元朗天后誕

2013年5月2日, 係元朗天后誕. 我住喺元朗咁耐, 從來都無機會睇過天后誕巡遊, 因為天后誕都係平日.

今年天后誕, 我無返工, 咁啱下午約咗墨魚媽去食lunch, 落街行去餐廳段路, 要經過巡遊路線, 所以今年就有機會欣賞到天后誕巡遊啦~~

其實我諗深一層, 日本果D乜祭物祭, 每年都吸引到咁多外國遊客專登去親身感受; 咁喺香港呢類既乜乜誕巡遊或者咩太平清醮, 可唔可能做到人地日本咁, 可以令外國遊客"專登"黎睇呢?? 唔知香港政府對外國係點樣宣傳呢類活動既呢?

Madeleine 貝殼蛋糕

食譜來源: 參考幾個食譜而成

成本: 約$12 (約10件)

材料:
1.雞蛋2隻 $2.4
2.白糖60g $0.63
3.檸檬皮1個 $3
4.檸檬汁1茶匙
5.低筋麵粉80g $1.12
6.泡打粉1茶匙 $0.2
7.牛油溶液60g $4.68



步驟:
1.粉類先過篩
2.模具抹油上粉, 放入雪櫃雪約10分鐘

3.用電動打蛋器以高速打起雞蛋
4.分三次加入白糖, 打至企身
5.加入檸檬皮和檸檬汁混合
6.加入低筋麵粉和泡打粉, 以膠刮拌勻

7.加入牛油以膠刮拌勻, 將面糊放入雪櫃雪30分鐘

8.將麵糊倒入模具約七成滿, 入爐180度焗10~15分鐘

 

檢討:
1.其實我唔知點解麵糊要放入雪櫃雪, 雪完之後個麵糊變杰, 好難"筆"入個模囉…

workshop都可以認識到新朋友

我舊年12月先第一次考QP, exam之前要上兩堂朝九晚五既workshop, workshop既形式係每班有四組人, 每組人有六位成員, 大家就case study做group discussion, 跟住做吓presentation或者答吓問題咁.

我果組既六位成員, 第一次workshop已經交換晒電話開咗個whatsapp group, 但其實組員之間來自五湖四海, 各有不同, 有D明知做唔到朋友 (例如有個組員上堂遲大到, 花晒濃粧勁誇假眼睫毛咁黎上堂, 文具唔帶筆記簿唔帶, 問人借筆借紙, 我覺得幾經典囉...), 所以喺完咗exam之後我都無再keep佢地電話, 亦都退出咗個group. 唯獨是仲keep到其中一個組員仲有聯絡.

喺考完試之後, 佢會約我食吓飯, 出到黎天南地北乜都講一餐; 間唔中會keep住whatsapp交換吓大家考試考成點咁.

其實大家萍水相逢, 只係上workshop見過兩次, 咁都可以keep到contact, 做到朋友, 我覺得幾難得. 因為之後第二科既workshop, 大家組員真係上完兩堂就各自散, 電話都無交換到.

上次食飯我地去咗牛角食燒肉, 之後去咗許留山食甜品~

皇仁書院舊生會食飯

2013年4月7日, 係我同流沙包擺酒結婚週年紀念, 由於已經係第6年, 聘珍樓當年送既週年紀念飯已經無得再食. 不過今年流沙包佢同班碩士同學咁啱喺果日gathering, 於是我就跟埋一齊去喇.

有人話果度食飯要皇仁舊生打去book先至book到; 亦有人話唔駛講出舊生個名都照樣book到, 都唔知孰真孰假. 不過喺佢地既中大同學當中有人係皇仁舊生, book枱呢個任務當然落喺佢身上, 哈哈.

我地當晚試咗必食既桂花蠔同杏汁豬肺湯, 真係好好味. 其他如紅酒炆牛尾都勁好味~

(當日我唔知個電話鏡頭有手指印, 所以搞到影出黎D相全部都矇矇地...)

老公煮飯

前排我要應付六月尾考既兩科QP考試, 無整餅之餘, 仲完全無煮飯無做家務. 反而係流沙包佢調番轉煮飯比我食.

呢餐係我某星期六出去上完朝九晚五既QP workshop, 返到屋企就有得食:

呢餐係我同流沙包兩個人去打完壁球, 再去街市買餸煮飯仔 (當然係流沙包下廚):



仲有呢兩餐, 都係一齊去街市買餸, 再由流沙包下廚: