稻香超級漁港 -- 唔好叫套餐...

地址: 屯門屯合街2號時代廣場第二層4號舖
電話: 2449-2822

23號約佐幾個姊妹(都係我中學同學)同埋一個中學阿sir食飯, 地點係屯門稻香, 先講食物, 我地叫佐個$198三餸套餐, 有炒豆苗, 例牌沙薑雞同一個咩鬼加菲蟹, 同埋何sir再叫佐個川椒皮蛋. 本來我唔想食飯想叫碗米粉, 個waitress好「坦白」咁話米粉要好耐, 要等半個鐘喎… 咁於是唯有改叫白飯囉…

一句講晒, 食物麻麻, 可能我地叫套餐啦, 份量好少, 最奇怪係個蟹, 唔明點解個套餐要搭個蟹係度, 又送唔到飯, 結果我食剩半碗飯, 因為已經無晒餸, 唔通食白飯咩…? 雖然食剩半碗飯, 但係呢餐我係食唔飽囉, 嗚嗚…

餐飯都係其次, 主要我地都係好耐無見何sir, 今次約佢出黎順便派帖比佢. 時間真係過得好快, 轉眼我地呢班同學好多人都陸續結婚, 有D仔都生埋. 何sir仍然係單身一族, 說實在雖然何sir佢個款係口花花, 輕佻, 但係我知呢個只係佢既表面, 實際上佢做事係好認真, 博學多才, 好有辦事能力, 同埋對學生係好好. 想當年佢成日請我地去飲飲食食, 請過我地去流浮山食海鮮, 去佢屋企打邊爐, 去佢club house度BBQ.

同埋真係好佩服佢, 由band 5學校如沙頭角官中至band 1學校皇仁書院都教過, 聽番佢係沙頭角官中點樣應付D學生, 真係好好笑.

其實我真係好衷心希望何sir可以快D搵到個人結婚, 因為我覺得佢條件唔差, 都算係鑽石王老五, 佢自己都話想結婚, 可惜就係無合適既對象.

是次消費每人約$70 (爭唔嬴, 何sir埋單請我地)

 

上新公司簽約

23號放工我去佐上環間firm簽約, 初步感覺係張生都幾好人, 講講下公司野佢問我去過日本邊度, 佢話去日本有機會試下去D非熱門旅遊點, 如四國果D地方, 包你撞唔到香港人.

張生話老細同埋日本總公司老細去佐紐西蘭開會, 張生話有機會第時可以派埋我一齊去, 因為你知D日本人既英文水平係... 搵個人陪埋去當做翻譯都好. 張生話本來佢都要跟埋去紐西蘭開會, 不過因為約佐我上黎簽約, 所以無去到.

然後張生簡單講下我入到公司會點樣, 佢話唔好介意初初入到公司會好似阿四咁(我心諗:我而家係公司都係阿四咋麻, 我都自稱係打雜啦, 有咩所謂~), 同埋佢希望我初初會周圍去下, 去稅務大樓, 去下咩咩商業登記處等等, 張生話去睇下知道D野要點做點申請, 明白個flow咁第時同日本客解釋都容易D. 跟住佢先介紹佐個同事比我識, 因為佢個post同我一樣, 都係Japanese Coordinator, 比我早入黎幾個月, 打個招呼之後, 跟住我就走勒, 返屯門約佐中學同學同阿sir食飯.

同埋我打比agent決定推SANYO份工, agent知道我既決定後, 叫我再諗清楚, 話SANYO咁大間公司你都放棄, 揀間咁細間既CPA firm仔?? 佢話驚我第時會後悔, 呢D firm仔全香港都唔知有幾多啦, 同埋佢話都唔知幾多人係裏面想跳番出黎, 你就偏偏揀呢行黎做? 講真, 如果我唔係真係厭倦佐日本公司既sales co/sales exe呢類工作, 我九成會揀SANYO啦, 大佬人工又高D, 福利又好D. 但係我真係想轉行, 唔係得個講字, 所以我寧願錢少D, 公司細D, 都決定揀間firm仔囉... 因為我覺得"做佐後悔總好過無做過而後悔"麻, 同埋趁自己還後生(算仲有少少青春可以虛耗), 試下D唔同既野麻~~~ 結婚後我要開展新既生活同新既工作, yeah!!!

買到Keroppi結婚公仔啦~~~

之前我係Yahoo Auction搵到有人放對Keroppi結婚公仔上去拍賣, 我第一時間即刻落bid, 並set個最高叫價$500, 諗住如果有人同我爭, 電腦會幫我自動叫價, 唔駛我自己定時定候走去check. 點知無幾耐竟然真係有人出價, 轉眼去到$525. 我覺得唔對路, 以我縱橫拍賣網10年, 由點點紅開始玩起, 我當然唔會咁蠢再叫價落去, 因為我覺得係有人係度將個價bid高.

點知拍賣完佐第二日, 收到賣家個mail話個成功競投者要求取消叫價喎, 個賣家問我有無興趣, 可以平D賣比我, 最後我用$350買佐, 23號果日下午蛇佐落地鐵站交收.

事後洪太同我自己都覺得蠢佐, 你係個blog度大大隻字話高價徵求, 轉眼就有人將對公仔放上Yahoo Auction, 仲要有兩對係網上面拍賣緊添, 然後個價又比人炒起佐. 不過我又覺得, 你唔係個blog咁寫, 又邊有人會放對公仔出黎賣, 同埋價錢既野你情我願, $525我唔繼續落bid爭, $350我先肯買, 無話蝕唔蝕底既, 最重要係而家pipi已經係我手上啦, 哈哈~~

本來對公仔我係打算bid黎做車頭公仔, 但買佐返黎我又改變主意, 因為我點捨得將對pipi放係車頭又沙塵又廢氣整到烏糟晒喎, 所以我決定求其搵對公仔做車頭公仔, 呢對寶貝pipi到時會放係酒樓reception枱.

和宴 -- 貴價韓燒...?

地址: 尖沙咀廣東道100號彩星集團大廈5樓
電話: 3428-3345

20號果日由尖沙咀撲去荃灣傾場地佈置, 由六點半傾到七點半, 之後再由荃灣撲番出尖沙咀, 因為今晚係我地既3月聚會, 地點係我公司附近既和宴, 我地個個上到黎都以為呢度係韓國燒烤, 因為都係有個爐, 自己放D肉入去燒, 唔同既地方係呢度比韓國燒烤貴好多, 一碟豬頸肉約十塊八塊已經要八十幾蚊, 同埋好多牛囉, 不過我同另外兩個friends都唔食牛, 唔知呢度既牛得唔得.

呢度既services係幾好既, 同埋佢會不斷幫你換爐果塊網, 等你唔會越燒越燶. 同埋呢度都真係幾多日本人黎幫襯, 可能呢度真係比較正宗既日本烤肉掛…?

是次每人消費約$150


借用http://www.openrice.com/big5/sr2.htm?shopid=14883 Gourmet KC的照片:

傾場地佈置...

20號放工我同流沙包去佐荃灣傾場地佈置, 其實我地都無咩idea, 所以睇佐佢地D相參考下, 見到邊個backdrop靚就照跟啦, 我地連backdrop都無咩所謂咁, 所以蛋糕枱呀, reception枱呀, 油畫架呀等等就更加無咩要求啦, 好快就傾完, 我地只係傾佐一個鐘左右, 連老細都話我地真係傾得快, 佢試過有pair人一傾傾佐三粒鐘, 淨係話要邊隻顏色既紗做佩襯都要傾半個鐘, 我心諗:駛唔駛呀? 我成日覺得, 果晚既主角只得我(同流沙包…), 其他既野唔需要花咁多錢同精神去佈置同操心囉…

我的超級白痴低能無腦老細

說話我上星期三遞辭職信, 當天我腦細返佐大陸, 於是我將封信放係佢枱面, 然後send個mail話佢知我放佐封resign letter on his desk, 佢mail覆我"Recognized, any particular reason?", 當然我無再覆佢, 我都決定走, 同你講咩理由都嘥氣啦.

今個星期佢返到黎公司, 到下午十二點幾佢臨走先叫我過去傾下, 佢問我係咪決定佐, 我話係, 佢亦無問咩原因, 佢話等遲D請到人你睇下點交接. 然後佢發問第一條低能問題:「你辭職呢單野講佐比邊幾個知呀?」, 挑, 關你X事咩?!! 就算我唔講, 你條粉腸都即刻同我揚晒出去架啦, 舊年係咁, 今年又係咁, 我咪話「幾個囉」. 跟住佢再問第二條超低能問題:「咁上面大陸班人知道未呀?」佢唔問由自可, 佢咁問我真係把幾火. 聽講我上星期三先遞信, 都未講比邊個同事聽, 星期四大陸班人已經打黎問我係咪唔做, 我反問點解佢地咁快會知, 佢地話:「係你老細講架麻, 佢上黎開會」. 條粉腸腦細仲要問我大陸班人知道佐未, 我咪話:「佢地話你講佐比佢地聽呀麻」, 跟住我老細竟然話:「我淨係講佐比Johnny一個人聽咋喎...」, 天呀, 邊有咁Q低能既人架?!

我都無好氣回應佢:「公司邊度會有秘密架...?!」. 唉, 真係要快D離開呢度, 唔想再對住D低能人. 條粉腸佢舊年結婚炸過我, 但今年輪到我結婚, 我完全無派帖無派餅卡比佢.

同埋我終於決定佐揀accounting firm啦, 所以我要推之前應承佐既日本公司啦. 呢份a/c firm既人工比另外果間日本公司少2千蚊一個月呀, 得雙糧無bonus. 全年黎講年薪會少起碼三萬蚊, 不過為佐我既前途, 為佐要成為一個識日文既會計, 第時可以叫價更高, 而家人工低少少, 無所謂啦~~~

麗都總廚 -- OK既

地址: 屯門石排頭徑1號卓爾廣場3樓
電話: 2456 4888

18號係我地過大禮既日子, 不過我同流沙包都唔需要在場, 加上流沙包又有野做, 我又要返學校mid-term, 今日個econ mid-term超難, 死得.

之後就返元朗同阿媽同阿妹去雅麗試衫, 各人都終於揀好晒衫了.

夜晚我地就落佐屯門食飯, 話過完大禮果晚要兩家人一齊食餐飯喎, 我地叫佐個唔知咩套餐, 好鬼多野食, 仲要係有魚翅, 有鮑片, 甜品係燕窩燉蛋喎... 都幾好食.

臺味冰點餐廳 -- 至愛三杯雞肉燥飯

地址: 天水圍嘉湖山莊新北江商場一樓C24號舖
電話: 2445-8577

17號果晚拎完過大禮D野返娘家, 就近近地去新北江商場食飯. 個商場都無咩好食, 於是去番我既至愛, 我好鍾意食呢度既三杯雞肉燥飯架. 不過我見阿媽叫佐, 我就改叫雞翼米線, 當然偷佐阿媽幾隻三杯雞黎食. 唔... 味道無以前咁好食咁喎, 好重酒味.

我個雞翼幾好食, 個米線好大碗, 食唔晒. 流沙包個茄子雞炒飯都好食呀~~~

是次每人消費約$32

 

2007年3月17日(六) -- 拎過大禮D野

聽日係我地過大禮既日子, 今日要去拎過大禮D野返屋企先, 其實過大禮都幾無聊, 男女家各拎一大堆野返屋企, 然後過大禮果日就好似交換禮物咁又拎一大堆野去對方屋企, 認真無謂... 淨係女家回禮都有以下咁多樣野:

大發(呢個飽勁呀, 成個面盆咁大):

鬆糕紅包:

蓮藕(遠睇成隻乳豬咁):

石榴, 四季桔, 扁柏等等:

上頭用品(非過大禮物品):

碗筷(非過大禮物品):

周記避風塘 -- OK啦

地址: 屯門屯盛街屯門市廣場第一期3樓3235號舖
電話: 2628-0363

16號果晚黎呢度食飯, 我地叫佐個二人套餐, 有雲吞雞湯每人一盅, 串燒雞翼兩隻, 叫佐個咩漿爆蝦球同紫羅咩咩雞, 同埋珠珍白飯兩碗. 個湯唔得, 都無火喉既. 果兩個小菜份量較少, 味道OK. 我地仲叫佐個三蛋小蠔, 係鹹蛋皮蛋雞蛋炒蠔仔, 都幾特別.

是次每人消費約$100