新鮮熱辣@墨魚燒賣

2013年9月4日星期三

沖繩七天之旅 Day 1 -- 24 March 2013 (SUN)

2013年3月中去完星馬, 3月尾再去沖繩.

因為早前心情欠佳, 又要應付QP考試, 所以沖繩之旅既BLOG一拖再拖都無mood寫...

今次係繼2012年歐洲之旅後既家族旅行, 可惜今次五缺一, 墨魚妹夫剛剛轉咗新工, 唔係太方便請假.

去沖繩有2間航空公司, 我地穩陣起見都係搭番港龍. 另一條airline既機票係平D, 但成日聽人講會delay, 時間就係金錢嘛, 搏唔過囉...

看全文 >>

2013年9月3日星期二

重要消息~搬家告示~ (已更新: 紫色字為新加入內容; 9月5日再更新[紅色字])

YAHOO BLOG終於要摺!

早幾日得知消息, 晴天PIG PIG, 心情大受影響.

愁都唔係辦法, 即刻諗個BLOG應該搬去邊好.

其實有一刻諗過唔再寫. 不過BLOG係用黎記低我自己發生過所有開心同唔開心既事, 我自己就當係日記咁寫, 所以即使我個BLOG無人會睇, 我都會一直寫落去.

或者你都會關心, 出面仲有邊個BLOG好用, 可以比我搬過去?

有熱心BLOGGER HITOMI就測試過其他BLOG平台, 若有興趣可CLICK呢度去HITOMI既BLOG睇吓.

暫時我決定搬去台灣既天空部落(YAM BLOG), 我既新網址如下:

http://blog.yam.com/chloechingching

有興趣的話可以去我新BLOG看看啊~. (因為我打算由YAHOO BLOG正式搬咗過YAM BLOG之後我先繼續寫新BLOG, 所以大家可能見我好耐都唔UPDATE個YAM BLOG, 但唔表示我會荒廢個YAM BLOG啊~)

另外如果各位BLOG友想將來繼續保持聯絡, 勞煩你稍移玉步去我上面條YAM BLOG LINK留個言比我話我知你既新BLOG地址吖~ YAM BLOG可以用訪客身份留言(無需註冊登入), 同埋都可以用私人回應架~ 因為我未必會再上黎YAHOO BLOG去探大家, 所以即使大家喺自己YAHOO BLOG寫低咗自己既新落腳地, 我都唔會再睇到.

由於死人YAHOO BLOG無啦啦無咗個"關注BLOG友", 所以我頭先專登去睇番自己D舊BLOG, 睇番大家比我既留言去搵番你地, 同埋我都喺大家既BLOG留咗"遺言", 但唔知點解無啦啦留言要驗證碼 (都唔知有無部份"遺言"因為驗證碼入唔啱搞到個留言無咗)... 唔知YAHOO BLOG幾時會連留言都CUT埋.

同埋我應該下星期就會備份YAHOO BLOG, 當你一開始備份, 你個BLOG就會進入唯讀模式, 唔可以再發表文章, 亦唔可以再比BLOG友留言架啦~ 所以大家備份之前要諗清楚呀!!! 換句話說, 當你一開始備份, 就等如將你個BLOG"送死", 唉, 諗落有D傷感添~ 希望將來喺大家既新BLOG度再見啦~~

其實除咗搬去其他BLOG平台之外, 我都有諗過索性買個DOMAIN NAME+租HOSTING, 整番一個完全屬於自己既小天地. 因為每次個BLOG話要摺, 就又要搵地方搬, 都幾煩.

但可惜我係一個科技白痴, 實際上要點整我唔係好知(我已經花咗2日時間上網搵資料, DOMAIN同租HOSTING大致上我都明, 但之後個BLOG應該點整點搞, 點樣喺我買咗既DOMAIN NAME SHOW到我個BLOG內容, 實際上應該點運作etc., 我就唔明勒...)

其實我本身喺BLOGSPOT都有ACCOUNT, 未有YAHOO BLOG之前, 我都喺BLOGSPOT寫BLOG, 後尾先喺BLOGSPOT搬過黎YAHOO BLOG.

本來都無諗住搬番去BLOGSPOT, 因為覺得唔係太好用. 不過安全起見, 好似暫時KEEP住兩頭住家好D, 所以都留低BLOGSPOT條LINK比大家啦, 將來應該會兩邊BLOG同步UPDATE:

http://chloechingching.blogspot.hk/

2013年8月30日星期五

薯仔沙律+芝士焗長通粉 (附食譜)

薯仔沙律

材料:
1.薯仔2個
2.青瓜1條 $2
3.沙律醬適量

步驟:
1.薯仔去皮, 青瓜切片
2.薯仔放入熱水煮至變淋
3.將薯仔壓爛成薯蓉, 加入青瓜片
4.加入鹽調味, 再加入沙律醬拌勻, 即成

芝士焗長通粉

成本: 約$30 (2人份)

材料:
1.長通粉250g $7.5
2.剝殼蝦肉 $20.8
3.洋葱半個 (切條)
4.芝士碎適量

白汁
1.牛油30g
2.麵粉30g
3.牛奶250ml

步驟:
白汁
1.鍋中放牛油, 加入麵粉炒勻
2.逐少加入牛奶拌勻, 加入少許鹽及胡椒粉

1.長通粉煮淋
2.熱鑊下油, 加入洋葱炒香
3.加入蝦略炒, 放少許鹽及胡椒粉
4.加入長通粉, 再加入白汁拌勻
5.將長通粉放入碟中, 灑上芝士碎, 入爐200度焗30分鐘

2013年8月28日星期三

第2次考QP, 成績公佈

話說6月尾考完兩科QP, 上星期公佈成績, 結果係:

MD (taxation): 1 take pass
MC (auditing): 第2次肥

我以前有做過tax, 所以對MD呢科都有D信心, 同埋人地話MD係咁多科之中最易既一科, 所以我都唔太擔心呢科, 驚只係驚自己time management做得唔好, 做唔晒D題目 (我有題成20分無做到呀~~).

至於MC auditing, 我完全無信心. 一來我無做過audit, 二來我一向唔識吹水... 你一大堆數字叫我計數, 我唔驚. 但你比個case我叫我作野, 係我既弱項.

MC呢科, 有朋友已經借佢補習既NOTES比我溫 (我窮, 到而家為止都無去補習, 好彩有好朋友借我notes), 又有補習社既MOCK卷, 但我真係溫極都無把握. 有時連題目問咩, 到底佢想要咩, 我都唔知...

我身邊一同考MC既2個朋友都肥咗, MC既pass rate好似越黎越低, 今次既pass rate好似係40%. 其實今次唔合格我無唔開心, 因為都預咗, 我只係唔知應該點樣溫呢一科, 如上所述, 我連題目想要咩答案都唔知, 已經死咗一半...

黎緊12月, 我應該只會報番MC呢科, 一次過take兩科我真係應付唔到...

2013年8月26日星期一

馬蹄荔枝湯 (附食譜)

食譜參考: 港式滋潤糖水王偉誠著

成本: 約$22 (兩大碗水)

材料:
1.去皮馬蹄70g
2.新鮮荔枝10粒
3.砂糖少許

呢度27粒糯米糍, 其實大約街價應該幾錢左右? 硬係覺得好似比人呃咗咁...:

步驟:
1.荔枝去殼去核
2.清水1000cc倒入鍋中, 放入馬蹄, 荔枝肉及砂糖, 小火煮半小時, 即成

檢討:
1.呢個糖水無咩特別, 無下次

2013年8月23日星期五

HELLO KITTY@朗豪坊

8月14日, 本來流沙包請咗假, 我地原本一朝早可以去街街.

點知... 八號風球, 頂!

人地要返工果陣, 又唔見D八號風球會喺日間掛咁耐可以比我偷到一日假. (angry)

到流沙包同我都齊齊放假果日先黎掛八號風球. (繼續我D死人性格, 賴得就賴 (laughing)

)

結果果日喺屋企呆咗成朝, 無無聊聊唯有整吓甜品, 又會無啦啦整親手指搞到D血流到巴巴聲.

最後等落咗八號先出街, 勉為其難去咗旺角行.

雖然我唔係HELLO KITTY粉絲, 不過既然黎到旺角就去朗豪坊睇吓~

2013年8月21日星期三

竹蔗茅根水 (附食譜)

食譜參考: 港式滋潤糖水王偉誠著

材料:
1.竹蔗200g
2.茅根50g
3.馬蹄100g
4.紅蘿蔔1條
5.冰糖70g

步驟:
1.竹蔗洗淨, 切片
2.茅根洗淨
3.紅蘿蔔, 馬蹄切細塊
4.取鍋放1500cc清水, 大火煮開後, 放入竹蔗, 茅根, 馬蹄, 紅蘿蔔以小火煮約30分鐘
5.放冰糖, 待冰糖溶化後即成

2013年8月20日星期二

我終於終於終於都考到車牌啦~ 哈哈哈~~

我唔記得有無喺BLOG講過我學緊車.

我考咗3次先合格.

我係駕駛學院學的, 人地話合格率高, 好多人都一TAKE PASS. 但我係例外, 仲要考足三次先合格.

為咗考呢個車牌, 學費+路票+租車費+補鐘錢, 差唔多用咗兩萬蚊. (駕駛學院十五堂學費+學牌+租車+路票已經萬一蚊; 唔合格一次, 補鐘+路票+租車又三千幾)

第一次考係今年既年初五, 仲諗住新正頭, 無咩車喺街, 應該唔難. 不過我唔知原來考朝早的話, 學神唔可以揸一轉出街練習(禁區時間), 所以喺某一個位, 入咗個左彎之後有架死車係路邊, 我發瘟處理不當, 好近架死車先扭軚出(其實我一直扭緊, 不過扭極都未夠), 結果比考官踩停咗, 即肥啦... (第一次考我行水邊圍村)

第二次係今年五月, 下午兩點考宏業東街, 我行緊一條雙程路, 我喺兩邊有死車既情況下見到有對頭車(仲要係貨櫃/拖頭呢D大車), 於是咪停車, 比對頭車過咗之後先再開車囉. 點知當我停第三次既時候(當然唔係連續停啦, 係三個唔同位置, 但情況都係兩邊泊晒死車+迎面有對頭車), 考官出聲話"同學你做咩停咁多次呀? 你停第三次啦喎!". 我果刻呆咗, 我唔明點解咁既情況唔應該停車. 結果當然係又肥啦!

第三次考, 係尋日. 考之前幾日我已經開始坐立不安, 連飯都食唔落(星期日晚同考果日既朝早都只係食咗幾塊消化餅+豆漿). 我考下午兩點廿五分, 其實我考之前都有揸一轉出街, 但係仍然揸得超核突. 到最後我竟然揸到喊... (無鬼用!) 喊唔係因為比師傅鬧到喊, 而係我忟自己, 點解揸咗咁多次, 師傅又講過九萬幾次, 但有D野我依然做漏. 加上有一個位, 我判斷錯咗, 搞到後面架巴士差D撞埋黎, 果吓我突然覺得自己判斷力咁弱, 根本係唔適合揸車, 諗吓諗吓就喊咗出黎了...

到真正考果陣, 我諗過"反正自己唔係揸車既材料, 今次考唔到的話, 或者就算數了..." 反而又好似豁咗出去咁. 到考官上車, 我專心開車, 當喺路口位考官話轉左既時候, 我個心即刻定咗一半, 因為轉左即表示, 一係考水邊圍村, 一係考元朗村. 避開了最難的宏業東街~

到下一個路口, 考官話直去, 我果刻喺內心大叫咗聲"YEAH!!!", 直去即係考最容易最短路程既元朗村, 我心諗"YEAH!, 終於到我考元朗村了!", 當時個心又定咗一大半. 只要唔犯上嚴重錯誤, 無理由唔合格的.

結果, 總算係無驚無險咁返到學院, 我落車果刻舒咗口氣, 心諗"今次應該掂啦掛?". 但入去等成績果陣, 仲驚過未考之前, 個心勁跳, 雙手勁震, 因為唔知會否遇上地獄考官.

到最後拎到成績喺手, 我仲懷疑自己睇錯, 唔敢相信自己能夠合格. 終於PASS, 我真係開心到喊呀! 就算知道PASS咗之後, 我對手仲繼續喺度震緊, 可想而知我心情有幾咁激動.

總結, 第一次考有14個剔; 第二次考有16個剔; 第三次考有7個剔 (我明明係自動波, 根本唔駛入咩1波2波, 唔知點解考官會喺"44. 未能選用適當波檔"果格剔咗, 然後佢圈住個剔寫番"DELETED"再喺隔離簽名. 佢又唔係剔錯咗上一格/下一格喎, 因為果個錯剔既上幾格都下幾格佢都無剔到. 人地話考官係唔係都會求其搵D野剔吓你, 我本來都唔信, 但而家我開始信囉, 哈哈)

2013年8月19日星期一

我係小忌廉@藍灣廣場

小忌廉, 可以講係我兒時第一個偶像, 所以得知小西灣既藍灣廣場有小忌廉30週年既活動, 我即使住喺元朗都一定要入去睇吓.

我咁大個女, 其實連柴灣都未踏足過, 更加唔好話小西灣... (就正如住港島既人話自己從來未入過元朗一樣啫), 由元朗出發先搭968去到灣仔, 再搭788城巴去到總站落車, 估唔到又唔係想像中咁遠.

去到灣仔, 先喺稅局隔離既Delifrance食個悠閒早餐: