我的自私鄰居...

我隔離屋個單位成日都轉手, 呢期果位鄰居, 我覺得佢地某程度上係唔正常架囉...

佢個單位有鐵閘同木門, 但佢地永遠唔會關埋個鐵閘, 只係將個鐵閘推開一邊就算.

佢地永世都唔會關埋個鐵閘:

聽講管理處果邊都同佢地反映過, 因為佢咁樣將個鐵閘推開一邊就算, 初初巡樓既實Q唔知你地個單位咩事架嘛, 點知你係咪比人爆格架?? 聽聞管理處有叫佢地處理好個鐵閘, 如果你真係唔用個鐵閘的話咪索性拆咗佢囉, 呢度又無規定一定要裝鐵閘. 但結果佢地係一於少理囉...

本來佢地關唔關鐵閘都與我無關, 基本上都唔會點阻到條路. 但佢地成日將D垃圾放係門口, 我就真係火都黎.

佢地都痴線架, 明明後樓梯就喺正佢地單位斜對面, 佢地兩步路就可以一推門入後樓梯掉咗袋垃圾. 都唔明點解佢地硬係要將袋垃圾就咁放喺門口, 有時無論我地係夜晚放工返到黎, 又或者係一朝早出門口返工, 都會時不時見到佢地就咁放袋垃圾喺門口.

後樓梯明明係佢地斜對面兩步路咋嘛!!!:

本來我地忍得都忍, 但某日我朝早出門口見到佢地袋垃圾無封口不突止, 仲見到裏面D垃圾有汁又烏糟, 我真係火都黎呀!!! 大佬呀, 你有無衞生常識架?? 你唔好惹埋D老鼠曱甴黎先得架!!!! 我即刻影咗相然後落管理處投訴!!

但係呢家人真係痴線架, 兩個星期之後, 有晚我放工七點幾返到黎, 我仍然見到佢地放咗兩袋垃圾喺門口囉!!! 不過今次叫做封咗口...

仲有, 前排咪成日落雨既, 我見佢將把縮骨遮就咁放喺走廊地下, 初初我以為佢嫌把遮仲濕, 所以唔收番入屋住啦... 點知, 呢把縮骨遮喺走廊地下已經成個月咁濟, 佢仍然係原封不動無郁過囉... 

把縮骨遮真係可憐...:

變態架, 咩人黎架!!

最後一年既免費週年紀念晚飯@聘珍褸

不知不覺, 結咗婚已經五年. 今年已經係最後一年食酒樓送出既結婚週年飯.

今年我地去咗荷里活廣場分店食. 由於我地唔想食翅, 所以無叫套餐, 散叫咗幾樣野就算.

如果我地擺酒既尖沙咀聘珍樓未執, 我真係諗住即使來年已經再無免費週年飯食, 我地都會自費去食飯慶祝. 但可惜尖沙咀聘珍樓都已經執咗好幾年, 下年既週年紀念飯我地應該會去其他地方慶祝, 唔會再去聘珍樓了.

不過因為未試過喺聘珍樓飲茶, 今晚八卦睇完佢張點心紙之後, 好想搵日去聘珍樓飲個茶囉~~

2012年4月9日(一) -- 塔門一天遊

4月9日, 復活節最後一天假期, 我地去咗塔門玩.

有friend揸車, 佢預早申請咗禁區紙, 我地先去咗黃石碼頭, 然後喺果度搭快艇過塔門.

途中先去個friend既老細既魚排參觀吓先:

離開魚排, 繼續坐快艇前往塔門. 到達後我地去咗天后古廟.

跟住我地去咗食海膽煎蛋公仔麵同埋冰鎮奶茶, 好味道~~

食完公仔麵, 我地喺塔門周圍行咗陣.

行一陣又食飯, 黎到塔門梗係食海鮮啦~~

食完lunch繼續行, 我地往疊石既方向出發.

遠處果舊就係疊石啦, 讀過地理既都知係因為風化而形成架啦:

冰菠蘿:

離開塔門回到黃石碼頭後, 我地見時間尚早, 而且反正有禁區紙, 所以我地就去埋萬宜水庫行吓~


唔記得咗係東壩定西壩.

我地好白痴咁扮那些年:

2012年4月8日(日) – 深圳錦鏽中華+中國民俗文化村一天遊

4月8日, 復活節假期第三日, 係墨魚家既family day, 我地一行六人去咗深圳既錦繡中華+中國民俗文化村玩.

我地朝早十點喺福田口岸過關, 然後搭地鐵去到華僑城, 先去咗附近酒店既酒樓飲茶.

呢間酒樓既點心真係好普通, 亦都唔係好好食, 叫做填飽個肚就算. 但係大陸呢D完全無服務可言既地方, 竟然收15定18%既服務費, 真係離晒譜.

錦繡中華同中國民俗文化村係一張門票可以去晒, 門票係RMB130, 我地先去咗文化村行吓. 建議大家如果黎呢度, 最好去文化村行咗先, 因為文化村有好多民俗歌舞表演睇, 早D去到可以自己就番時間睇.

 

果度地方真係好大, 同埋好多表演睇, 無可能每個表演都睇晒, 我最鍾意都係"金戈王朝"呢個大型馬戰實景表演, 故事背景係明末, 重演努爾哈赤攻打明朝呢段歷史.

睇完表演出黎, 行到去蒙古區, 有射箭玩, RMB20有十枝箭, 我成世人第一次玩射箭, 估唔到比我射中咗紅色, 中咗奬喎~~ 呵呵呵~~

行到三點幾, 墨魚爸攰攰地又餓餓地, 於是我地坐低食咗D特色風味小食.

最令人一試難忘既係果度既粟米, 唔記得五蚊枝定十蚊枝, 明明個樣都好靚吓, 鮮黃色, 粒粒飽滿. 點知一咬落去, 嘩... 咩黎架? 完全無粟米味都算, 個口感, 真係好難形容, 完全唔知自己咬緊果條係粟米囉! 正常黎講粟米都應該有D咬口食落索索聲同埋咬落有汁架嘛, 但係大陸既粟米, 食落係乾爭爭硬挖挖完全無汁架, 超恐怖! 食咗一啖即刻掉都掉唔切, 都唔知係假粟米定落咗D咩化學野, 由於實在太震撼, 所以完全唔記得同枝粟米影相留念...  

行完民俗文化村, 我地再順步過去錦繡中華, 呢度有各大中國名勝景點既縮水版, 但我對於呢D景點就無乜興趣, 所以行咗一陣就離開.

由於大家都好攰既關係, 所以都費事喺上面食埋飯先返, 我地嗱嗱臨返番香港, 去咗元朗食雞煲.

食完雞煲我同流沙包落咗屯門, 因為流沙包約咗人睇波, 不過我就只係陪睇咗一場, 順便玩吓掟鏢, 成世人第一次掟, 竟然掟中到紅心喎? 不過大家都知紅心唔係最高分呢~

睇完一場波我都已經好攰, 咁啱又有另一班friends約流沙包喺元朗睇波, 所以流沙包就同我返屋企先, 然後佢再出去同人睇波飲野.

返緊新工, 勁忙

我無做日本公司啦, 而家做緊香港公司, 唔駛用日文, 而家反而要對住鬼佬客.

我唔做日本公司, 係因為我想考CPA, 要考CPA, 除咗要考試之外, 仲要喺會計師公會認可既authorized employer/supervisor底下工作3年, 先可以正式成為CPA.

但真係好少日本公司會係AE/AS囉, 所以我唯有搵CPA firm去做.

寄咗十幾廿封信出去之後, 終於有一間CPA firm叫我去見工. 我記得我係23號星期五朝早上JobsDB見到份工, 然後下午send CV出去, 即晚就收到電話叫我第二日去見工.

見工見咗兩粒幾鐘, 即請, 新老闆想我可以6月1日前返工. 於是我就諗住喺舊公司做到5月30日, 5月31號可以返新工.

PK舊公司明明都話做到5月31號, 之前admin同事亦問過個0架仔, 話我地如果早過5月31日就搵到工都可以走, 人工就做到邊日就出糧出到果日.

點知我28號星期一返公司辭職, 條0架仔就玩野, 死都要我做到31號, 話否則唔會簽reference letter比我喎...

我真係火都黎, 我話你既然講到咁, 我更加唔會屈服啦! 同埋我心諗 我都搵到工啦, 要你封reference letter把鬼咩~  我有時間的話 都留黎服侍新老細啦, 仲得閒啋你?!

就係咁, 5月31日我已經展開咗新生活, 回歸上環返工, 遲D有閒情果陣先再寫吓我既新公司情況.

好似好耐無update過...

好耐無update過個blog, 因為最近都幾多野發生...

首先係我啱啱去完歐洲返黎, 今次呢個歐洲之旅係同屋企人去, 目的係想帶墨魚爸媽去歐遊, 2月時已經plan好咗報咗團, 5月中出發.

另外就係我公司方面, 我就黎失業啦, 呢間開咗唔夠兩年既仆街新公司, 一直以黎都無錢賺過(無錢賺係佢地自己攞黎, 開咗成年都未start business, 每個月只係白交租出糧etc., 成班人都唔係做野, 淨係識吃喝玩樂, 不停駛錢, 成話開口埋口話錢唔係問題), 所以大老細唔玩啦, 會將所有員工遣散. 當然做唔夠兩年係咩都唔駛賠啦, 嘥咗我兩年時間, xyz#&....!!!!