新鮮熱辣@墨魚燒賣: 1/5/2009

2009年5月30日星期六

我以為咩野事排晒長龍, 原來係...

我今日出佐元朗廣場巴士總站搭968過海返工, 離遠見到一大條人龍, 心諗: "唔係化? 已經咁多人排隊等車?"

再行近D, 原來D人唔係排隊等巴士, 係排隊等攞免費報紙呀!

說話頭條日報會係巴士站對出派發報紙, 但係朝早D報紙仲未運到黎, 淨係得兩個派報紙嬸嬸企係度ready, 而D人就排晒隊係度等攞報紙.

唔係化? 痴線咩! 我仲以為咩野大件事, 條人龍長到差唔多有成六, 七十人咁濟.

平時一至四都見唔到有人排隊等攞報紙架喎, 今日星期五既報紙有咩咁特別呀?

2009年5月28日星期四

車箱中化妝的人

我返工搭巴士果陣成日都見到有女士會係車度化妝, 真係佩服佢地可以0係行走中既車箱度畫眼線, 塗睫毛液... 佢地既專注力同穩定性一定好強.

不過我真係唔多明點解要係車度化妝? 我知係可以慳番D時間, 不過正如好多人所講, 咁做真係好似無咩禮貌囉... 正如你應該都唔會係車裏面敷面膜, 吱暗瘡掛?

同埋見佢地變臉既過程, 我覺得最恐怖既係, 化妝前同化妝後都無咩分別咋喎, 係面頰好誇張地多佐兩撻紅色野囉, 都唔知化黎做咩... 點解要話比全世界知你化妝同唔化妝既樣都係無補於事呢?

2009年5月22日星期五

爛腳...

話說之前扭親隻腳趾, 於是去佐睇跌打, 翳佐一次藥(已經沖涼前拆佐架啦), 之後翳藥果個位就開始又痕又紅勒.

但係之後果個禮拜都無日得閒:

星期一要留係公司上堂;

星期二去學化妝;

星期三返學;

星期四學日文;

星期五做facial;

星期六返學(但逃佐學)+同中大同學仔食飯;

到佐星期日先至有時間去睇醫生.

但隻腳已經發到豬蹄咁勒.

但係醫生D藥膏我越搽越腫咁, 未搽之前都無水pop既, 搽完之後開始起水pop.

於是今日終於頂唔順去佐睇皮膚專科, 盛惠$700.

嗚嗚, 又痕又痛, 隻腳腫到無辦法平放係地下, 最慘連腳板底都腫埋, 行一步痛一步. 仲有好多水"pop"出水添喎, 救命呀~~

2009年5月19日星期二

火炭大排檔食飯

星期六本來要返學的, 但係星期六果堂係taxation, 我以前BBA果陣已經讀過啦, 所有野我都已經聽過晒; 再加上我而家咪做緊taxation囉, 所以每次返去上堂都悶到嘔(又唔比我exempt呢科喎...), 終於頂唔順走堂. (而且我覺得中大呢個阿sir教得hea hea地. 以前我讀BBA果陣, 阿sir係本textbook既作者, 而且仲係律師, 講稅法我覺得講解得更加清楚)

中大同學仔之前plan佐放學後一齊去食飯, 於是我就淨係出去join佢地食飯~

今次既地點係火炭既大排檔, 我地11人, 叫佐好多碟野呀, 我覺得幾好味喎, 埋單每人都唔駛$80, 好抵呀~~

熱熱鬧鬧好開心, 希望就算畢業後我地都仲可以keep住出黎食飯啦~

2009年5月18日星期一

又買notebook

我地又買多佐部新notebook啦, 今次買佐Lenovo既Y430, 流沙包話功能上呢部機比我部Fujitsu強, 但係個款就無咁靚囉...

今次呢部腦唔係我地自己用架, 係要黎送比我墨魚媽的.

其實阿媽都唔識用電腦, 但就話想買部notebook, 於是就買部番黎比佢自己篤下按下玩下啦~

2009年5月14日星期四

無啦啦扭親...

上星期四, 白白痴痴咁竟然係office扭親, 詳細都唔想講啦, 總之行路要柺下柺下.

星期五無辦法請佐SL, 走佐去睇跌打. 循例又要翳D中藥係扭傷部位.

最慘係個扭傷部位翳完D藥之後, 搞到皮膚敏感呀, 又紅又腫又痕... 嗚~

2009年5月11日星期一

Marriott Vacation Club?

星期一放工後同流沙包去佐聽Marriott Vacation Club既Seminar, 無論你最後join唔join, 聽完後會有$500 SOGO券送番比你.

其實佢地幾個月前已經打黎想約我地上去, 但係我地真係唔得閒去聽, 於是佢地再打黎我都費事接電話.

點知幾日前佢地轉為打比流沙包, 咁啱我同流沙包星期一放工都得閒喎, 於是就上佐去聽佢地既介紹勒.

當初佢地話每對couple既每月收入要超過$50,000才可以去. (我都知佢地D plan應該都好貴架啦, 但無諗過咁貴囉...)

上到去睇完video, 聽完講解, 最後就會介紹佢地既會籍價錢... 最平20,000 points果個會籍都要$179,000; 更貴價錢既plan要成三, 四十萬都有...

其實我地一開始都唔打算join, 但唔知點解都要由8:30p.m.搞到11點幾先可以離開...

後記:

好彩我地無join到咋, 因為後尾流沙包知道原來佢有一個同事join佐, 佢個同事仲"慶幸"我地無join到, 除佐入會要比一舊錢之外, 每年仲要比幾千蚊management fee; 當初個staff sell我地果陣, 話個會籍可以隨時轉讓, 好似賣樓咁賣番出去(我第一時間都覺得呢D會籍只會有價無市既啫), 但係流沙包個同事話佢呢一年黎將個會籍放係不同網站/agent度出售, 都無人問津囉...