流沙包生日 -- 山頂蠟像館+灣仔食素

6月15日, 係流沙包既生日.

本來都有諗過去海洋公園, 但天氣實在太差了, 所以揀咗同樣係生日可以免費入場既山頂蠟像館.

行完成個蠟像館, 我既評價係, 好彩其中一個人係免費入場, 否則我覺得真係呻笨.

入場費$180, 成個館唔駛一粒鐘就行得晒.

最近入口既果堆"中港台"明星, 我自己係香港人都吸引唔到我停留腳步囉... 我覺得"選角"方面真係有D問題, 有D"明星", 我係外國人既話真係識你mouse.




行完蠟像館, 我地就出咗山頂行吓, 果日既天氣真係好差, 望落維港, 一D景色都睇唔到.

 

我影完之後先見到寫住"請勿觸摸"...:


離開山頂, 我地就去咗灣仔食素. 每年流沙包既生日我地都食素, 因為6月15日係世界素食日之餘, 流沙包都間唔中會食吓素, 只係我呢D食肉獸唔制. 但流沙包生日, 佢話晒事, 所以我果日都會食素同佢慶祝.

今年我揀咗麗姐廚房.

呢個流沙餃, 裏面係番茄同薯仔, 都幾特別:


呢個"三杯雞", 完全唔係三杯雞個醬汁味道, 中伏:


呢個係炸南瓜芝士球, 我覺得唔係太夠熱, 唔知係咪一早整定, 因為我地落單無幾耐就上碟, 勁快:


呢個斑蘭包, 老公勁讚好食:

 

埋單約三百幾蚊. 本來流沙包生日應該係我埋單找數, 但原來果度無得碌卡 只收現金, 我又帶唔夠錢, 所以最後都要生日既流沙包自己埋單, SORRY~~ :P

檸檬小蛋糕

食譜參考: 輕食小茶餅 黃盈瑩著

成本: $12 (約8個)

材料:
1.麵粉85g $1.1
2.泡打粉3g $0.2
3.無鹽牛油溶液30g $2.34
4.雞蛋2隻 $2.4
5.砂糖80g $0.84
6.檸檬汁15g $3
7.檸檬皮1個
8.淡忌廉40g $1.6



步驟:
1.粉類先過篩
2.雞蛋+砂糖用電動打蛋機打起
3.加入淡忌廉, 檸檬汁及檸檬皮以膠刮拌勻
4.篩入粉類拌勻, 再加入牛油溶液攪勻

5.將麵糊倒入模內至八成滿

6.入爐180度焗20分鐘

 

檢討:
1.老公話檸檬味唔太重, 下次可以再落多D檸檬汁同檸檬皮

rubber duck

2013年5月28日, 我同流沙包去咗睇黃鴨鴨.

因為知假日會比較多人, 所以我地就揀咗平日去.

 

睇完鴨, 去咗好耐無食既Ruby Tuesday食個tea, 好味道~

我呢D新界人, 平時出入梗會經過汀九橋, 鴨鴨仲喺青衣船塢果陣, 有機會拍低佢既相.

Sunday brunch@Sorriso

2013年5月19日, 同咗個friend去iSquare 29樓既Sorriso食Sunday brunch.

果度既view真係好好, $488應該有唔少去咗個view果度.

食物種類唔算多, 但質素唔錯, 個精選意粉好好食, 非常之飽~~

個brunch係11:30am~2:30pm, 但係過咗2:30pm都唔會借頭借路趕你走, 靜靜地喺果度渡過一個悠閒既週末真係唔錯.

順帶一提, 果度既waiter服務好好, 有禮貌, 同埋幾靚仔架, 哈哈~~

 

 

2013年上半年回顧 (2)

2013年上半年無工作, 亦無搵工住. 但都唔想自己咁hea, 呢半年期間, 我為6月考既2科QP做準備; 有整吓餅煮吓飯仔; 亦都走咗去考CRE, 即公務員綜合考試.

其實我唔知自己可以搵D咩野工, 我只係知自己唔想再做CPA firm, 因為我唔鍾意應酬, 唔鍾意見客, 唔鍾意formal dressing咁返工. 我想搵commercial黎做, 因為當我考晒牌之後, 我係想入番日本公司做會計, 所以而家我想做commercial, 唔想再做firm.

另外我亦都去咗考CRE, 至少攞到做公務員既資格, 因為我其實對taxation好有興趣, 如果可以既話, 我好希望入到稅局做架~ 雖然我唔一定要做公務員, 但都諗住考咗個CRE先, 叫做多張入場券可以多個選擇掛??

講番CRE, 由於係6月頭考試, 所以其實都無咩時間準備 (因為6月尾就係QP考試), 我只係睇過一本坊間既基本法天書. 至於英文, 真係無溫過又無睇過天書.

結果出黎既成績係喜出望外, 因為個Aptitude test其實我係唔夠時間做, 有一半我係亂填答案, 我都好驚會fail, 結果pass到, 勁開心.

另外英文我都擔心, 唔係擔心會fail, 係擔心攞唔到最高級別既Level 2, 因為我A-Level既英文攞D, 已經等同於CRE既Level 1, 如果喺CRE攞番Level 1, 咪即係嘥鬼氣? 我考CRE既目的係要攞Level 2, 因為有唔少公務員職位都要求Level 2, 得Level 1係無用. 我做咗多年日本公司, 都擔心英文會生疏, 不過自問除咗聽同講之外, 對英文grammar依然有信心, 考完之後都相信自己應該掂, 否則要等半年再考過.

因為我A-Level既中文攞B, 等同於CRE既Level 2, 所以唔需要考CRE既中文:

 

考試前煮飯仔

6月尾考QP之前, 我有一段時間都得閒煮吓飯仔, 到而家先有時間整理番D相出黎.

其中一樣"蒜蓉包中蝦", 我係跟都市閒情學既, 真係幾好食架~

材料:
1.法包(我無買法包, 求其用咗方包就算, 但都一樣好食)
2.中蝦
3.蒜蓉
4.洋葱(切絲)
5.清雞湯
6.糖
7.牛油 20~30g

成本: $55

步驟:
1.中蝦剪走D尖位, 挑走黑腸
2.蝦身剪一剪開邊, 方便入味, 落鑊前用少量生粉撈一撈, 落鑊煎果陣便會少D水份彈出黎
3.油下鑊+1茶匙蒜蓉先爆香, 然後落方包兜勻, 盛起
4.油下鑊, 落中蝦以中猛火剪兩邊至七成熟後, 再下洋葱兜一兜, 盛起
5.蒜蓉下鑊爆香, 再將剛才盛起的中蝦及洋葱落鑊兜勻
6.將清雞湯+糖+牛油落鑊, 煮至杰身, 盛起放在方包上, 完成

是日晚餐 約$83:

芝士焗西蘭花 $8:

煎蠔餅, 因為屋企無蕃薯粉, 所以完全唔似樣 $20:

第二餐既魚香茄子, 粟米蓉翠肉瓜, 煎雞翼:

仲有呢餐, 前一晚既炒飯食唔晒, 於是第二晚就將個炒飯變做蛋包飯, 加個煙肉焗薯蓉, 咁又一餐:

 

2013年上半年回顧...

大家見我呢排放咁多阿茂整餅相, 可能都估到其實我而家係無做野.

話說我2012年中離開咗某間PK日本公司之後, 我就暫時無打算再做日本公司. 2012年5月尾, 我去咗上環某間CPA firm(可參考我一年前既呢篇blog), 點知原來係惡夢既開始...

唔做日本公司既原因係我想考QP成為CPA, 成為CPA其中一個必要條件係要喺香港會計師公會所認可既僱主/supervisor做3年 攞相關經驗. 如果我繼續喺典型日本公司做, 係唔會有人幫我簽到呢D相關經驗, 因為果D日本公司, 一係就你自己做晒full set, 對上已經係一個唔識會計既日本人GM; 一係就對上既會計部上司係日本人, 唔係HKICPA既人, 所以唔會幫你簽到相關經驗.

於是我唯有搵CPA firm諗住做audit (其實我有搵過commercial, 只不過無人請. 要攞相關經驗, 喺CPA firm做audit係比較簡單直接既途徑), 人工無咗一大截之餘, 仲要預咗由低做起. 但有D野原來即使你自己唔介意, 都會被人嫌棄囉...

話說我搵果間CPA firm (當然係蚊型果D. 我都有搵過sizable少少既, 但唔知係咪expected salary寫得太高? 又係無人請), 我明明apply做audit, 佢見工時話做audit都要識吓com sec架, 昆我叫我學吓com sec先 (我根本有com sec經驗, 喺你間蚊型公司仲可以學到乜?). 我當初以為係又做audit又做com sec, 咁我咪應承咗囉.

入到公司, 先發覺原來佢本身做開com sec既同事走晒, 無晒人負責com sec, 老細見我有com sec經驗, 就要我落戶做com sec, 一D audit野都無得做. 佢氹住我話請到com sec人之後就會比我轉做audit.

後尾佢係請到人返黎, 但佢請咗一個零com sec經驗既人返黎囉, 仲要旨意我去教佢! 喂你比我個爛鬼title都只係assistant咋喎, 但又要我教呢個完全無com sec經驗既人?! 好, 都算, 我照教.

後尾當我教咗大部份既基本功之後, 公司又話11月既時候, audit同事要趕tax deadline, 即使比我過去audit都無人教我野, 叫我再等吓, 好, 我再等!

等佢地過晒11月deadline, 公司又話, 都過咗deadline, audit同事自己都無咩野做, 比我過到去audit都唔會有野做喎... (唓, 乜都係你講晒啦!!)

到咗2012年12月尾, 公司既兩個老細終於鬧翻, 玩分家拆夥, 請我返黎既大老細拍拍屁股就走咗; 要咗上環office既細老闆就叫咗佢老婆出黎負責做com sec, 所以我既利用價值到此完結, 佢地諗住要炒我. 喺果個時候公司先至話, 我咁既人工如果唔肯繼續幫佢做com sec, 只係做audit的話, 係overpaid, 而且audit根本夠晒人用, 無需要我過去audit喎. 其實講到尾, 佢地當初請我只係諗住我幫佢地頂com sec啫, 根本無心比我做audit, 想過橋抽板, 我而家諗番先知自己死蠢, 比佢地用藉口一拖再拖都唔發覺佢地根本唔會調我過去做audit囉!!!

所以2013年開始, 我就失業啦. 無做野之後, 自己諗唔通, 覺得自己即使唔介意人工低, 又要由低做起, 忙果排日日OT到夜晚11點無補水, 我都無怨過一句. 過probation果陣, 公司仲話我表現好好, 加咗二千蚊人工. 但結果到頭來係比人用完即棄. 加上覺得自己咁委屈都唔知為乜, 唔知自己點解要做會計, 唔知自己點解咁執著要考CPA, 又唔知自己將來可以點, 自己洗濕咗個頭入咗行, 但又高不成低不就都唔知可以做D咩野工作, 自己年紀又已經唔輕, 諗諗吓自己鑽咗牛角尖... 結果患上咗抑鬱症, 要睇醫生食藥...

當時2013年初, 諗住6月要考兩科QP, 加上抑鬱症既影響, 當時完全唔想見人, 所以就諗住匿喺屋企專心溫書考埋個試先搵工. 之後自己慢慢諗通咗, 都無再覆診食藥. 但到咗2013年4月又發生咗一件事, 令到我好大打擊, 完全係崩潰想自殺咁濟(唔關抑鬱症事, 4月時呢一件事既發生, 即使我本身無情緒病, 都一樣會令我崩潰自殺).  

就係咁, 2013年既上半年, 我係喺低潮裏面渡過, 試過日日以淚洗臉再去到欲哭無淚... 如果我唔講出黎, 可能大家都以為我日日過緊闊太生活, 以為我好開心咁日日整餅行街間中又去吓旅行咁.

係, 我係好感恩, 至少我無經濟負擔, 即使唔做野老公都養得起我; 自己父母既積蓄比我自己仲多, 即使暫時無家用比到佢地, 都唔會有經濟困難出現. 反而自己內疚既係, 自己無做野+情緒病既期間, 要父母擔心, 墨魚媽希望我出外散散心, 仲比錢請我一齊去星馬同日本旅行; 同兩老出街食飯, 我想比錢埋單, 佢地反而爭住埋單唔要我出錢, 真係慚愧... 我幾廿歳人仲要父母擔心, 唉...

其實我知道自己係太執著, 太完美主義, 對自己同對事要求太高 (試過有老細同我講, 叫我唔駛吓吓做足100分, 叫我做到70分就算), 所以好多時自己有野一諗唔通, 就會好唔開心情緒好低落, 長期處於咁既狀態, 終於得出個情緒病.

我而家失業放假期間, 想盡量學會凡事睇開D, 唔好成日令自己咁忟憎. 但有時我覺得性格既野真係好難改. 有時明明同自己講唔好咁咁咁, 但內心又好似有第二把聲同自己講"如果真係咁咁咁, 你會好辛苦, 因為呢個根本唔係你自己黎", 所以我真係唔知可以點做...