2012年4月8日(日) – 深圳錦鏽中華+中國民俗文化村一天遊

4月8日, 復活節假期第三日, 係墨魚家既family day, 我地一行六人去咗深圳既錦繡中華+中國民俗文化村玩.

我地朝早十點喺福田口岸過關, 然後搭地鐵去到華僑城, 先去咗附近酒店既酒樓飲茶.

呢間酒樓既點心真係好普通, 亦都唔係好好食, 叫做填飽個肚就算. 但係大陸呢D完全無服務可言既地方, 竟然收15定18%既服務費, 真係離晒譜.

錦繡中華同中國民俗文化村係一張門票可以去晒, 門票係RMB130, 我地先去咗文化村行吓. 建議大家如果黎呢度, 最好去文化村行咗先, 因為文化村有好多民俗歌舞表演睇, 早D去到可以自己就番時間睇.

 

果度地方真係好大, 同埋好多表演睇, 無可能每個表演都睇晒, 我最鍾意都係"金戈王朝"呢個大型馬戰實景表演, 故事背景係明末, 重演努爾哈赤攻打明朝呢段歷史.

睇完表演出黎, 行到去蒙古區, 有射箭玩, RMB20有十枝箭, 我成世人第一次玩射箭, 估唔到比我射中咗紅色, 中咗奬喎~~ 呵呵呵~~

行到三點幾, 墨魚爸攰攰地又餓餓地, 於是我地坐低食咗D特色風味小食.

最令人一試難忘既係果度既粟米, 唔記得五蚊枝定十蚊枝, 明明個樣都好靚吓, 鮮黃色, 粒粒飽滿. 點知一咬落去, 嘩... 咩黎架? 完全無粟米味都算, 個口感, 真係好難形容, 完全唔知自己咬緊果條係粟米囉! 正常黎講粟米都應該有D咬口食落索索聲同埋咬落有汁架嘛, 但係大陸既粟米, 食落係乾爭爭硬挖挖完全無汁架, 超恐怖! 食咗一啖即刻掉都掉唔切, 都唔知係假粟米定落咗D咩化學野, 由於實在太震撼, 所以完全唔記得同枝粟米影相留念...  

行完民俗文化村, 我地再順步過去錦繡中華, 呢度有各大中國名勝景點既縮水版, 但我對於呢D景點就無乜興趣, 所以行咗一陣就離開.

由於大家都好攰既關係, 所以都費事喺上面食埋飯先返, 我地嗱嗱臨返番香港, 去咗元朗食雞煲.

食完雞煲我同流沙包落咗屯門, 因為流沙包約咗人睇波, 不過我就只係陪睇咗一場, 順便玩吓掟鏢, 成世人第一次掟, 竟然掟中到紅心喎? 不過大家都知紅心唔係最高分呢~

睇完一場波我都已經好攰, 咁啱又有另一班friends約流沙包喺元朗睇波, 所以流沙包就同我返屋企先, 然後佢再出去同人睇波飲野.

返緊新工, 勁忙

我無做日本公司啦, 而家做緊香港公司, 唔駛用日文, 而家反而要對住鬼佬客.

我唔做日本公司, 係因為我想考CPA, 要考CPA, 除咗要考試之外, 仲要喺會計師公會認可既authorized employer/supervisor底下工作3年, 先可以正式成為CPA.

但真係好少日本公司會係AE/AS囉, 所以我唯有搵CPA firm去做.

寄咗十幾廿封信出去之後, 終於有一間CPA firm叫我去見工. 我記得我係23號星期五朝早上JobsDB見到份工, 然後下午send CV出去, 即晚就收到電話叫我第二日去見工.

見工見咗兩粒幾鐘, 即請, 新老闆想我可以6月1日前返工. 於是我就諗住喺舊公司做到5月30日, 5月31號可以返新工.

PK舊公司明明都話做到5月31號, 之前admin同事亦問過個0架仔, 話我地如果早過5月31日就搵到工都可以走, 人工就做到邊日就出糧出到果日.

點知我28號星期一返公司辭職, 條0架仔就玩野, 死都要我做到31號, 話否則唔會簽reference letter比我喎...

我真係火都黎, 我話你既然講到咁, 我更加唔會屈服啦! 同埋我心諗 我都搵到工啦, 要你封reference letter把鬼咩~  我有時間的話 都留黎服侍新老細啦, 仲得閒啋你?!

就係咁, 5月31日我已經展開咗新生活, 回歸上環返工, 遲D有閒情果陣先再寫吓我既新公司情況.

好似好耐無update過...

好耐無update過個blog, 因為最近都幾多野發生...

首先係我啱啱去完歐洲返黎, 今次呢個歐洲之旅係同屋企人去, 目的係想帶墨魚爸媽去歐遊, 2月時已經plan好咗報咗團, 5月中出發.

另外就係我公司方面, 我就黎失業啦, 呢間開咗唔夠兩年既仆街新公司, 一直以黎都無錢賺過(無錢賺係佢地自己攞黎, 開咗成年都未start business, 每個月只係白交租出糧etc., 成班人都唔係做野, 淨係識吃喝玩樂, 不停駛錢, 成話開口埋口話錢唔係問題), 所以大老細唔玩啦, 會將所有員工遣散. 當然做唔夠兩年係咩都唔駛賠啦, 嘥咗我兩年時間, xyz#&....!!!!

買車想買Smart Fortwo, 好唔好呢?

我同流沙包話買車買車, 由我地結婚前講到結婚後, 一直都係講完就算, 到而家為止都未實行.

 

今年決定認真考慮買車, 由於我好鍾意D外型cutie細細架好似玩具車/積木車咁既車款, 所以之前有諗過買Mini Cooper.

 

不過有朋友話Mini Cooper個seat位好低, 會坐得好辛苦喎…

 

而咁啱有朋友揸緊Smart Fortwo, 佢(女仔)對呢架車既評價唔錯, 而我上過佢架車睇過, 又真係好得意, 啱晒我心水, 所以就諗住買Smart Fortwo.

 

但係有其他friends聽到我話想買Smart, 就話呢款車唔係咁好, 跟住我上網睇吓人點講, 有D人既意見就話女仔揸會好辛苦 / 唔上得高速, 會好飄 / 上斜無力 / 會比的士佬或者大車蝦 / 零件比日本車仔貴 / 冷氣易壞 / 引擎好嘈 / 車身短如果撞起上黎會渣都無實死無生…

 

搞到我都唔知點好, 我無車牌, 又無坐開人地D咩野車款, 我對車完全係一竅不通, 都唔知點揀好… 大家有無咩意見比到我? 我既要求如下:

 

 

-要兩座位, 車外型得得意意, 好似玩具車仔咁

-唔會成日揸, 只係諗住得閒放假可以揸架車出去玩吓

-Budget 5, 6萬左右(二手車, 無諗過買新車)

-慳油

 

以上條件, 大家覺得我買番Smart Fortwo好, 定有無其他車款推介比我?

2012年4月7日(六) – 擺酒五週年紀念日

今日係我地既擺酒紀念日, 記得我地結婚果年係復活節假期, 今日五週年, 咁啱又係復活節假期, 梗係要出去慶祝一下啦.

 

我地朝早先去咗The Mira既國金軒飲茶, 12點左右出到去, 我仲驚好多人要等好耐, 點知去到發覺成個場只係得幾枱茶客. 不過門口個receptionist話佢地分咗時段喎, 一點三係第二個時段, 問我地一點鐘交番張枱得唔得, 我地當然無問題, 因為我地都趕時間, 無諗住喺度hea坐.

我地叫咗六樣點心, 包括法國鵝肝荔芋角, 黑松露野菌餃, 山椒豚肉煎烤包, 金湯蟹肉灌湯餃, 綠茶紅豆煎堆, 焗燕窩蛋撻.

 

 

以為炸野應該會遲D先上, 點知第一碟上既點心就係鵝肝荔芋角. 一食落口, 搞錯呀, 完全唔熱架, 連暖都唔暖吓. 我同流沙包講:”碟野係咪之前出錯咗無人要, 拎番入廚房. 咁啱我地又order呢個點心, 所以拎番呢碟點心出黎比我地架?”, 完全無諗過炸野竟然係完全唔熱架囉!!!

 

當侍應收碟果陣, 流沙包問:”呢個點心本身係唔熱架?”, 個waitress話”暖暖地啦”, 我就答”但係完全熱都唔熱喎…”, 佢話會入廚房了解吓喎, 其實我又唔係想投訴, 不過佢之後都無交待番呢個點心到底係點囉… 我地又費事搞事, 結果係不了了之算數.

 

其他點心我覺得都係普普通通啦, 所有野都係蒸定晒咁, 唯一係個燕窩焗蛋撻唔係整定, 上枱時仲熱辣辣.

 

服務方面, serve我地果位小姐唔錯. 其他waiters亦間中會主動埋黎幫我地斟茶. 不過唔知係咪個場太靜無咩客, 定係我地坐喺廚房出口通道隔離, 班waiters間中會圍埋一齊傾計, 我地係完全聽到晒佢地講乜. 另外阿姐會好大聲話D做細架囉, 我見有個waiter喺度執緊枱, 阿姐喺佢隔離同佢講緊野, 跟住個waiter唔知做乜行開咗, 個阿姐就好大聲同個waiter講:”我而家講緊野呀!”. 我無諗過黎呢D地方飲茶, D服務咁唔專業架嘛…

 

呢餐茶埋單大約三百六十, 我應該唔會再黎第二次.

 

 

離開國金軒, 我地喺尖沙咀hea咗一陣, 然後去咗荃灣同兩家屋企人食飯.

 

流沙包原來訂咗個蛋糕, 五週年紀念就係咁渡過咗lu~

 

Monster Sushi

話說之前我同流沙包去咗”爭鮮迴轉壽司”食咗D假壽司, 今次我決定食番D好少少既壽司, 於是去咗Monster Sushi.

 

我星期五晚大約六點十去到, 已經有人喺門口等緊位, 好彩流沙包早我少少去到已經攞咗位, 否則真係有排等.

 

我地叫咗個串燒拼盤, 海膽壽司, 龍蝦沙律壽司, 鰻魚玉子等等. 味道梗係唔錯啦, 總之唔好再叫我食番D $8一碟既就得.

卓韻芝棟篤笑 – 又悶又無聊, 勁想中途走

3月18日, 我同流沙包去咗會展睇卓韻芝棟篤笑, 我真係非常非常之後悔買咗飛黎睇.

 

我未試過睇棟篤笑係成晚都無笑過架囉, 內容勁膚淺勁無聊, 係度扮同性戀人士既動靜, 扮俞琤, 連自己阿婆都搬埋出黎, 我真係完全唔覺得有趣囉.

 

尤其是嘉賓環節, 我地果場既嘉賓係黃德斌, 我根本都唔睇香港既垃圾電視劇集, 對於黃生我真係一D興趣都無, 加上阿芝同佢既對話都唔知up乜, 講埋D咩野點樣搽cream, 又話咩自拍, 嘉賓要被阿芝摸胸… 做咩啫? 用黎攝時間呀!!?? 悶到我打住喊露咁去咗個toilet.

 

去完toilet返黎, 我同流沙包講不如走囉, 反而係流沙包話既然都買咗飛, 咪睇埋佢囉.

 

我唯有拎部iphone出黎自娛… 好辛苦捱到完場, 都未等到阿芝謝完幕, 我已經急急腳鬆人.

 

今晚真係嘥錢嘥時間, 仲要門票係$380咁貴, 早知攞D錢去睇多套舞台劇好過!!

爭鮮迴轉壽司 – 偽壽司, 我接受唔到囉…

上一篇blog話我同流沙包去咗The One睇大追捕, 睇完之後我地四圍搵野食, 見The One後面有間叫”爭鮮迴轉壽司”, 於是就試吓幫襯.

 

佢標榜碟碟8蚊, 我都知唔可以有任何要求, 但係… 我真係接受唔到呢D咁既”偽壽司”囉…

 

好難得見到D壽司, 上面舊肉係細舊到cover唔晒舊飯架囉… 都唔緊要, 8蚊呀嘛, 係咁上下, 我明白.

 

當我將舊”壽司”放入口之後, 我無辦法控制到自己, 不停喺度傻笑. “吓? 呢舊咩黎架? 壽司? 唔係掛? 咁既味道既? 我真係完全接受唔到呀!”

 

估勿論佢D飯唔係珍珠米, $8一碟我都唔認為會食到珍珠米. 不過你D壽司醋落多少少都唔怕死呀?? 我只係覺得我係放緊D味道古怪而又被捏成一舊既白飯入口, 呢舊野根本完全唔可以叫做壽司囉!

 

$8一碟真係好平, 但我真係接受唔到囉, sorry.

 

題外話, 當我地十點幾食完埋單後, 喺樓梯撞到王祖藍行緊上黎, 佢望住我地笑一笑, 我都禮貌地向佢報以微笑.

 

之後我同流沙包講:”尖沙咀咁多好野食, 點解王祖藍會選擇黎食D 咁cheap既壽司既?”

2012年3月17日(六) – 香港花卉展覽2012

星期六, 我地去咗維園既香港花展.

 

我地果日好鬼死hea, 朝早起身先去咗飲茶, 磨吓磨吓已經三點幾, 出到去銅鑼灣已經四點.

 

今日既天氣好好, 又熱又曬, 好彩我帶埋把防UV遮去, 如果唔係實曬死, 流沙包一路影相一路勁標汗. 我地馬後炮話好彩咁晏先出黎, 如果早少少
點幾兩點黎到, 真係曬到人都癲.

 

唔駛問成個維園一定係人山人海, 勁多龍友, 要攝埋去影相都唔係咁易. 不過D花真係好靚, 我最鍾意係菠蘿同埋火龍果造型, 非常可愛~~

 

呢班模特兒係國際學校既學生, 展示出唔同國家風格既花飾服裝設計:

 

我黎緊會去左手面果個十年一度Floriade荷蘭花展:

我買咗盆小花花, 叫做家樂花, 盛惠$12:

 

行完花展, 我地過海去咗The One睇大追捕, 始終覺得杜緻朗呢個編劇寫既劇本唔夠劇力, 依然好幼嫩, 成個故事既大概, 我睇咗開頭無耐就已經隱約估到, 成套戲彷彿只係靠張家輝既精湛演技去搭夠而已. 不過叫做好過上次果部完全唔掂既殺人犯囉, 果部戲不知所謂到, 令人睇完之後忍唔住爆粗.