又有公司飯食~~

某日6點幾, 班日本人同大老闆放工出去食飯, 剩番我地3個local staff喺公司OT.

我阿頭臨離開公司之前, 突然間行埋黎話我地幾個local staff都可以自己一齊出去食飯, 張單番黎同佢claim番.

於是其中一個同事就提議去"壽司廣"食飯啦~

我掛住食, 都唔記得影相乜濟...

呢度一個set最平都四舊幾水, 我地兩女一男, 叫咗兩個set, 另外男同事仲叫咗支酒(得佢自己飲). 

返到公司後, 原來張單唔係claim番公司, 係我阿頭佢自己私人出錢喎, 好好人啊~~

dinner@太平館餐廳

5月10日佛誕假期, 我地好益智地去咗科學館睇愛因斯坦專題展覽, 實在太深奧, 睇到有D頭痛, 哈哈哈.

行完科學館, 我地行咗陣街, 就去太平館食飯. 原來未夠七點去到已經咁多人等緊位囉喎.

好彩我地只係等咗半個鐘左右就有位啦~

黎得太平館, 都係食果幾樣野啦, 我地叫咗個乳鴿餐同瑞士雞翼餐.

我都好想試吓個梳乎厘架, 但兩個人食就太誇張啦, 下次等多D人一齊去先有機會試吓個梳乎厘啦... 

偷影隔離枱個梳乎厘:

又係尖沙咀lunch爛相一堆

隔一排就post吓喺尖沙咀食lunch既相.

米線@星林居, 痴咗線, 只係無去一個月左右咋麻, 加價加到癲咗. 雖然係好食, 但咁鬼貴, 唔駛旨意我再去:

某日因為要行去加連威老道果頭, 同同事"誤打誤撞"去咗太平館食lunch, 埋單每人約$80, 但真係幾好食:

我而家食飯唔定時, 2點/3點/4點/5點先出得去食"lunch"都試過. 某日兩點幾三點先出得去食飯, 同同事去咗Freshness Burger食, 下午茶時段只係$28咋:

某日同公司既travel agent食飯, 去咗大戶屋, 呢個乜鬼招牌定食$70, 普普通通啦, 多謝travel agent請食飯:

香葉越式料理, 唔好食, 價錢又唔係平:

新港中心新開咗COCO壹番屋, 我唔係覺得好好食囉:

彼思動畫25年

5月2日, 去咗香港文化博物館睇彼思動畫25年既展覽.

好多人排隊同胡迪&巴斯光年合照:

我懶得排隊等, 所以同唔駛排隊既3眼仔合照就算:

好多人排隊買飛耶...:

行完彼思動畫展覽, 順便行埋其他展館.

又做咗精選blog?

唔知點解, 我個blog又做咗精選blog.

我就真係唔知所謂既"精選blog"係點揀出黎, 起碼我唔覺得而家我寫既blog有咩咁吸引.

之前我喺日本生活果排, 我個blog做咗精選blog, 我都唔覺得出奇. 但今次無啦啦又做咗精選blog, 我就覺得奇奇地, 因為我已經變回一個平平淡淡既OL.

做咗精選blog之後, 最最討厭既就係多咗好多廣告留言, 日日都要刪一大堆垃圾廣告留言, 好鬼煩!!!

仲有呀, 我而家既正職唔係"專業主婦"啦!! 我轉行做番職業女性好耐啦, 連probation都過埋啦~~

東龍洲行山記

4月25日, 復活節最後一天假期, 我同流沙包去咗東龍洲行山.

其實今次行山係流沙包同同事行既pre trip, 原因係佢地學校5月7日要帶學生黎行山, 所以事前佢地D miss阿sir就自己行一次先, 流沙包就叫埋我一齊行.

我地九點喺油塘地鐵站集合, 然後行去碼頭, 搭30分鐘船去到東龍洲呢個地方.

我平時都唔係行開山既人, 今次呢個行程真係行得幾辛苦, 尤其是落山果part, D山路係D人夾硬行出黎既路, 勁難行呀~~

後記: 行完山第二日係返工日, 但我一朝早起身就覺得手軟腳軟, 原來發燒38.2度, 個人無晒力, 於是請咗我喺呢間公司既第一次病假(好彩剛剛過咗probation, 請假唔駛扣錢, 睇醫生亦可以claim到保險咋)