2012年西歐六國十天之旅 -- Day 5 (part 1: 威尼斯)

2012年5月17日, 今日會去威尼斯. 記得上次跟勝景遊(詳情呢度), 我地係坐小船(好似係包船), 基本上成架船只係得我地團人, 所以我地可以係船上走黎走去周圍影相. 但今次跟美麗華黎就搭呢D大船, 太遲上船差D連位都無得坐咁濟...

黎到威尼斯, 天氣好好, 人亦好多.

今日既lunch:

2012年西歐六國十天之旅 -- Day 4 (part 2)

食完飯, 我地就出發去比薩斜塔, 呢個係自費行程, 每人要比EURO30.

要去比薩斜塔, 一定要坐呢D公共巴士喎:

落咗車, 要行一段路先見到比薩斜塔, 而沿途有好多賣手信既攤檔同舖頭, 可惜我地跟團黎, 無時間慢慢睇啦...

終於見到比薩斜塔啦, 呢度都幾鬼靚架喎~ 領隊話就算你肯比錢都上唔到斜塔架喎, 因為有人數限制, 而D鬼佬佢地係一早就黎排隊, 所以輪唔到你地上去架啦喎.

離開比薩斜塔, 我地就返酒店. 最最估唔到既係, 竟然喺公路上壞車... 我去咁多次旅行都係第一次遇上壞車. 搞咗成兩粒鐘, 終於有第二架巴士黎接我地, 明明應該八點可以返到酒店, 結果十點幾先返到去. (小插曲就係, 大家喺公路上呆等兩粒鐘, 生理方面需要解決的話, 咪要回歸大自然囉!!! 激死人啦!!)

今晚喺酒店食晚餐, 攰到食咩都無味啦...

 

2012年西歐六國十天之旅 -- Day 4 (part 1)

2012年5月16日, 行程第四天, 今日仍然喺意大利.

酒店既早餐, 完全唔吸引:

我地尋晚住既酒店:

由酒店北上佛羅倫斯途中, 喺車上睇到所謂既"天空之城", 如果跟東瀛遊黎, 行程就會黎呢度.

中途休息站, 裏面多數都係賣意大利粉, 橄欖油, 黑醋, 朱古力之類.

今日第一站, 黎到佛羅倫斯, 參觀米高安哲奴廣場, 除咗有複製既大衛像之外, 仲可以俯瞰聖母之花大教堂, 安奴河, 聖十字教堂喎...

領隊話由於泊車時間有限制, 呢度只可以逗留二十分鐘, 我地影得相黎都無時間睇吓D小攤檔...

跟住我地去食lunch, 今餐係意大利海鮮意粉, 正宗薄餅及包餐酒一杯喎. 今餐最值得讚既係呢間餐廳有免費wifi可以上到網架, 係咁多日以黎第一次有免費wifi用(即使住既酒店都無免費wifi囉...),  D後生團友即刻拎部手機出黎撳撳撳.

越黎越唔好睇既PIP; 越黎越精彩既三角關係 (我講緊個劇團呀~)

有睇開我個blog既朋友, 都知我一向鍾意睇舞台劇. 6月份睇咗三套舞台劇, 分別係三角關係既"勁金歌曲"同埋"快樂無罪慶回歸2012"; 另外睇咗PIP既"硬膠先生"(詹瑞文主演).

先講硬膠先生, 我以前都好鍾意睇詹瑞文, 每個show幾乎都會捧場. 但係近年我開始覺得詹sir既show越黎越唔好睇, 一來係劇本唔好(因為無咗林奕華??), 二來係我開始覺得佢做黎做去都係果三幅被. 就以今次硬膠先生為例, 我估唔到佢部份既內容竟然係翻炒多年前既演出(包括NL, 小喇叭, 慘不忍島, 扮米奇, I拂you等等), 無驚喜之餘, 我真係有D失望. 我諗黎緊詹sir既show我未必會再捧場架啦... 

講完PIP, 我想講我而家最最鍾意既劇團"三角關係", 其實我係2010年先開始睇呢個劇團既演出, 一睇之下, 即刻愛上. 或者咁講, 其實我係鍾意咗佢既骨幹演員--徐羨曾. 每次睇佢地既show, 我都感受到阿徐喺台上既落力演出+熱情+感染力, 以我都一把年紀, 以為自己唔會再鍾意D咩偶像, 但係估唔到自己會鍾意咗一個舞台劇演員.

6月16日, 三角關係既勁金歌曲喺元朗劇院上演, 我當然去捧場啦, 我果日睇日場, 睇完show之後去咗唱K食飯, 11點幾行返屋企途中經過元朗劇院, 見到有班人喺劇院出面, 我就知應該係工作人員等緊車離開, 於是我即刻走埋去, 鼓起勇氣問阿徐可唔可以同我影張相(最衰果陣已經十一點幾, 又無化妝個樣鬼咁殘又滿面油光, 唉...), 順便讚佢喺個show唱得好好, 喺同佢講野既期間, 我個心跳得勁快, 估唔到自己一把年紀都仲可以搵番呢D感覺, 哈哈哈~

到6月30日, 係快樂無罪慶回歸, 呢個show真係精彩絕倫, 如果100係滿分, 我會比200分~ 從來未試過睇得咁開心, 你試過睇舞台劇睇到最後全場觀眾起身又跳又叫未??