2009年6月21日(日) -- BBQ

皮膚問題真係令我好煩惱, 我由細到大一向都無皮膚敏感, 又無食物敏感(只係對酒精敏感). 都唔知係咪因為人大佐, 身體機能出現變化, 無啦啦係塊面度出現一撻撻又痕又紅, 連續兩日都要去睇醫生, 好煩呀!!

 

本來今日既BBQ活動我都唔係好想去, 又熱又焗又曬, 加上塊面咁樣, 咩心情都無晒.

 

後尾傍晚流沙包話出發去BBQ, 我知如果我唔去, 流沙包都唔會去, 而且我見都天黑了, 應該唔會好熱掛, 所以就出佐去BBQ勒~~

 

去到流沙包負責燒, 我掛住食~~

2009年6月20日(六) -- 坑口半天遊

今日約佐中學阿sir同一個同學去佐坑口食tea同篤波.

 

約係坑口既原因係因為阿sir係果度買佐層樓出租, 而阿sir就每個禮拜都會去會所打波, 所以今次都約係坑口gathering.

 

我地係Pokka Cafe食佐個茶, 跟住就上會所篤波.

 

我對運動一向都無咩天份架啦, 反而另一個同學仔就好勁, 入佐好多球波耶~~

 

之後我自己係坑口行吓D商場先返屋企~ (專程搭佐個半鐘頭車由元朗黎到坑口, 緊係行多陣先返屋企啦~~)

2009年6月19日(五) -- 東莞開會

今日本來同阿頭上東莞個客度開會, 點知阿頭臨時有D事去唔到, 於是我就硬住頭皮自己上去.

 

過程總算無驚無險.

 

不過唔知同我返大陸有無關係, 到佐星期六, 我塊面竟然出現佐好多粒粒, 嚴重既部位如眼下面, 人中位, 直情係又紅又腫, 搞到塊面一撻撻咁, 好樣衰呀!

 

好煩呀, 我星期二晚要夜機出發去歐洲架啦麻, 臨出發前先搞D咁既野!!

突佐出黎既牌仔牌

有時見到D人著住果件衫, 佢頸後果個牌仔名label會反佐出黎, 其實我覺得... 幾肉酸.

 

肉酸唔係指佢件衫係好平價好普通既牌仔, 而係咁樣突佐個label出黎, 會比人好唔整潔既感覺囉, 我覺得就好似著衫著到反領, 或者扣錯鈕咁, 會比人一種唔好既印象囉...

巴士不明符號

某日搭968返屋企, 係下層見到一個奇怪既符號.

 

我諗佐好耐都諗唔到呢個符號係代表咩.

 

 

原來個符號既方向錯佐呀, 應該將佢轉90度先啱.

 

個staff又會咁白痴貼錯符號既, 好明顯無帶個腦返工啦...

骨髓捐贈?

前日收到紅十字會既電話, 問我記唔記得好多年前曾經抽血驗過骨髓捐贈(應該係N年前救救小XX果陣去驗過), 佢話我其中兩組白血球初步同一個病人吻合, 希望我可以抽血作進一步化驗.

 

姑娘話驗骨髓是否真的吻合, 好似話total要睇六組白血球, 所以係呢一刻黎講, 是否捐贈骨髓還是言之尚早; 首先是要抽血再作化驗.

 

所以我尋晚約佐去旺角紅十字會捐血站抽血.

 

如果死之前可以做番件好事, 都唔錯吖~

2009年6月15日(一) -- 開茶會

今日下午3點鐘去佐皇家太平洋酒店開歐洲之旅既茶會, 我初初仲expect同團應該有好多剛結婚又選擇去歐洲蜜月既年青男女, 但係去到發覺同團團友大部份都係比較大年紀...

 

 

我地呢個團27人, 黎開茶會既只係黎佐一半, 希望無黎到既果D係一些年紀相約既couple啦~~

 

開完茶會我直接返屋企, 做佐陣家務.

 

夜晚就同流沙包出佐去食齋.

 

流沙包話今日係健康素食日, 所以流沙包提議食齋. 如果係平時既話我就一定當聽唔到架啦; 但今日係流沙包生日, 所以就答應同佢一齊食齋啦~

 

 

流沙包, 生日快樂呀~

2009年6月14日(日) -- 行程豐富

今日約佐班CityU人食6月份gathering飯, 所以lunch去佐尖沙咀海防道既喬妃齋食飯.

 

食完飯同個friend無無聊聊行下, 然後去佐新世界中心間Pacific Coffee吹吹水.

 

夜晚約佐流沙包去尖東食buffet, 預祝流沙包明天生日.

 

考完試, 暫時唔再讀書住, 我終於可以過番D正常既生活啦~

2009年6月13日(六) -- 終於考晒試啦~~

今日終於甩難啦, 終於考晒試啦~~

 

考完試, 一班同學仔去佐沙田麗豪酒店食buffet, yeah!!

 

煮飯仔

雖然我黎緊要考試, 呢排都係匿埋係屋企溫書. 但係唔知點解突然想煮下飯, 可能係之前整親隻腳, 要麻煩佐流沙包照顧佐我好耐, 所以我想做番D野咁啦.

 

因為我懶得搭車出去街市買菜, 所以只係去佐樓下百佳睇吓有咩材料煮.

 

今晚既晚餐有:

 

中湯一大煲

 

麻婆豆腐

 

排骨炒菜心 (我都係唔識炒菜, D菜比我炒到出晒水既?)

2009年5月27日(三) -- Scout Centre最後一堂

今日係PDPA係Scout Centre既最後一堂, 幾位同學仔都帶佐相機返黎影相.

 

可能小班既關係啦, 加上同學仔既性格都好active, 所以同同學仔既關係好似close好多. 回想以前係CityU讀BBA果陣, 即使讀佐三年, 但係同熟果幾位同學都無咁close, 起碼唔會定期約出黎搞D咩聚會.

 

反而同而家呢班同學仔, 有D只係識佐半年, 但係就已經出黎食過幾次飯. 而且好多時一出黎就係一圍枱十幾人, 我好鍾意呢種熱鬧既感覺~

 

所以最後一堂, 好似都有少少依依不捨既感覺.

 

由於翌日係端午節假期, 所以放學後一行13人仲一齊去咗佐敦食宵夜~~

 

另外我地已經約佐13號考完試果日去中大隔離果間hotel食buffet, 好期待耶~~

 

我好快就要離開香港喇, 希望同呢班同學仔可以繼續keep in touch啦~

 

 

血拼血拼~~

隻腳腫佐咁耐, 就困足係屋企咁耐(但當然都要返工啦, 意思係放工/放假都唔可以出街行下). 趁隻腳消佐腫, 即刻去SOGO shopping~

可能太耐無行過街啦, 所以一口氣買佐好多野:

 

 

 

買佐咁多野都係千四蚊咋, 隻花茶杯係流沙包送既~

點解D男人要留長手指尾既指甲?

成日都會見到D男人專登留長手指尾既指甲, 到底係咩原因呢? 有次搭地鐵見到個男人, 手指尾既指甲成吋長咁濟, 好核突耶...

 

我估計佢地係咪要留黎撩耳屎? 真係諗極都唔明留咁長做咩呢? 點解淨係留手指尾呢?

 

有無人知點解?