黑店Beauty Pro

作為消費者, 我又再嗱野… 今次係團購服務. 舖頭名叫Beauty Pro, 喺尖沙咀同銅鑼灣都有分店.

http://www.beautyprohk.com/website/index.html

 

2011年8月1日, 我喺Groupon以$988買咗Beauty Pro既8次”全身淋巴人手推拿”及8次”面部骨膠原保濕防敏護理”. 係2011年9月1日接受咗第一次服務.

 

對方規定所有療程需要半年內完成, 逾期作廢. 我發覺間美容院有取巧成分囉, 感覺受騙, 詳情如下:

1. 我買既服務有兩種, 分別係人手推拿同面部facial. 美容院規定每次致電預約, 每一次只能夠預約一個BOOKING; 即係要完成咗已預約既BOOKING後, 先可以再致電預約下一個BOOKING. 但問題係, 每一次當我完成一個BOOKING後, 已經即刻致電想再預約下一個BOOKING, 但每次都要隔起碼大半個月至1個月時間先可以BOOK到下一次; 咁試問我點可能喺半年內完成16次BOOKING?!!

2. 除了規定每完成一個BOOKING後先可以再另約下一次BOOKING之外; 每一次BOOKING都規定只能做兩parts服務, 即是每一次BOOKING可以做兩parts人手推拿; 或一part推拿再加一part面部facial; 但係每一次預約, 對方都話full咗, 只可以做到一part服務, 根本約唔到兩parts服務. 但係我有時去到美容院, 都唔覺有其他客人喺度, 而佢地既美院師都只係坐埋一邊, 無乜工作做緊.

 

到最後, 我既療程已經喺2012年2月29日到期, 而我只不過完成咗3次面部facial同埋6次人手推拿而已, 剩低既7次療程已經作廢囉!!!

 

講番佢地既服務, 真係好唔掂, 先講人手通淋巴, D阿姐手勢好唔得, 每先上到去, 都係唔同既阿姐幫我做, 六次裏面, 只有一個阿姐叫做手勢好D, 真係按到到位; 其他果D阿姐, 有D就一味死力按唔啱位, 一D就好似R痕咁一D力水都無. 再講果個所謂骨膠原facial, 原來唔包修眉又唔包針清, 要包埋既話要另加$100一次. 個facial只係搵部導入機求其喺面度碌吓, 真係嘥晒我D時間!!

呢間黑店, 大家真係要小心.

鴻星酒樓貨不對辦創作點心

某個星期, 澳門有個同事過咗黎香港, 於是我地一齊去咗海港城間鴻星飲茶.

 

我地貪得意嗌咗D公仔形狀既創作點心, 睇佢張餐牌, 個形係幾得意架麻, 點知黎到之後, 個樣貌完全貨不對辦既…

 

 

 

比大家睇吓個餐牌對比吓:

 

 

另外, 某日係公司用隻膠杯斟熱水, 個膠杯竟然自動爆開咗喎…?!

 

隻膠杯係喺SOGO新買架, 只係用咗幾個月咋, 竟然咁鬼化學, 咁就爆開咗…

 

隻杯仲要係我喺pantry斟完水, 行到返自己個座, 將個杯擺低係枱面無耐, 佢就突然”咔”一聲自爆勒, D水即刻流到成枱面都係. 好彩我果陣無咩重要文件喺枱面啫, 同埋好彩呢杯只係清水, 唔係咩咖啡華田啫, 否則我成張枱D野同埋D文件唔駛要啦!!!

 

真係未試過用膠杯用到爆杯架… 飲水機D水可以有幾熱啫?? 隻杯我又從來無跌過無大力踫撞過, 咁鬼渣架隻杯…

順帶一提由於我呢隻只係膠杯唔係玻璃杯, 佢爆杯果吓”咔”一聲, 無打爛玻璃杯既聲音咁動聽, 亦都無碎片比我排靚靚, 無得細心欣賞, 寫唔到二百字抒情文, 我唔駛五分鐘就清理咗現場. 事後只係唔忿氣隻新杯咁快就爛咗, 寫咗呢二百字勞騷文.

舞台劇”野豬”, “20出頭”, “Woman in Black”

2, 3月份, 睇咗幾套舞台劇.

2月15號睇咗黃子華, 廖啓智, 林嘉欣主演既”野豬”. 本來我係無飛喺手, 當初亦都無預訂(因為晨咁早要預訂, 我都唔知自己到時得唔得閒, 所以就無訂到), 到後尾公開發售, 好快就已經full晒.

本來都諗住算數, 不過唔知點解 2月15號果日突然心血來潮上網睇吓有無人放飛, 點知又比我見到有人放當晚門票2張, 於是即刻聯絡賣家.

 

由於臨時臨急既關係, 我都搵唔到人陪我去睇; 點知賣家原來都好想去睇, 但因為要幫個仔溫書, 所以十五十六緊都唔知去唔去好. 佢話如果我搵唔到人陪我去睇, 佢話佢可以同我一齊去, 所以我就同咗一個喺網上面識咗三個鐘而又素未謀面既人一齊去睇野豬.

 

呢位網友既飛係當初藝術節賣飛既時候一次過買咗好多, 所以有折扣優惠. 而網友佢無收我原價$420, 收番我折扣價$370. 而座位位置亦好好, 喺頭第四行, 真係開心死~~

 

智叔既演技真係一流, 無論語氣神態動作表情都好攝人; 黃子華都演得好出色, 尤其是後半部份佢堅持自己信念果part; 個結局亦幾出人意表.

 

不過我估計由於黃子華效應, 吸引咗一大批無睇開舞台劇既觀眾入場, 有人夠膽死拎住杯橙汁入場; 有人屢勸不改咁死都要拎部電話出黎影相; 我隔離位條死0靚仔一路偷食朱古力條, D膠袋聲喺度”時時沙沙”… 係爭在未有人電話響囉!!!

 

到2月17日, 我同流沙包去咗睇三角關係呢個劇團既”20出頭”, 故事背景係八十年代既一班中學生, 套劇主要係讓大家懷緬番果個年代既流行文化, 包括流行曲, 漫畫之類, 現場氣氛好好, 觀眾亦都好有共鳴, 全晚爆笑不斷, 真係好好睇. 流沙包睇完之後, 佢話呢套好似係”那些年”既舞台劇版喎~ (順帶一提, 呢套舞台劇已經係9度公演, 所以佢比"那些年"應該更早)

 

其實我本身好鍾意三角關係呢個劇團, 亦好鍾意當中既主要演員徐羨曾, 我欣賞佢每次演出都全情投入, 我感受到佢既熱情, 所以每次三角關係有show公演, 我都會捧場架~~

 

3月2日, 睇咗Woman in Black, 呢個係同流搞既, 演出既地點唔係一般既藝術中心/演藝學院之類, 而係佢地自己位於新蒲崗工廠大廈既同流黑盒劇場. 個場地都算幾多座位, 我估計有五, 六十個位吧?

 

不過麻, 我就唔係好鍾意個劇本囉, 無人既大屋, 指手不見五指既濃霧, 荒蕪既墳場… 全部都係恐怖片既超級例牌菜. 間唔中出現既好瘦 面色好蒼白既女人就係果隻鬼魂, 但佢成日好似漫無目的咁出現, 所謂既詛咒我覺得有D牽強囉, 同個律師又有咩關係呢? 總之睇完之後我就滿腹疑問.

 

3月黎緊仲會睇既包括”就在那個時候的那個時候”, 卓韻芝棟篤笑, 同埋”I Love you because”.

2012年2月3日(五) -- 公司開年lunch buffet@Harbourside, InterContinental Hotel

地址: 尖沙咀梳士巴利道18號香港洲際酒店下層

電話: 2313 2323

過完農曆新年後無耐, 公司去咗洲際酒店食lunch buffet當開年飯.

 

本來秘書小姐打算開年飯係食dinner既, 但係有D同事放工之後都要返學/有其他約會, 所以有同事就提議不如食lunch算啦.

 

又本來呢餐開年飯只係求其去酒樓飲茶, 不過有同事話開年飯不如去食buffet啦, 飲茶成日都有得飲啦.

 

 

而日本人又唔反對喎, 結果我地就喺洲際book咗枱, 本來一行七人, 我地仲諗住叫司機揸公司車車我地去酒店, 可惜司機突然收到order要去接送老闆娘, 所以得番六個人去之餘, 我地就變咗行路去酒店.

 

我未試過呢度既lunch buffet, 都唔錯吖~

 

 

不過食既時間就好趕急, D日本人好快就停晒手坐晒喺度, 我地就要狂風掃落葉咁盡快吞晒D野落肚, 然後仲要KO埋所有甜品, 好忙…

 

 

最後想講既係, 呢餐飯並唔係公數飯, 好似係日本人自己夾份比架喎, 當然我地呢D做細既local staff就唔駛夾喇~

 

仆X大家樂, 越做越賤!!!

唔知大家仲記唔記得, 我公司係無微波爐的(就算有, 我都唔想留喺公司食飯囉, 我要出去抖吓氣!), 每一日出街食飯都要煩食乜.

 

有時諗唔到去邊 都會間中去吓大家樂, 但係大家樂真係越做越衰, 越做越賤, 越做越cheap.

 

幾個月前既某日 下午茶時段我叫咗個叉鴨瀨粉, 連飲品都要成$24定$25.

 

先講D叉燒, 真係好佩服佢地既切法同埋擺法囉, 佢每一舊叉燒都切得好長好濶, 從上面睇你會以為舊叉燒好大舊; 點知一夾起, 原來係勁幼架囉!!! 真係離晒譜呀!!!

 

再睇埋碗裏面既燒鴨真係把幾火, 四舊有三舊都係皮連勁大舊肥膏痴住D骨, 根本都無肉食既, 有無搞錯呀?!!

 

我真係按捺不住, 成碗野拎番去counter投訴, 佢地話換過碗比我; 挑! 換完返黎果碗咪又係咁樣, 得一舊係有肉架咋, 其他果三舊都係皮同埋肥膏黎!!!

 

我決定唔會再黎大家樂食飯! 真係太刻薄, 廿幾蚊個下午茶又唔係平, 份量勁少, 食完唔飽又谷氣, 我食過第二間無咁嬲!! 

Tea buffet@The Café, Sheraton Hotel

地址: 尖沙咀彌敦道20號香港喜來登酒店2樓

電話: 2369 1111

一月果陣, 我星期六都要返公司OT, 流沙包有一日就出咗黎尖沙咀等我OT完, 然後一齊再去Sheraton Hotel食tea buffet.

 

我就覺得果度既甜品種類好似少咗D, 不過就有好多款生果揀, 如果鍾意食水果既人, 黎呢度食buffet應該會幾開心.

 

價錢我唔係太記得, 好似係二百幾蚊一位…?

2012年2月1日 – 生日請咗半日假

話說流沙包喺我生日前夕入咗camp, 所以我踏入2月1日既凌晨都係自己一個人喺屋企過, 同埋小花, Pipi同Popo慶祝. 我就食埋喺公司拎返黎既COVA蛋糕. (D COVA蛋糕係幫我地公司D日本人租屋既地產買上黎, 公司同事食唔晒, 於是我拎埋返屋企當生日蛋糕, 一舉兩得)

 

流沙包今日出camp, 應承會陪我喎, 所以我就請咗半日假, 同流沙包過咗一個悠閒既下午.

 

 

我12點半離開公司, 一路行LCX一路等流沙包搭船喺長洲出番黎. 期間我買咗D法國菓子, 都幾貴, 一包三十幾蚊, 每包都係得三幾粒, 純粹貪過癮買黎試吓.

 

跟住我地去咗牛角食日式燒肉, 我忍唔住食咗兩碗飯…

 

食完lunch我地就搭巴士去新蒲崗, 因為我想去新開果個Mikiki Mall行吓.

 

原來個Mall都幾細吓, D舖頭又無咩特別, 最激氣係我喺果間所謂既鬆弛熊博品館買咗個雜誌架, 佢話做緊特價, 原價$138, 折咗都要$11X.

 

點知我地後尾喺同一個商場果間”玩具之森”見番同一款雜誌架, 佢果度無特價都只係賣八, 九十蚊咋, 真係激死人喇!!!

 

 

行完商場諗住搭巴士返屋企啦, 點知原來巴士站/地鐵站係咁遠, 我行咗一陣發覺唔對路, 開始好忟憎發脾四, 最後call咗的士返元朗.

 

我都唔想生日發脾四, 但真係行得太攰啦, sorry啦流沙包… 返到屋企後我攰到唔想再落街食飯, 結果我地只係打電話叫外賣KFC喺屋企食就算.

 

 

今年既生日就係咁喇~

2011年除夕party

去年除夕, 又喺我地屋企開party.

 

例牌又係叫咗D生蠔, 流沙包經過舊年既開蠔經驗之後, 今年熟手咗唔少, 開既速度快咗.

 

當然唔少得刺身:

 

舊年因為我仲係”全職主婦”, 所以舊年既party有唔少係我既傑作, 包括意粉, 焗薯蓉, 蛋糕etc.(舊年既party可睇番呢度), 今年我轉番做”事業女性”, 無晒閒情落廚, 所以今年叫咗Pizza Hut同埋KCF.

 

另外仲有墨魚媽買上黎既蝦同埋乳鴿.

 

到最後仲有個朱古力火鍋添, 我地蠢咗, 唔記得買D生果一齊點黎食:

京川滬風味小食坊 -- 不外如是

好耐無寫過食評, 自從食完呢間餐廳之後, 真係忍唔住不吐不快.

12月放假期間, 專登去咗喺太子既一間報章勁sell既上海生煎包店幫襯.

 

店名: 京川滬風味小食坊

地址: 太子砵蘭街379號地下

 

 

去之前滿懷期望, 因為自從喺上海食完小楊生煎(佳家湯包我反而麻麻地)之後, 香港果D所謂既生煎包… 算吧啦…

 

見報紙講到呢間”京川滬風味小食坊”咁勁, 又話乜鬼大廚主理, 又話個個食完都讚, 我都好希望喺果度重拾番上海生煎包果種味道, 我都唔期望會食到十足十同樣既味道, 但起碼有七成都好吖…

 

但點知…

 

我地去到果陣無人等緊, 不過入面full晒, 所以都要等一陣先有位, 喺等位期間見到阿姐開始煎新一批既包.

 

 

我地叫咗個小籠包, 生煎包同埋一個麵. 本來想叫”馳名”既醬骨架, 不過果日無喎, 所以叫咗第二種骨. 佢好快就黎個小籠包出黎, 好明顯係蒸定好晒兼蒸咗好耐咁既款囉, 賣相唔靚, D皮勁厚, 溫度唔夠熱, 食落… D汁無乜味既…? 好失望…

 

到生煎包勒, 諗住阿姐啱啱開始煎一批新既出黎, 一定好好食啦, 食落… 又係D肉汁無味既? 完全唔係報章所講咁好食囉!!! 完全都唔似上海果種味道既?? 勁失望囉…

 

我都明香港咁細, 邊有咁多好食餐廳比D報紙雜誌推介先得架, 但係, 如果事實唔係真係咁好食, 你地D報章雜誌就唔好捧到佢上天, 煲得佢咁勁先得架. 我地D食過正宗風味既食客, 食完之後完全覺得係受騙囉…

 

 

呢排呀, D報章雜誌狂吹谷D日本乜乜拉麵, 我今次唔會再上當架啦, 香港始終係香港, 水質/材料之類始終有唔同, 我預咗根本食唔番日本果種味道, 所以我完全無諗住去幫襯, 無謂再一次失望啦…