, 松島
福島縣: 會津若松


關東地方
東京都: 不知黎過幾多次了, 仲係墨田區住佐大半年添.
埼玉縣: 入間市, 川越
千葉縣: 幕張outlet, 東京迪士尼, 房総
神奈川縣: 橫浜, 中華街, 箱根
栃木縣: 日光, 鬼怒川溫泉
群馬縣: 草津, 伊香保溫泉
茨城縣: 常陸大子, 水戶, 大洗


中部地方
新潟縣
富山縣: 立山黑部
石川縣: 金沢, 能登
長野縣: 輕井沢
靜岡縣: 熱海, 伊東
山梨縣: 河口湖
岐阜縣: 白川鄉, 高山


近畿地方
京都府
奈良縣


九州地方
福岡縣: 門司港, 太宰府
熊本縣: 熊本城, 阿蘇, 黑川溫泉
大分縣: 別府地獄, Harmonyland, 由布院, 九重夢吊橋
宮崎縣: 高千穗


如果下次再去日本, 我打算去四國一周遊呀~

終於開始考QP...

今年終於的起心肝考QP, 報咗12月考module C, 上兩個星期六去咗公會拎learning pack, 十一點幾上到去, 好多人排隊.

拎完LP後就同個fd落咗銅鑼灣既樓上cafe食飯.

我地由兩點幾坐到四點幾先埋單, 小插曲係餐廳計錯數, 兩個人食個lunch竟然要四百幾蚊?? 我明明記得個set lunch係$98+10%架咋喎...


食完飯去CITY SUPER行一陣, 見到yogurt drink有特價, 平時過百蚊一枝, 而家特價$75(因為就黎到期嘛), 即買.

買完之後真係勁重, 唯有搭車返屋企lu.
 

半島嘉麟樓奶皇月餅 -- 真係咁好食...?

今年, 因為墨魚媽既要求, 終於買咗嘉麟樓既月餅.

不過, 墨魚媽又唔早D講話想食, 過晒優先預訂之後先話要(墨魚妹做marketing, 佢有朋友可以預訂呀), 我地唯有靠"正常訂購", 即係唔知邊一日早上十點開始FAX或者EMAIL去落訂.

唔駛問我地一定訂唔到啦, 於是只有上網買, 曾經何時話炒到四百幾蚊一盒喎, 痴線! 食咗真係曉飛咩?

但為咗達成墨魚媽心願, 最後墨魚妹喺網上用$300買咗...

 

 

我地做節食飯果日拎埋出黎送比墨魚媽, 仲即場切咗D黎食...



滿心歡喜咁去試吓, 一食落... 吓? 好好味咩?? 唔覺喎... 好普通啫...

墨魚爸仲搞笑:"同酒樓果D奶皇包有咩分別呀?"



人地話用微波爐叮吓會好食D喎, 即管試吓啦...

元朗區樓上cafe -- Coffee Town

元朗區都有D樓上cafe, 不過我就從來無試過.

之前睇openrice見到某間食評好似幾唔錯咁, 於是就上去試吓啦.

我地今次去既呢間叫嘆咖啡 Coffee Town.

佢個menu有好多野都已經無咗, 例如芝士蛋糕, 心太軟等等已經遮咗無得order.

我地叫咗8隻雞翼, 一個田園沙律, 一個carbonara, 一碟炸薯片同埋一杯vanilla chocolate.

個杯幾靚:

雞翼好細隻下:

個田園沙律, 明明menu話有多士半份, 但係上菜時得份沙律唔見有多士, 以為佢焗緊無追佢啦, 但係等咗好耐都唔見有, 問吓個staff, 佢話menu改咗, 已經取消咗份多士, 不過menu改唔切喎... 咁我地頭先落order果陣你又唔講聲?:

碟炸薯片, 明明睇住佢炸, 但係上枱果陣已經完全凍晒, 好多都已經淋晒:

我地有問過staff點解碟炸野係凍既? 佢解釋話炸起後要吹凍同"琼油"喎, 完全唔係Ruby Tuesday果種炸薯片...

carbonara都OK, 好多煙肉:

埋單唔記得幾錢, 不過記住黎得呢度食野就要預番多D時間, 因為廚房細細, 人手得2個, 黎hea吓都仲可以, 趕時間的話請去番茶餐廳.

美容導出導入機 -- ION+ LOTION BEAU SET

導出導入機都興咗好耐, 但一直以黎我都無買, 因為一來驚無效用, 二來驚自己三分鐘熱度, 三來又覺得貴.

最出名果部HITACHI要成兩千幾蚊一部, 我諗咗大半年都心大心細中, 唔知買唔買好, 因為二千幾蚊真係好貴囉...

最後都係覺得不如平平地買一部玩吓就算, 於是喺CITY SUPER買咗果部ION+ LOTION BEAU SET, 連機有埋支精華液, 有齊導出導入功能, 價錢都只係二百幾蚊, 就算真係無效用, 都只係嘥咗二百幾蚊啫, 都玩得過吖. (我買果陣仲有包日本化妝綿送添)



用法: 洗完臉後, 我會用BIODERMA果支紅色落妝水沾濕塊化妝棉, 然後將塊化妝棉夾喺機頭度, 開掣撥去+號(紅色燈)做咗清潔程序(導出)先, 將機頭按落塊面度(手指一定要掂住手柄個銀色金屬部位), 每個位按住五至十秒再轉位就得.
 
第一次用, 塊棉都算OK烏糟:

第二次用:


做完清潔程序, 再做導入, 今次用隨機送既精華液沾濕化妝棉, 又係夾喺機頭, 今次開掣撥去-號(綠色燈), 又係照樣將機頭按落塊面度, 每個位按住五至十秒再轉部位就得.

暫時我係隔日做一次, 希望唔會又三分鐘熱度啦~~

同場加映, 果日喺CITY SUPER買完部機, 順手去埋supermarket買咗幾支yogurt drink, 廿幾蚊一支都真係幾肉赤, 不過真係好想飲嘛~ 我都講過九萬幾次, 唔明點解香港自己無yogurt drink出(我要純yogurt drink, 唔係果D溝咗士多啤梨味藍莓味果D!), 一定要去日式超市買貴貨, 或者要返大陸買所謂既酸奶先有得飲囉!!!