7月1日, 出咗尖沙咀. 我同流沙包先去咗Sheraton Hotel既The Cafe食lunch buffet. 其實本來唔係想黎呢度, 因為之前tea buffet我地已經黎過. 不過我地今朝先即興想話食lunch buffet, 打電話去其他酒店問已經full booking, 唯獨Sheraton仲有位, 所以就黎呢度.
食飽飽後去咗THE ONE睇福山雅治真夏之方程式. 睇完戲之後, 無啦啦見到姆明, 仲要無人排隊, 即刻埋去合照~
離開尖沙咀, 我地去咗荃灣, 因為一田新開張, 我想去行吓.
呢隻熊本熊, 我上次去九州既時候佢仲未"出世", 佢肥嘟嘟傻吓傻吓個樣都幾鬼可愛, 又走埋去合照~
講開一田, 不得不佩服佢地既CEO莊偉忠, 睇完蘋果日報有關佢既訪問, 我真心好想加入佢地既團隊~ 呢D先係做實事既公司嘛~
喺訪問裏面, 有好多金句, 令我好有同感, 例如:
「明明返工時間係9點，個會就8點45分開，（公司）仲唔係想攞人着數？個會又無內容，只係例牌講下手頭上有乜工作咋喎。」
開早會係日本公司最最最鍾意做既野, 我都做過唔少公司係返9點, 但就要人8點半返到公司, 講吓大家有咩follow緊... 最搞笑係有時成間公司數埋其實唔夠十個人, 平時同事喺身邊講電話/食飯講開, 根本大家已經知大家做緊乜follow緊咩野, 我唔明點解仲要"煞有介事"開埋D無生產能力既會.
「好簡單，一般公司職員每日花最多時間去做乜呢？檢討啦、俾人鬧啦、互相指責啦、發自己脾氣啦、去開會討論一啲根本無人控制到嘅嘢啦……每日就花40%、50%精力，去搞呢啲不事生產嘅嘢，咁生產力點會高？」
日本公司亦都勁勁勁鍾意開會, 做presentation, 花時間做埋D好靚既chart呀, powerpoint呀, 圖表呀. 我試過做一間日本公司, 每個月有一日係"開會日", 全公司supervisor職級以上既同事果日就係全日喺會議室開議, 同事輪流報告呢個月實績係點, 下個月既forecast又係點. 基本上呢一日係完全做唔到野, 開會前又要花時間做定powerpoint, 無無謂謂, 開會時其實只係呆坐囉...
我亦做過一間日本公司, 個日本人上司有一日專登叫全世界開會, 就係為咗"教導"大家做excel時個table D線應該點樣, 幾時要加線, 幾時要隱藏條線... holy cow! 我日日OT到八, 九點都做唔晒D野, 你仲花時間同我地講個table既款式要點, 痴痴地...
銀鑛灣酒店做團購, 我地揀咗平日去, 2日1夜包晚餐及自助早餐, 2位收$899, 另外check-in時要再比$158服務費.
http://hk.deals.yahoo.com/hong-kong/offer/history/82074
我地7月9日~10日去住咗兩日. 7月9日我地先入咗梅窩食lunch, 去咗La Pizzeria食飯, 叫咗個pizza同埋mini ribs.
pizza個底好硬, 好難用刀叉切細份黎食, 所以索性用手. 個ribs我覺得麻麻地囉, 唔多入味. 杯mango shake好濃, 如果可以再凍D就好.
2點鬆D我地去到酒店check-in, 佢問我地要唔要海景房, 加多$150, 話可以睇到日出喎... 最後我地都加咗錢, 佢安排我地住喺舊翼. (新翼果邊好似主要比咗班俄羅斯學生住)
酒店房望出去 (未到黃昏, 只係酒店房用茶色玻璃):
入到房, 搵黎搵去都見唔到個電視遙控器, 諗住打電話落front desk, 佢個"reception button"又打極唔通, 最後要上網搵番個酒店電話打.
我地喺酒店攤咗陣, 就出去行吓. 果陣四點左右, 水退, 好多人喺沙灘摸蜆.
跟住我地就去咗行山, 三十幾度行真係好攞命, 我已經擔晒傘, 但真係勁熱, 要買雪條, 跟住又要買汽水飲.
銀礦灣瀑布, 我自己論論盡盡, 擦損左個膝頭哥囉, 即刻爆晒缸.
銀礦洞, 個洞就無咩特別, 但上到黎個view唔錯.
我地趕住天黑前返到酒店, 原來傍晚時份有好多牛牛會聚集喺沙灘架, 佢地會好悠閒咁喺酒店出面行, 好得意架~
行完山就返酒店食dinner, 個dinner有餐湯, 沙律, 主菜同飲品, 唔好講味道啦, 但求填飽肚算啦~
食完飯返房沖涼, 無浴缸, 等我仲專登帶咗包浴鹽諗住浸吓添.
同埋沖涼時先發現上手住客既沖涼野仲喺個架上面囉, 竟然無清理到!!! 嘩, 好嗱渣囉!!!!
洗面台上面又發現有上手剩低既頭髮, 我真係對呢間酒店打晒折扣囉...
同埋張雙人床好細吓, 仲細過我屋企張床, 同埋D被鋪好鞋, 個枕頭又超淋, 墊兩個枕頭都仲係唔夠, 訓得幾辛苦...
7月7日, 去咗三聖同流沙包既中大同學一齊食海鮮. 佢同學之中識人可以直接同艇家攞海鮮, 然後叫餐廳加工.
我地自己帶咗幾支白酒去:
聽講果度既燒鵝都好出名, 我地叫咗半隻:
芝士焗龍蝦, 好重芝士味:
辣酒煮花螺, 我地叫咗小辣, 所以唔係好夠味:
酥炸生蠔:
椒鹽鮑魚, 第一次咁樣食法:
呢餐埋單每人$320, 其實仲可以平D, 因為海鮮本來預咗10個人, 但最後有人病咗黎唔到, 否則呢餐每人應該唔駛$300~~
食譜參考: 輕食小茶餅 黃盈瑩著
成本: $16 (約12個)
材料:
麵糊
1.麵粉70g $0.91
2.泡打粉4g $0.24
3.可可粉5g $0.75
4.無鹽牛油45g $3.51
5.砂糖70g $0.74
6.雞蛋1隻 $1.2
7.牛奶70g $1.04
8.雲呢嗱香油少許
朱古力漿
1.魚膠片5g $1.35
2.砂糖50g $0.53
3.水50g
4.可可粉25g $3.75
5.淡忌廉40g $1.6
步驟:
1.粉類先過篩
2.牛油+砂糖用電動打蛋機打至軟滑
3.分數次加入雞蛋, 用電動打蛋機攪至混合
4.依次加入麵粉, 牛奶及雲呢嗱香油用膠刮拌勻
5.將麵糊分成兩份, 其中一份加入可可粉用膠刮拌勻
6.將1小匙純色麵糊放入模內, 另舀1小匙朱古力麵糊放在模側, 重覆以上動作
7.入爐180度焗15分鐘
朱古力漿做法
1.魚膠片先用凍水軟化, 再座熱水使其溶化
2.將水+砂糖+可可粉+淡忌廉置於鍋內煮熱, 再倒入魚膠溶液攪勻, 熄火
3.將朱古力漿倒入小蛋糕中央位置, 完成
檢討:
1.老公勁讚, 差唔多想一次過食晒佢咁濟~~ 我自己都好滿意
2.不過個質地有些怪, 焗完出黎似蒸蛋糕多過焗蛋糕
