新鮮熱辣@墨魚燒賣: 1/6/2011

2011年6月28日星期二

公司無聊相2

日本人買黎既手信, 好味道.

特別想介紹呢個, とらや既水羊羹, 秘書小姐話呢個係超おいしい, 但我仲未食呀, 拎咗返屋企諗住同流沙包share.

我自己喺OT時間落City Super買既cake, 同admin同事一齊分享.

2011年6月25日星期六

公司有人收花

星期二, 終於有新同事返工.

我個title係senior accounting officer, 而新同事既title係assistant accounting manager, 所以原則上我係under佢. 我出黎做野咁耐, 都係第一次有女性做我頂頭, 有D不安...

就喺新同事返工果日, 突然有人送花上黎, 收花人當然係新同事啦~~ 我同admin同事都好驚嘆佢第一日返工就有花收~

原來紮花係新同事個agent送上黎架, 呢間recruitment agent真係掂, 唔怪得個commission收咁貴啦, 哈哈哈~~

2011年6月21日星期二

6月15日, 係流沙包生日.

每逢流沙包生日, 我地都會去食齋. 因為流沙包呢D咁健康既人, 間中都會提議去食素, 但我呢D無肉不歡既人, 係唔會理佢囉.

唯獨是佢生日, 佢提議食咩都好, 我都無理由拒絕佢架, 所以佢最近幾年, 每逢生日都話想去食齋, 慢慢地, "流沙包生日去食齋"就成為我地既指定動作啦.

而咁啱6月15日無啦啦做咗健康素食日, 流沙包就梗加大條道理"抆"埋我去食素啦. 今年我地去咗北京道一號既功德林食.

我地叫咗雞絲粉皮, 酸辣湯, 小籠包, 木耳炒豆苗, 炒素翅, 咕嚕肉同埋擔擔麵.

由於我平時都唔係食素既人, 亦唔係太鍾意食素, 所以呢餐飯對我黎講都唔算"好食"架啦, 比唔到中肯既意見大家.

其實我都知食素係健康又環保, 但暫時都係一年一次啦, 哈哈~~

2011年6月18日星期六

豚屋 - 唔掂!

數星期前同friends去咗屯門新開既豚屋食飯, 兩個字形容: 唔掂!

我同流沙包叫咗個二人定食, 有前菜, 味噌湯, 有炸豬扒, 炸蝦, 炸蠔同炸帶子, 白飯同菜可以無限加添, 個餐仲連飲品同甜品.

先講D炸野, 完全唔熱架, 有無搞錯呀? 只係微暖, 最憎食D唔熱既野囉!!! 佢果碗白飯都係微暖架咋.

甜到飛起既餐飲- 芒果乳酸:

硬到暈又無味既甜品 - 牛奶布甸:

不知所謂, 唔會再有下次囉!!

食炸豬扒都係去番とん吉好過囉~

2011年6月13日星期一

放監(應該係假釋先啱)的一個星期

上個星期, 公司全部人過晒澳門參加G2E, 公司得番我, ADMIN同事, 同埋兩個返黎呆坐既司機, 爽到暈.

我因為工作太忙, 所以根本無時間hea, 繼續好努力咁做到無停手. 但心情當然變得好輕鬆啦, 我甚至乎開住收音機做野, 踢住拖鞋喺公司周圍行.

而lunch我就同ADMIN同事出去食好D, 因為平時一係就鬼咁晏先有得出去食飯, 一係就食到滾水淥腳咁.

星期二, 60分鐘放題@牛涮鍋:

好抵呀, 包一碟肉(唔同既肉類有唔同既價錢), 配菜, 汽水, 雪糕則任飲任食. 我揀咗豚肉, 計埋加一都只係$60, 平時喺尖咀食個普通飯都要咁既價錢啦~

星期三, 燒肉@牛角:

我揀既定食係$69, 包前菜, 湯, 一碟肉, 同埋白飯任添. 但唔知係我燒得唔夠好, 定舊肉切得太厚, 食落韌韌地...

星期四, 板長壽司:

不知所謂, 淨係睇果塊吞拿魚, 咩黎架? 肉乾黎架? 定風乾火腿? 咁既色水既? 又薄it it, 離晒譜! 以後都black list呢間餐廳.

星期五, 再黎十吓十吓@牛涮鍋:

由於我地只係假釋, 下星期D同事就會回歸, 我同ADMIN同事都唔知幾時先再有D咁好既機會可以咁feel出黎食飯, 所以ADMIN同事提議再食多一次SHABU SHABU, 我就梗係贊成啦~

2011年6月12日星期日

JIN - 仁 ("血腥"畫面, 不喜勿入!)

(比多次機會你, 如果你係怕血既, 請你唔好再睇落去. 我驚以下畫面會令你不安)

出面鬼咁熱, 最好就係匿喺屋企睇電視.

加埋支perrier, 爽:

睇番上個星期既JIN, 講到野風要生, D畫面真係好震撼, 真係做出剖腹產子既畫面.

(一有機會就踩香港電視節目)對比番香港果D白痴電視劇/港產片, 果D所謂既手術鏡頭, 簡直係簡陋兒戲兼得啖笑. 我而家真係唔會再睇香港既電視節目架啦~ (新聞透視, 星期日檔案果D例外)

都係果句, 無字幕, 真係唔多睇得明講乜野. 不過我已經睇咗漫畫, 所以大致上都知道個劇情係點. 但又調番轉講, 因為我已經睇咗漫畫, 所以反而無好似上一輯咁追睇得咁緊張投入(我係睇咗第一輯JIN先開始睇番漫畫).

2011年6月9日星期四

人工多咗成萬銀

如果大家有睇開我個blog, 都知我上一份工既其中一個辭職原因, 係因為人工太低, 話就話係日本公司, 但日本公司應有既福利就完全無囉... (可以睇番我以前寫既呢篇blog)

而家我呢份新工比以前果份多$4,000, 除此之外仲有OT allowance, 有travel allowance(每日返工放工既車錢可以實報實銷, 上限係$35/day. 我而家每日返放工既車錢要$34, 好彩無over), 有每年body check, 出差有daily allowance etc., 有番晒日本公司應該有既野囉...

另外我而家每一日都要OT咁濟, 如果計埋OT錢, 我而家每個月既收入比起上一份工, 人工多成一萬蚊.

不過代價就係每一日最早都要八點先有得收工; 多數都係九點後先走得; 有時就做到十點先離開公司, 返到屋企成十一點幾先食飯囉...

有時我都有諗過轉工, 但係我作為"開荒牛", 如果而家自己走又好似好唔抵咁, 話晒我都叫幫公司set up咗唔少野吖; 而且喺度做又似乎可以學到一D"高層次"D既野, 因為HK office係HQ, 有機會希望可以學做CONSO. 加上我而家同我相依為命既admin同事又鬼咁夾, 佢又真係好鬼做到野, 份人又樂天, 同佢拍檔做野都幾開心. 所以暫時都會繼續捱落去先啦~~

2011年6月7日星期二

深井食飯

5月尾, 約咗中大同學去咗深井食飯.

由元朗入深井都幾方便架, 搭往佐敦道方向既紅色小巴, 一程車就可以去到深井.

我地去咗陳記食, 味道都唔錯吖~~

食完飯我地再過隔離發記食甜品. 其實我唔係好明點解發記咁出名, 因為我覺得一D都唔好食... 我今次叫咗個"鮮雜果布甸", D所謂既雜果只係得士多啤梨, 西瓜同蜜瓜, 而且一D都唔鮮囉...

而家元朗越開越多糖水舖, 已經有發記同松記, 但我就唔會去發記啦, 我自己就鍾意松記多D.

2011年6月4日星期六

公司無聊相

自從返咗新工之後, 日日都忙到死, 呢幾個禮拜更加晚晚OT到九點幾十點咁濟.

今日係我地公司既戰略會議, 全球既office都會有人黎香港開會, 我地book咗Sheraton Hotel用黎開會, 而下個星期成班人就會過晒澳門出席G2E. 事前我同admin同事就為咗準備佢地既會議而日日做到無停手. (好彩我同admin同事唔駛出席呢D悶會, 只係負責做準備工作)

下星期公司全部人過晒澳門, 得番我, admin同事, 同埋兩個無野做但都要返黎公司坐既司機喺office, 諗起都覺得爽. 但我唔期望可以準時收工囉... 因為之前為咗準備佢地開會既野, 我都唔係做緊會計既工作, 而家我手頭上既會計工作堆積如山, 希望下星期可以一次過清晒佢.

無無聊聊post吓D公司相先~

我公司的雪櫃:

係呀, 我公司D日本人好"矜貴"架, 明明有部屈臣氏水機係度, 但D日本人係睇唔到架, 只會飲法國礦泉水或者係日本進口既茶架咋. 法國礦泉水每支$12.5; 日本茶350ml $15.5. 每個月淨係買水買茶都買千幾二千銀囉... 如果大家飲開呢隻伊藤園黃金桂烏龍茶, 近排發覺尖沙咀City Super成日斷貨, 我同大家講聲唔好意思, 因為我地訂貨訂到連其他分店既貨都要埋囉...