油牆假期前奏: 阿茂整餅

我resign佐之後唔打算做野住, 想做番D師奶野, 所以諗住學吓煮飯同整蛋糕.

講多少少點解係日本返黎無耐就resign既原因, 其中一個原因係覺得對流沙包有D唔住, 因為我一直都無做過一個好老婆應該要做既野, 係屋企又唔執屋, 又唔識煮飯, 屋企交幾多錢水電煤氣費我都唔知, 之前仲要去佐日本半年, 掉低佐佢一個人係香港唔理, 好似無盡過做老婆應有既責任.

之前個心成日諗住係事業上要向上爬, 成日話自己係職業女性, 不斷進修又進修. 但係日本返黎之後, 個心態好似變晒咁, 可能返到香港後, 人工又無咩加, 野又照做餐死, 公司management同果位日本人老細我又越睇越唔順眼, 所以有時會問自己"你過佐日本半年到底係為咩啫? 你咁搏做咩啫? 你讀咁多書為咩啫? 做黎做去人工都係咁, 你到底想去到咩野位置啫?" (係呀, 我呢排負能量勁高, 諗法好消極)

唔知點解突然間我覺得好攰呀, 好似無晒力再向前行咁, 無晒工作衝勁, 無晒想向上爬既野心, 只係突然想做番一個師奶, 做番一個好老婆, 好老土既一句"休息就是為佐將來行更遠的路", 就係咁, 我決定放一個油牆假期. 

為佐唔好白白浪費呢個油牆假期, 我第一步就係學整餅, 因為自己鍾意食tiramisu, 所以我人生第一次學整餅就整tiramisu啦.

上堂無可能影到相啦, 所以只能夠比個完成品大家睇:

 

個cake可以自己拎走架, 二百幾蚊學費包晒材料, 一個六吋完成品, 包埋盒可以拎走:

差唔多食晒先記得影埋裏面係點樣:

上完堂後, 我自己係屋企整過兩次架(但唔係整餅, 只係倒落杯整), 遲D再同大家分享過程吖~

蓮香樓食飯 -- 好味好味~~

地址: 中環威靈頓街160-164號
電話: 2544 4556

7月30日係我既last day, 果日無咩特別, 放工後去佐蓮香樓同中大班同學食飯.

呢隻係要預訂既八寶鴨:

隻鴨裏面好鬼多料架~:

焗魚腸:

 

 

 

拳頭咁大既蓮蓉包:

 

個包好鬼重手架, 睇吓裏面D饀~:

QB House 10分鐘剪髮

我前排去幫襯佐QB House剪頭髮, 呢間野我覺得平時唔會有女仔去, 印象中都係男人去或者D阿媽帶小朋友去剪髮多.

我當然唔係為佐貪平($50齋剪)啦, 不過係為佐貪快.

我平時去剪頭髮, 通常都只係洗剪吹, 唔會整咩負離子呀染髮呀之類, 但普通剪個髮都要粒幾兩粒鐘, 呢樣野我真係好唔鍾意. 尤其是洗頭, 淨係落洗頭水護髮素都落幾次, 又要"享受"埋果D唔舒服既所謂按摩, 洗個頭都洗成幾個字, 我係屋企沖埋涼都快過佢...

 

我呢D長頭髮通常都係隔幾個月修吓髮尾剪吓前面D陰就算, 次次去剪親髮都兩粒鐘我覺得好嘥時間, 加上我呢D髮型, $800剪一次同$80剪一次睇落都唔會有咩分別, 所以我對SALON既要求都越黎越求其, 以前都會keep住出尖沙咀搵相識既髮型師, 幾舊水剪一剪, 但而家我就越黎越求其. 所以果日(未resign之前)趁lunch time去佐公司附近間QB修吓髮尾剪吓陰, 10分鐘就搞掂, 而且個效果我幾滿意添喎.

 

最搞笑係我剪完返公司, 有個同事見到我D陰剪得幾好, 成日都提住"我想剪Chloe D陰呀~" (因為佢之前D陰剪得唔滿意, 話好想剪到我D陰咁樣, 哈哈)

 

呢間QB真係啱晒我呢D連剪頭髮都懶得等既人~~

愛上看舞台劇

呢排我愛上佐睇舞台劇, 係度想講吓我既看後感.

 

29+1

我黎到第六次方先去睇, 仲要係睇加場, 其實我好耐之前已經想去睇架啦, 本來想同D姊妹去睇, 但又夾唔到時間. 到今次第六次方, 一定要去睇呀, 好彩買到飛.

 

開頭果半個鐘真係超爆笑, 笑到流眼水(我睇詹瑞文都未笑到咁開心), 而後段就開始較為感性, 成套劇我覺得唔錯, 唯一我覺得麻麻地係"黃天樂"呢個角色. 佢一出場果種"開朗天真", 加上佢既衣著打扮同果副眼鏡, 我以為係時光倒流 講番主角林若君少女時代既歳月... 如果呢個角色可以"收歛"番少少, 我覺得感覺會好D, 因為佢而家呢個過度"開朗"既性格設定, 我覺得反而令個角色好似有D低B咁.

 

我比85分.

 

俠盜張師奶

呢套劇, 對唔住, 雖然我相信台前幕後花佐唔少心血排練成, 但我真係覺得內容係絕頂無聊. 全場有好多懶係想搞笑既笑位, 但我完全唔覺得好笑囉. 成個劇本實在太無聊胡鬧啦, 去到中場休息, 我真係有衝動想即刻走.

 

我比60分.

 

 

潮性辦公室

呢套劇唔錯, 無咩悶位, 四位演員都做得好好, 但令我最印象深刻既係果位Rosa, 佢扮印度籍人士既演出真係勁精采爆笑, 佢既身體語言真係好得, 簡直好似上佐身咁, 估唔到一個美女可以有咁既演繹, 勁!!

 

我比80分

 

死佬日記

呢套舞台劇全場由歐錦棠由頭帶到尾, 全場都幾多笑聲, 不過我就笑唔出/唔識笑, 因為我唔係一個好"典型"既老婆/女性, 流沙包又唔係一個好"典型"既老公/男人(因為我會講粗口, 反而流沙包佢唔會講; 我會攤係梳化做化石, 反而係流沙包去做家務etc), 所以好多地方我無咩共嗚, 有唔少笑位我唔多認同,笑唔出.

 

成套劇唔差, 我認為唔算有悶場. 我覺得最好睇反而係謝幕之後果part(謝幕後佢仲有一part表演架, 所以千祈唔好趕住走).

 

我比75分. 

 

 

點解手牽狗

呢套舞台劇我覺得中規中距啦, 最突出我覺得係林澤群所分演既攪笑角色, 估唔到佢咁既身型都可以扮到女人. 林澤群都有演出過我上面提及既俠盜張師奶, 雖然角色都要搞笑, 但可能《俠》個劇本真係唔掂啦, 出黎既效果完全唔好笑囉. 但係點解手牽狗裏面, 林澤群既演出真係令人忍唔住笑, 為套劇增加佐唔少分數.

 

我比78分. 

 

 

情人眼裏出壽司

我覺得呢套真係麻麻地, 內容唔夠到肉, 笑位頗低能. 我既感覺係悶場位都幾多.

 

演員方面, 男女主角本身實力毋庸置疑, 只係向佐麻... 好明顯演得好唔自然, 但我明白佢舞台經驗不足, 希望將來能有更多磨練啦. 

 

我比70分.

 

 

黎緊8月仲會睇笑帝, 好期待~~

親手種的西瓜

話說流沙包學校係粉嶺租佐幅農地, 佢間中會帶班學生入去耕田.

做佐幾個月農夫, 終於有收成啦, 流沙包某日帶佐個西瓜返黎, 係自己種既有機西瓜黎架~

 

仲幾甜添喎, 厲害厲害~~

松屋日本料理 -- 感覺唔好

地址: 銅鑼灣駱克道491-499號京都廣場3樓

電話: 2136 1271 / 2136 1272

 

我地係buffet club會員, 通常係酒店食buffet都係兩位去, 一位免費.

 

我見7月就到期, 於是上星期同流沙包去佐松屋食日式放題啦.

 

佢果度平日6點至9點既時段都只係$168一位咋麻, 大家估吓我地埋單要幾錢?? 答案係三百幾蚊呀... 吓? 乜唔係買一送一咩?

 

唉, 我自己無睇清楚囉, 佢張coupon上面寫住只限用於"不限時段任食放題". 原來佢果度仲有一個6點至11點, 可以坐全晚既"正價收費", 價錢係二百幾(我唔記得係$225定$255)一位. 用buffet club張coupon, 就只能夠用正價去計算, 結果埋單就要三百幾蚊, 其實我即使唔用呢張coupon, 普通$168一位加埋一, 埋單係$370. 根本用同唔用張coupon都係差唔多價錢, 嘥鬼氣...

 

唔可以話佢呃人, 只怪自己無問清楚何謂"不限時段任食"囉...

 

另外講一講D食物, 種類唔多, 味道亦好一般, 不過串燒揚物上枱時仲係熱辣辣, 係呢樣幾好囉...

但我相信以後都唔會再黎幫襯架啦~

黑雨

頭先落街食飯, 橫風橫雨, 返到黎先知原來係紅雨.

 

記得七月中咪有兩日係黑雨既, 真係痴痴地.

 

唔明點解有D公司係黑雨可以早放工既...? 黑雨唔同八號風球喎, 通常黑雨掛得個零兩個鐘就會除下架啦. 而且黑雨果陣應該要留係安全既地方先啱架喎, 點解反而可以即刻離開公司返屋企既呢? 奇怪...

 

記得7月22號臨放工先黎黑雨, 麻鬼煩, 本來約佐D friends食飯架麻, 結果要取消, 於是我就返元朗同流沙包食飯啦.

 

返到入元朗, 無雨既...? 但黑雨仲未除下架喎...

 

天色仲幾好添喎:

 

結果雖然果日係黑雨, 但我全日都無開過把遮囉, 勁!!

現在的90後... (內容涉及粗言穢語, 不喜勿進)

今日搭968由元朗出銅鑼灣, 有3個15歳唔夠既小妹妹坐係我隔離同埋後面既座位, 坐我隔離果個好靜, 無咩出聲, 後面兩個女仔撩佢講野, 佢都係一問一答. 但係坐我後面果兩個女仔, 一上車就雞啄唔斷, 其中一位既聲浪仲好似巴士阿叔咁大聲…

小朋友多野講唔係問題, 問題係聽見佢地既對話內容, 真係汗顏… 從佢地既對話當中, 我聽到好多不堪入耳既詞語, 例如佢地形容某些發姣既女同學係"姣西", 形容某男同學係"MOKE契", 係新潮語黎既???

以下節錄某幾段對話:

對話1:

A: 阿XXX果日同我示愛呀, 但個方法超老土囉, 佢係MSN度係咁話"其實… 其實…", 跟住我答佢"其實你老母!" (14歳可以咁爛口, 好野!!), 之後佢話佢好鍾意我喎, 咁我咪話我都鍾意佢囉…

後尾同佢出街, 上佐佢屋企, 見到佢阿爸, 佢阿爸都幾錫我架, 係咁問我飲咩, 可樂定七喜, 話落街買, 我話要啤酒, 佢阿爸真係買佐罐啤酒比我. (咩世伯黎架?)

但我地拍佐一個月左右就散佐啦, 佢老豆老母唔鍾意佢拍拖喎, 我老豆就無咩野既, 但我阿媽唔鍾意囉…

B: 我阿爸阿媽就無咩所謂喎, 我阿媽話我自己識處理就得架啦喎…

A: 跟住一個月後我就鍾意佐YYY勒…

我的感想: 唔通係我太古板? 而家呢個年代連D父母都係咁, 買啤酒比個15歳唔夠既0靚妹飲? 咩野"自己識處理就得呀"? 14歳人知道咩係愛情? 有無教定你個女點避孕先?

對話2:

A: 我同YYY示愛, 我摺佐好多##(我聽唔清楚係星星定乜野, 但估唔到呢個年代仲興送呢D野), 入落個玻璃樽送比佢, 點知佢唔要喎, 我咪掉落垃圾筒囉, 阿SIR問我掉佐D乜, 我咪話係D無用既野黎啫.

B: 咁你買佐幾多包摺紙呀? 嘩, 都幾揼本喎.

A: 我覺得錢對我黎講唔係問題喎…

我的感想: 如果我係佢父母, 我真係想兜巴摑埋去囉, 你錢都未識點搵, 咁大口氣話"錢對我唔係問題", 勁! 你試吓完全無零用錢用吖嗱?

對話3:

係佢地既談話內容我聽到佢地係去動漫展, 電話響起.

A: 喂, 吓? 點解你會有我電話架? … 有仔黎呀? 我地呢度有3條女呀! (咁樣形容自己都有既? 話時話你咁樣算唔算姣X呢?) … 咩話? 你頂我? 你仲咩頂我呀? 你頂我邊度呀? (聽到呢句我當堂呆佐, 估唔到佢會咁回應喎) 吓? 你強姦我?...

A收線後, B問A: 同校架?

A: 唔係呀, 網友黎架.

我的感想: 唉, 救命呀~~ 我真係打死都唔會生囉… 14歳原來已經係網上識男仔? D對話仲要"強姦呀""頂我邊度"之類… 點解而家呢個年代會咁架?

 

last day...

尋日係我既last day, 說實在, 我係唔開心的, 因為我好唔捨得.

其實我唔係討厭呢間公司, 呢間公司既同事好好, 我阿頭好好, 有問題既係果位日本人老細, 同埋公司既management.

尋日我阿頭AL, 所以唔係公司, 我今次resign, 我自己覺得最對唔住既就係我阿頭, 我同事話我阿頭心裏一定都唔好受, 所以今日放假唔出現.

負責admin既同事今日交埋封reference letter比我, 係我阿頭寫的, 之前有朋友話我咁樣"一走了之", 小心封reference letter... 收到封信後, 我坐係自己個位度一路讀, D眼淚就一路係咁流… 封reference letter寫得我好好, 比我想像中更好, 講我係公司做過好多野, 完全係有讚無彈, 所以我心裏面更加內疚, 諗番起呢三年黎我阿頭對我既教導, 我真係好難過, 最後要匿埋係toilet自己喊佐陣.

如果公司唔係由果個咁既日本人去head住, 我估大家同事會做得更開心, 而我亦應該會係公司繼續做落去…

好啦, 講吓D搞笑野, 有好多同事"謀住"我個位D野, 有個同事自己個keyboard唔係咁好打, 一早已經講明佐要換走我個keyboard; 亦有同事個speaker壞佐, 公司又無幫佢換, 所以我個speaker亦都換佐比佢; 而另一位同事因為佢枱頭電話果條聽筒電話線變晒形, 所以亦都同我換佐個電話. 我個位既有用物品已經奉獻晒出去啦, 哈哈~~

唉, 真係好唔捨得班好同事呀…

Soft Aroma -- 可愛咖啡圖案

地址: 上環永樂街105號地下

電話: 2541 0666

前幾日同同事出街食lunch, 間餐廳既意粉麻麻地好食, 但杯咖啡就非常可愛.

 

平時我見D咖啡造型都係畫吓花呀, 樹葉呀, 心心呀之類; 估唔到呢間餐廳竟然會畫公仔架.

 

仲有我心愛既Keroppi添喎(呢杯Mocha唔係我, 係我同事的):

 

好鬼可愛呀~~