八月花 -- 服務好差

地址: 九龍塘達之路80號又一城G25店
電話: 2333-0222

用AE白金卡星期五去百老滙, IFC Palace, AMC睇戲可以享有買一送一優惠, 所以上兩個星期五就去佐又一城睇Mamma Mia. (本來想去睇四條大路通陰間, 不過流沙包第二日就要去camp, 得番我一個人係屋企, 都係唔好睇鬼戲住...)

用AE白金卡去美心集團食中菜, 2人同行亦可享有半價優惠, 所以睇完戲我地就去佐八月花食飯.

我地叫佐兩個湯, 南瓜什菌軟殼蟹, 粟子雞, 擔擔面, 甜品叫佐個三色梳乎里~

我果個係帶子酸辣湯, 味道麻麻地. 其他野就普普通通啦, 無咩comment呀~

不過呢度D侍應, 服務質素同態度就麻麻地啦, 可能我地好晏九點幾先去食飯, D人好似趕住收工咁.

Pat Pat痕upgrade佐兩張信用卡做白金卡

話說我同流沙包本身有兩張AE金卡, 一張係credit card, 另一張係charge card(我果兩張當然係附屬卡).

 

AE早排成日打黎「邀請」我地將張gold card upgrade做白金卡. 流沙包已經推佐N次, 因為年費又貴, AE既annual fee又無得waive.

 

但後尾唔知流沙包傾掂佐D咩返黎, 終於都upgrade佐做白金credit card. 去美心集團食飯, 二人同行可以有半價優惠.

 

另外我本身有張HSBC credit card用多好多年. 某日同ii傾開, 得知滙豐白金卡既優惠都唔錯, 然後我醒起好似早前收過滙豐寄黎既信, 「邀請」我將而家張card upgrade做白金卡, 於是我又pat pat痕走去申請, 話咁快就批佐.

 

原來而家D白金卡咁易申請到, 下次銀行再promote係咪要申請黑卡了??

無聊事一則: 第一次用senior consultant名義出信比稅局

我一向都有做開tax既野, 例如計Profits Tax, 填Profits Tax Return(報稅表)等等. 但tax admin既野如出信比稅局果D「對外事務」, 一向都係另一位同事負責.

 

不過黎緊呢個星期個同事請佐大假去旅行, 所以我就負責埋對外既野.

 

上星期第一次用senior consultant名義簽名出信比稅局. 雖然只係無聊事一則, 又唔代表D咩野, 但係感覺唔錯, 哈哈~~

 

今年第一次開冷氣訓覺~

我份人唔多怕熱, 而且唔多受得冷氣, 所以平時係屋企已經好少開冷氣, 訓覺更加唔會開.

 

但中秋果幾日, 天氣真係特別翳熱, 頂唔順, 終於係今年第一次開冷氣訓覺(但半夜太凍, 所以都熄佐冷氣轉番用風扇)

 

同埋中秋果幾日仲係我今年第一次沖凍水涼. 因為我地個熱水爐就算將個溫度較到最低, 係夏天黎講D水都仲係好鬼熱, 所以無可奈何就試下沖凍水涼, 但係我完全唔覺得D水好凍喎, 可想而知天氣真係熱死人...

錯過了去日本研修的機會...

我入佐黎呢間公司約年幾, 初初我入黎做果陣, 公司已經話會派我呢個post既同事過日本研修.

 

不過一直以黎, 公司都淨係好似得個講字, 又唔知幾時可以過去, 又唔知一去會去幾耐, 所以我以為已經無件事.

 

於是我就報個course增值下啦~ 剛剛9月先開學.

 

幾日前, 日本大老細黎佐香港&澳門過中秋節, 我同佢打佐聲招呼(可能就係咁喚醒佐佢記得香港office仲有我呢個識日文既小薯仔). 之後放完假返黎呢兩日, GM同老細分別同我講, 話日本大老細突然間叫我可以於黎緊呢幾個月過日本研修, 為期半年.

 

但可惜中大果邊已經開佐學啦, 我又唔想讀讀下停學, 所以唯有等一年or兩年後畢業先至可以過日本研修了.

 

嗚嗚, 好可惜呀~ 之前既日子未開學, 一直都無聲氣話可以過日本; 剛剛開學就突然收到消息話可以過去...

 

希望到兩年後我中大畢業, 日本大老細仍然keep住身體健康, 等我可以到時先過去日本公司研修啦~~

Sweet Coffee -- 值得再去~

地址: 元朗西菁街23號富達廣場G30舖

電話: 2944 6949

 

上星期五諗住做完facial趕返屋企參加屋苑搞既慶中秋活動, 點知都係趕唔切, 激死人啦~ 搬佐入黎兩年, 一次都未參加過呢D慶祝活動, 無得去玩, 無得去食, 無得去抽奬...

 

趕唔切返黎玩就唯有去食飯啦, 都唔知食咩好, 盪下盪下去佐呢間餐廳食.

 

我地叫佐兩個set dinner share黎食, 一個係雞扒焗天使面, 一個係燒豬肋骨拼薯菜.

 

感覺上呢間餐廳幾用心去煮, 因為個焗雞扒天使面唔錯, 配料算多, 賣相幾靚, 味道都幾好.

 

不過我就稍嫌個rib麻麻地, 唔知點解佢呢個rib勁多骨, 骨與骨之間都無咩肉既, 唔抵食. 同埋薯菜原來係切粒薯仔, 如果係薯條/薯塊就好勒...

 

晚餐甜品我地揀佐芝士蛋糕同芒果布丁, 個cheese cake好食; 但個芒果布丁就完全唔掂, 淡而無味, 不過佢既質感唔錯喎, 好滑.

 

同埋杯熱檸茶都唔錯, 我以為係茶餐廳果D, 片檸檬篤多兩篤浸多兩浸就會變苦; 但呢度既檸茶唔同茶餐廳果D, 茶既味道好好, 同埋一D都唔苦~

 

是次消費每人約$150.

 

 

拍賣網 Vs 以物易物網 (下)

但估唔到而家竟然會興起barter, 於是我又好似以前咁, 將屋企所有唔等駛既野都放晒上網, 希望環保之餘(因為有D野如果無人要, 最後都會被我掉落垃圾筒), 又可以換番D有用既野返黎, 幾好架, 一舉兩得~

 

呢排我成日將屋企一D唔要既野放上去兩個香港主要既以物易物網, 分別係:

 

http://www.rever.com.hk/index.php

 

http://www.tradeduck.com/

 

我個人就比較推介Tradeduck, 因為呢個網多D人用, 同一樣物件, 放上Rever可以一直無人問津; 但放上Tradeduck, 有D野post上網唔夠十分鐘, 就已經收到好多回應.

 

同埋我覺得Tradeduck既functions同設計都好D~~ 起碼你可以知道每一樣貨品有幾多人要求交換, 咁就知道果樣野有幾人氣~

拍賣網 Vs 以物易物網 (上)

其實我相信每個人都有好多野係買佐返黎覺得唔啱 / 用佐幾次已經無再用 / 年紀大佐唔再適合用 等等既物品, 如果掉佐去又好似好浪費... 所以我由讀書果陣開始已經係拍賣網站既常客.

 

我第一個用既拍賣網叫「點點紅」, 想當年不知幾咁紅, 紅到0係各個旺區都設有交收站. 不過後來網站開始收費(唔記得係咪比人收購佐), 我就已經無再用, 而佢既氣勢同受歡迎程度亦已大不如前.

 

點點紅收費後我轉佐用Yahoo Auction, 當時仲係免費用, 我通常會係網站度賣CD, 書本等等; 而我買返黎既野多數係教科書, Keroppi既野等等.

 

後尾連Yahoo Auction都要收費既時候, 我就退出佐auction界lu.

 

或者你會問仲有個e-Bay架喎, 但唔好意思, e-Bay HK雖然我有登記過, 但就無買賣過, 因為e-Bay HK完全係不成氣候, 貨種又少, 係香港又唔夠popular. 我只係試過係外國既e-Bay幫朋友bid佐盒Lego玩具返黎, 僅此而已.

 

當年都好似仲有個拍賣網叫GO2HK既, 不過都好似執埋囉...

~~日本同事的飯盒~~

好開心, 尋日個日本同事幫我帶飯~~

 

有豆腐, 豆, 南瓜, 豬肉, 芋頭, 好味道~~

 

2008年9月6日(六) -- 返中大上堂

今個星期終於都要返學啦, 星期三就返Scout Centre, 星期六就返中大campus上堂. 每堂都要上三個半鐘, 都真係幾難捱.

 

星期六果堂就好D, 講Business Law, 一來同我工作上有直接關係, 我上堂都專心D, 二來阿sir都幾風趣幽默, 時間好快就過.

 

但係星期三上Financial Management, 一來D野又悶又難, 二來阿sir又悶講D野又深, 時間好難捱呀~ 阿sir好似assume我地已經識好多野咁, 好多technical terms我都聽唔明, 黎睇我要返去溫番以前學過既野先得... 

 

我要努力呀!! GPA如果唔過3, 就上唔到第二年Master架啦~~ (雖然讀1年已經可以考QP, 唔一定要讀埋第二年Master)

 

(本來諗住星期日溫下書, 但係掛住打NDS, 咩都無溫過, 嗚...)