周打海鮮湯 (附食譜)

報紙既食譜我通常會剪底, 今次整周打海鮮湯, 不過唔記得喺邊一日邊一份報紙剪出黎.

材料(約4~5人份):
1. 蝦肉 8隻
2. 蜆肉 80g $6
3. 白魚柳 80g $13.4
4. 洋蔥 1個 $2.3
5. 西芹 1條 $1.17
6. 薯仔 2個 $2.45
7. 甘筍 1條 $1.32
8. 煙肉 1條 $3.7
9. 蒜蓉 1茶匙
10. 牛油 20g $1.352
11. 麵粉 3湯匙
12. 魚上湯 1L $14
13. 淡忌廉 100ml $4

步驟:
1. 蝦肉, 魚柳, 洋蔥, 西芹, 薯仔, 甘筍全部切粒

2. 油熱下蒜蓉爆香, 加入蝦及魚柳炒熟, 拌入蜆肉炒香, 待用

3. 牛油溶於煲內, 爆香煙肉, 洋蔥, 甘筍及西芹, 拌入麵粉炒勻, 需時約1分鐘

4. 注入魚上湯煮滾, 加入薯仔粒, 再煮滾後, 以慢火煮約10分鐘, 直至薯仔煮軟
5. 拌入蝦肉, 魚柳及蜆肉, 加入忌廉, 再煮滾, 調味即成

今晚既晚飯:

大約成本: $50

事後檢討:
1. 個湯既色水怪怪, 都唔係奶白色既?? 同埋比較水狀, 都唔係似cream狀既...? 點解呢? (味道都OK0既)

油牆假期即將結束...

幾日前先出個post話自己每日既油牆生活係點樣過, 估唔到個假期話咁快就結束.

我今個星期一晚收到電話, 佢話IN人IN到今日, 終於都IN晒十幾個人, 最後我係佢既首選, 決定請我. 佢話佢都IN咗好多與我學歷, 工作經驗相近既人, 其中有人既expected salary比我低, 但佢話唔係淨睇人工呢樣野, 佢話覺得我好有熱誠, 好有笑容, 工作經驗同佢地既要求又相近, 亦覺得我應該係工作上好穩定既人, 所以就決定請我喇.    

雖然呢份工比我上一份少咗千幾蚊人工(因為我唔再做日本公司, 唔需要再用日文, 所以預咗會低D人工; 但少D人工換來少D壓力, 我覺得OK), 又要返長短週, 但可以"脫離"到日本公司, 工種上又係我鍾意既會計同報稅(我最鍾意做報稅, 我都想做番呢行), 所以都試吓啦~

我既未來上司同我前阿頭都幾相似, 佢地都有讀過翻譯, 又係喺BIG 4出黎, 十幾年前比而家既公司挖角做開荒牛. 唔同既係我前上司係一個受薪族, 唔係公司老闆, 所以好多野都話唔到事; 而未來上司應該就係公司老闆, 我就係希望跟公司真正老細做野. 因為上一份工, 公司裏面最高級果個日本人都只不過係受薪族, 唔係公司真正老闆, 但就成日行行企企唔駛做咁, 成日拎住杯咖啡周圍同人打牙骹; 有客打黎搵佢 佢又成日唔聽電話, 搞到D客發晒火; 成日接埋晒D蝕大本既job, 佢D客爭我地十幾萬數唔找佢又唔理; 心情唔好就搵D同事黎出氣, 對住D得佢歡心既同事就笑口西西... 心理變態既我成日心諗"你同我都係逗份人工咋麻, 點解我要受你氣呀? 你又唔係真係出糧比我果個".    

不過真係無諗過無意中搵吓工, 一IN就請, 我無諗過呢個油牆假期咁快就結束... 我覺得自己都幾幸運, 雖然我畢業以黎唔係搵過好多份工, 但呢幾年, 無論搵咩工都好, 每一份都係IN親就請, 無試過失敗. 因為其實我自己都幾怕interview呢樣野, 更怕IN完人地唔請果種挫敗感, 成日會諗到底我有D咩比唔上其他應徵者!!?? (因為我剛畢業果陣, 搵咗幾個月先搵到工, 好多工都請咗我既同學而唔請我, 所以我果陣覺得自己好失敗) 所以今次IN成咗份工, 最開心唔係因為搵到工, 最開心係自己可以打低其他十幾個應徵者, 比人揀到出黎 "贏"到份工既呢種感覺... (我知自己咁講好寸好變態, 但極度好勝既我真係會咁諗, 如果有咩得罪, 請原諒我呢個心理唔平衡既人)

白汁雞皇飯 (附食譜)

睇咗10月12日出版既AM730, 決定自己又試吓整白汁雞皇飯.

食譜參考:
http://www.am730.com.hk/article.php?article=26898

材料(約4人份):
1. 雞柳/雞髀肉 300g $9
2. 磨菇 100g (我用咗罐頭草菇) $1.76
3. 青椒 1個 $3.45
4. 洋蔥 1/4個 $0.58
5. 蛋黃 1個 $1
6. 檸檬汁 1茶匙
7. 甘筍 1條 $1.32
8. 西蘭花 一個 (伴菜用) $3.75

白汁材料:
1. 牛油 50g $3.38
2. 麵粉 1湯匙
3. 雞湯 250ml $2.725
4. 牛奶/淡忌廉 150ml $2.62

步驟:
1. 將磨菇, 青椒, 甘筍, 西蘭花, 洋蔥, 雞肉切粒, 雞肉調味

2. 西蘭花放入滾水中灼熟待用
3. 煮溶牛油, 下洋蔥爆香, 再放入雞肉炒至八成熟, 再放入其餘蔬菜材料粒炒勻

4. 灑入麵粉炒勻, 分3次加入雞湯, 一邊加熱一邊攪拌至醬汁呈幼滑狀
5. 加入牛奶拌勻, 取出1湯匙汁料與蛋黃拌勻後再混入, 加檸檬汁再慢火煮3分鐘

6. 最後加少許酒及調味, 與西蘭花及飯一同上碟

大約成本: $30

事後檢討:
1. 我覺得D汁好稀(本身原食譜影出黎張相D汁都係稀), 不過味道係OK的, 應該OK啦呵? 

失驚無神去見工...

油牆假期放咗大約三個幾月, 每一日都好悠閒, 之但係又覺得悶悶地, 悶唔係無野做果隻悶, 我日日都可以整餅煮飯仔做吓自己野 不知幾梳乎, 但係我諗我性格都係唔可以咁優哉游哉, 所以好快就呻悶呻無聊.

其實我一向都有上網搵吓工, 本來只係想搵part time消磨吓時間, 但有一日真係覺得咁既生活太悶太無聊, 於是就睇埋full time有無野啱, 見到有間公司請會計主任, 做會計同報稅, 見個job nature都幾啱喎, 因為我自己最鍾意做報稅, 所以就send信去試吓.

(以下包含好多讚本人的內容, 不喜勿看, 哈哈)

我上星期二無咩準備之下就去咗見工(因為之前根本無諗過搵工, 所以都無諗定D咩對答), 份工既性質同我舊公司都幾似, 都係幫D客開公司, 做會計, 報稅, 做埋公司秘書之類, 唔同既係我以前做日本公司, 接既係日本客; 而家呢間就係香港公司, 接既好似係歐洲客多.

我in咗一個鐘左右, 成個過程都幾順利, 佢首先介紹吓佢既公司, 然後叫我用英文介紹吓自己同以前份工既野, 跟住用英文同我傾咗陣, 佢竟然話我英文都唔錯喎, 哈哈哈~~ 跟住佢問我點解對上果份工會辭職; 問我明明讀language出身, 點解會去咗讀BBA同PDPA; 問我點解會突然間轉field去咗做會計; 然後我又問吓佢公司D野... 佢見我不斷進修, 讀書成績又唔錯, 話我個人好有上進心, 做事好認真; 跟住佢問咗我兩次係咪真係對呢份工好有興趣, 我答佢"當然有, 否則我點會坐喺度呢?"; 然後佢話希望請一個工作穩定既人, 唔希望係D返工無耐又話唔做, 成日轉工既人, 跟住我答佢"你睇我份resume就知我唔係呢種人喇"; 最後佢話佢都收到唔少resume, 呢個禮拜會見好多人, 而我暫時喺佢心目中係頭果幾位. 跟住佢問我個expected salary會唔會有個range可以寫到比佢(本身佢請人個ad, 薪金果欄係有個range, 我個expected salary就寫咗最高個銀碼), 我話呢個已經係我既min喇.

IN完之後我出到黎, 見到已經有下一位應徵者係度等緊. 雖然IN既過程好順利, 我覺得佢對我既印象都唔錯, 但我見佢真係有咁多人黎IN, 我又一亳子人工都唔肯減, 諗住佢未必會請我架啦...

待續...

芝士麻糬波波 (附食譜)

睇到網友fat12565整麻糬波波, 自己又忍唔住手整. 因為自己都鍾意食Yamazaki既芝士麻糬波架.

網友買預拌粉黎整, 但我覺得預拌粉價錢唔平, 我就選擇買唔同既粉返黎自己mix.

食譜參考:
http://irenechanwai.mysinablog.com/index.php?op=ViewArticle&articleId=147974

材料(我整到16粒):
1. 木薯粉 15g $0.21
2. 糯米粉 110g $1.375 
3. 鹽 1/4茶匙
4. (溶)牛油 40g $3
5. 芝士粉 35g (芝士粉其實都係Parmesan, 雖然我屋企都有芝士粉, 但我選擇用一大舊既Parmesan芝士磨碎, 因為價錢平D) $6.986
6. Mozzarella芝士 10g (我無落呀. 韋太話加呢個係增加口感, 唔落都得)
7. 蛋 1隻 $1
8. 牛奶 70ml $1.218

步驟:
1. 木薯粉+糯米粉預先篩好, 加入鹽
2. 溶牛油+蛋+芝士粉加入粉內以人手拌勻

3. 牛奶逐少逐少加入麵糊內(視乎麵糊的稀杰度而定, 太稀的話好難將麵糊搓成圓形)

4. 所有材料拌勻後, 用手將麵糊搓成小圓球

5. 入爐180度焗15~20分鐘

大約成本: $14 (約$0.875/粒)

事後檢討:
1. 真係好似山崎麵包果D, 食落外層脆脆地, 內裏就煙煙靭靭咁, 好正! (但攤凍咗之後, 裏面就無咗煙靭既口感, 係咪因為焗得耐咗呢? 下次試吓焗15分鐘就算)
2. 芝士味唔係太夠, 同埋淡佐D, 下次落多少少鹽同埋芝士

垃圾ZiZiplayer!!! (有關收看即時日本電視)

未去日本之前, 我都有係香港收睇即時日本電視節目, 靠既係Keyhole. 但有睇開Keyhole既人, 都知佢既質素有幾"高", 佢個畫面好鬼細, 畫面D字根本好難睇得到. 想拉大個畫面? 唔係唔得, 一拉大咪成個畫面矇晒, 起晒格咁囉...

自從係日本返黎之後, 我一直想搵方法收睇日本電視, 早前買咗個叫做ZiZiplayer既USB物體, 只要插入電腦, 就可以收睇到幾個日本/韓國電視台.

初初都幾好既, 但係最近, 成日都睇唔到囉... 開個畫面出黎, 睇唔夠兩分鐘, 就會無啦啦disconnect, 之後你不斷咁嘗試再connect, 佢就淨係出"channel searching"呢個字, 一係就等成粒鐘都connect唔到, 一係就不斷彈出"please retry again", "fail to connect selected channel", 總之就根本無辦法再睇到, 真係激死我啦!!!!!!

大嗱嗱成二千蚊買舊咁既垃圾, 根本都睇唔到既!!! 而家我都係睇番Keyhole既起格畫面, 好嬲呀!!!

雜果皮牛油蛋糕 (附食譜)

今次整蛋糕, 第一次唔用牛油, 試吓改用菜油黎整.

食譜參考: 劉偉雄著既《甜品姿味》第28~29頁"什果皮牛油蛋糕"(天地圖書有限公司, 2008年5月出版). 不過因為我個蛋糕模無咁大, 所以以下份量係書中份量既一半.

材料(我用L18xW8xH6cm長方形模):
1. 雞蛋 3隻 $3
2. 砂糖 127g (我只係落咗80g) $0.84
3. 麵粉 90g (我無普通麵粉在家, 所以用埋高筋麵粉代替)
4. 高筋麵粉 90g $3.564
5. 牛油  140g (我用咗同等重量既固體菜油) $8.652
6. 牛奶 50g $0.87
7. 雜果皮 50g

步驟:
1. 將雜果皮均勻蘸上高筋麵粉(以避免雜果皮沉底)
2. 牛油+砂糖, 用電動打蛋機慢速打發至濃稠(跟書學就有呢個唔好處, 點先為之"濃稠"?)

3. 分次加入雞蛋用電動打蛋機打勻

4. 分次加入已預先篩好的麵粉+高筋麵粉, 人手拌勻

5. 分次加入牛奶, 人手拌勻
6. 加入雜果皮, 繼續打發至軟滑, 呈奶黃色
7. 將麵糊倒入蛋糕模, 用膠刮掃平表面

8. 入爐170度焗40分鐘(焗約10分鐘後, 可在蛋糕面界一刀, 等蛋糕面爆得靚D)

我無界一刀, 所以個面爆到咁:

大約成本: $20

事後檢討:
1. 我專登落少咗糖, 但整出黎真係唔夠甜, 下次試吓落100g(原食譜係127g架)
2. 我屋企無普通麵粉, 所以用晒高筋麵粉(180g)整, 唔知係咪咁, 整出黎質感好實, 食落唔夠鬆軟, 下次係咪應該跟番落麵粉+高筋麵粉呢?
3. 因為想健康D, 所以我用咗固體菜油代替牛油, 但整出黎真係無咗焗蛋糕果種香味, 加上我又落少咗糖, 搞到好似無咩味道咁
4. 個蛋糕一路焗一路勁標油, 唔知咁係咪正常呢? D油多到漏咗出黎流咗落焗盤, 而且個蛋糕起模後, 個模都剩咗唔少油係度

5. 蛋糕質感好實唔夠鬆軟, 唔知關唔關菜油事? 書裏面教"打發牛油的時間不妨長一點, 打發得越久, 蛋糕越鬆軟". 下次試吓用番牛油整, 同埋打得耐D 

我每日的油牆生活

有D朋友好想知我油牆假期係點樣過, 等我就簡單講一講啦.

平日(一至五):
9:15am 起身
9:30am~12:30pm 睇報紙&討論區既財經版; 睇每日公佈既盈喜/公司業績; 睇住個市; 聽叱咤903
12:30pm~2:30pm 食lunch; 上facebook; 寫食譜; 睇東森電視學煲冬瓜 
2:30pm~4:00pm 繼續睇住個市
4:00~7:00pm 間中會整吓餅/甜品; 上facebook; 寫食譜, 搵食譜; 溫日文, 睇日劇/日本電視
7:00pm~9:30pm 食dinner(如果流沙包返黎食飯就會6點左右開始煮飯); 睇電視(呢期會睇義海豪情/東森電視學煲冬瓜); 睇報紙
9:30pm~1:00am 聽叱咤903; 沖涼; 睇書; 上討論區; 等流沙包返歸; 間中會整吓飯後甜品
1:00am~ 瞓覺 

另外逢星期一會4:00pm出街, 先去做facial, 然後去上日文堂.
同埋隔幾日就會吸塵, 洗衫.


週末/假期: (如果流沙包無野做, 可能會一齊出去行吓, 不過呢D機會絕無僅有, 基本上佢周末都唔會係屋企; 如果佢有野做, 我就會自己係屋企hea)
朝早: 睇呢個星期內錄低咗既電視節目, 包括新聞透視, 財經透視, 星期日檔案, 頭條新聞, 鏗鏘集, America's Next Top Model之類
下午: 整餅/甜品; 溫日文, 睇日劇/日本電視;  寫食譜, 上網搵食譜; 執吓屋etc.

朱古力核桃鬆餅 (附食譜)

呢期好鬼鍾意整鬆餅, 因為自己鍾意食, 又可以整黎比流沙包當早餐, 慳番唔少~~

食譜參考:
http://www.leisure-cat.com/frm_1359.htm

材料(約6個):
1. 無鹽牛油 50g $3.75
2. 砂糖 80g (我用咗60g only) $0.63
3. 蛋 1隻 $1
4. 低筋麵粉 85g $1.105
5. 可可粉 15g $3
6. 泡打粉 1茶匙
7. 鹽 1撮
8. 牛奶 60ml $1.044
9. 核桃 隨意 $3.2
10. 入爐朱古力粒 隨意

步驟:
1. 牛油先放室溫回軟
2. 牛油用電動打蛋機打鬆, 分2~3次加入砂糖打勻, 打至變淡黃色
3. 發勻雞蛋, 分2次加入牛油打勻, 加少許鹽

4. 粉類先篩過, 分幾次加入牛油, 用膠刮攪勻

5. 牛奶分兩次加入麵糊攪勻
6. 加入入爐朱古力粒及核桃拌勻(核桃可事先稍焗一會至呈金黃色)
7. 將麵糊倒入餅模, 加至7成滿, 再在面頭放上核桃

8. 入爐160度焗20分鐘

大約成本: $15 (約$2.5/個)

事後檢討:
1. 唔係好覺有朱古力味, 下次試吓落多少少可可粉, 同埋試吓將牛奶改用朱古力奶

食譜的版權尊重

自從油牆假期開始玩煮飯同整餅之後, 我每日都會上網搵不同既食譜. 係搵既過程當中, 發覺天下文章真係一大抄.

好多時係唔同既網站, 人地既blog, 討論區等等, 發覺好多食譜都係一模一樣架喎, 有時連錯字, 別字等等都照copy可也.

我覺得你參考得人地既食譜去整, 就應該尊重番人, 應該將你食譜既出處post埋出黎囉. 就算你所抄既食譜來源都未必係原創食譜, 可能佢都只不過係照抄其他人, 但我覺得你都應該post埋人地條link出黎囉...

就好似你讀書做project果陣, 如果引用咗人地一句半句說話, 你都要quote番係參考咗邊度啦吓咶? 你而家成個食譜copy人地當做自己, 都唔講番quote自邊度, 港人就係咁唔尊重知識產權呢樣野...?

(我唔係比人抄食譜, 何況我D食譜都只係參考人地, 我只係覺得D人好唔應該啫)