團購消費日(上集) -- Pancake Colours三道菜午餐, 不知所謂!!

之前喺Yahoo團購買咗一個lunch, 一個dinner, 好巧合地我喺同一日用晒呢兩個團購.

第一個係$28 Pancake Colours三道菜午餐(原價$88) 餐湯+主菜+乳酪雪糕+飲品 三道菜完美午餐.

http://hk.deals.yahoo.com/hong-kong/offer/1563

呢間餐廳真係不知所謂! 我忍唔住要喺度彈到佢飛起.

首先, 我地一上到去, reception無人喺度, 無人招呼, 都算. 問題係我地周圍搵人, D侍應唔知去晒邊囉... 同埋一上到去個感覺已經好差, 環境肉酸, 空氣漂浮住一陣"up"味, 佢果D所謂既型格designer chair, 已經爛溶溶囉... 感覺好唔衞生.

然後D侍應個個好似遊云咁, 我地落晒單, 奇怪佢點解唔問我地要咩乳酪雪糕就行咗去. 於是我主動問要唔要揀埋乳酪雪糕, 佢先至話雪糕漿未返, 改咗做布甸. 吓? 你一早又唔講? 乳酪雪糕變咗布甸, 已經貨不對版啦(最激氣係佢個布甸勁難食, 都唔知乜黎架, 下文再講).

今次呢個午餐, 係包括:
-餐湯一客
-主菜一份(任選一款價值$47或以下的扒類, 薄餅, 意粉或飯麵類)
-飲品一杯(冷熱均可)
-乳酪軟雪糕一杯

我地只係三個人, 一個要綠茶, 兩個要麥茶, 都唔係太複雜啫, 但都落錯單, 黎咗三杯綠茶.

然後我同事問侍應攞刀, 又係一去無回頭囉...

我地已經唔係十二點半/一點果段繁忙時間去, 我地上到去時 D客已經唔多, D侍應都可以咁既款, 好難想像繁忙時間果陣佢地係點招呼D客.

我地幾個同事食完, 超唔滿意呢一餐. 同事A話:"算啦, 呢餐只係$28, 都唔會期望咁高".

但同事B就話"佢個marketing咪就係唔掂囉! 你搵得團購合作, 都係想做好間餐廳, 等D人可以再返黎食啫. 你要D人肯返黎再幫襯, 唔係話你團購價$28, 你只係比到$28既野出黎; 而係你原價係$88的話, 你要比人覺得就算比番$88正價黎食都抵, 所以你比出黎既野應該要over $88才是嘛(呢餐飯原價話係$88, 但我覺得根本唔值$88囉!! $48都比多佢. $88我喺尖沙咀可以大把選擇, 食得更好啦!)."

我就話"咪係囉, 你質素咁差就咪鬼搞團購啦. 你唔整團購, 我唔會知你間野咁差咁唔掂, 唔會去批評你; 而家我試過一次啦, 你即係比機會我喺blog勁彈兼周圍同人講唔好黎食啫, 係咪仲適得其反呀?"

可能你睇完會鬧我, 駛唔駛咁呀? 好又一餐唔好又一餐啫, 唔駛鬧到咁盡呀? 但我寫blog就係想抒發意見, 好食既我會勁讚; 難食既我會勁彈, 就係咁簡單.

上到去佢話得番紅湯喎... 碗湯唔好飲, 而且完全唔熱, 只係微溫, 我最憎食D唔夠熱既野!:

呢個係我叫既咖喱軟殼蟹炒飯, 味道唔錯, 但又係唔熱架囉... 我唔介意你一早整定, 但唔該你保持好D個熱度呀~!:

同事既紅酒燴牛尾飯, 兩位同事不約而同都無食個西蘭花, 因為佢地話覺得無洗過喎:

呢個唔知乜鬼布甸, 硬掘掘, 完全唔係布甸個質感, 我覺得似大菜糕多D; 同埋個味道勁難食, 完全食唔出係乜野味, 不知所謂!!: