新鮮熱辣@墨魚燒賣

2010年12月24日星期五

上海之旅展開~

我今朝早已經出發去機場啦.

但唔好誤會, 今次上海之旅唔係去玩, 係去做交流.

其實係咁既, 流沙包讀緊既master, 其中一個course係境外學習, 地點係上海. 配偶可以跟埋一齊去, 代價係$5,000, 包機票食宿 (當然流沙包佢自己都要比$5,000啦, 學費無包呢個境外學習既開支). 其實當初有猶豫過跟唔跟埋去, 因為如果普通跟團去上海都唔駛五千銀啦吓話? 但一諗起如果唔跟埋去, 聖誕就要一個人喺香港不特止, 27號既結婚紀念日都要一個人過, 所以就跟埋去上海勒.

流沙包去到上海後, 要去D大中小學探訪, 聽演講, 做研討分享之類, 我當然唔會跟大隊啦, 我會自己一個離團自由行呀~ 其實當初無諗過全團人得我一個配偶去架咋, 我諗住可能都有幾個人地既配偶同行, 咁咪可以有個伴囉, 結果...

有一點諷刺既係, 我之前自己一個人喺日本住, 一個人遊遍半個日本我都完全無擔心治安/人身安全既問題; 反而今次返自己既祖國, 就不斷擔心到時我一個女仔自己行, 會唔會被人偷野/搶野/打劫/買野時比人呃etc... 我甚至乎已經預咗個背囊會被人"界刂"開之類, 唉...

呢條係"團巾", 核突到呀... 扮"啤把V"呀? 點解揀呢個款架? 上星期勁凍果陣我拆黎戴咗一陣, 點知已經搞到我皮膚敏感!!:

呢個係要拎去上海既紀念品囉:

團牌:

喺圖書館借咗呢幾本書, 決定帶右上果本去上海:

買咗兩張電話卡, 到時用黎同流沙包聯絡:

2010年12月23日星期四

糯米飯 (附食譜)

冬天最好就係食糯米飯架啦~ 我自己就唔食街外面既難食糯米飯, 只係食墨魚媽煮既勁好味糯米飯.

食譜參考: 墨魚媽

材料(約4~5碗):
1. 糯米半斤
2. 冬菇 3個
3. 臘腸 1條
4. 膶腸 1條
5. 蝦米/蝦乾隨意
6. 老抽/其他豉油 1/4碗
7. 蛋 1隻

步驟:
1. 糯米過一過水沖走污糟野, 用水浸約半小時 (但唔好浸得太耐, 浸半小時就應該落電飯煲煮)
2. 冬菇洗淨, 擦乾淨邊邊位, 用暖水浸軟
3. 蝦乾用水浸軟
4. 將蝦乾, 冬菇(去掟)切絲

5. 臘腸膶腸洗淨去依, 打直切開一半, 再打橫切粒
6. 將糯米放入電飯煲, 加入一碗水份量(可以用番頭先既浸冬菇水及浸蝦乾水令D飯更入味), 按掣煲飯.

7. 將臘腸膶腸粒落鑊炒香(不用落油, 因為D臘腸會出油), 可用大火炒到少許變色, 盛起

8. 再逐一將蝦乾絲, 冬菇絲落鑊爆香 (唔駛再落油, 因為個鑊仲有頭先爆臘腸既油係度. 記得材料要分開爆, 唔好一齊爆)
9. 最後將所有材料(臘腸膶腸粒, 冬菇絲, 蝦乾絲)回鑊一齊炒

10. 糯米煲熟後, 逐少將老抽/豉油淋落糯米飯, 撈至飯粒顏色均勻
11. 將所有材料倒入飯煲與糯米飯撈勻, 再關蓋焗一陣, 完成

(因為我唔鍾意食蔥, 所以無落, 鍾意既可以加埋蛋絲)

大約成本: 唔知呀, D材料全部係阿媽帶黎...

事後檢討:
1. 勁好味~~

2010年12月22日星期三

冬天恩物

上星期鬼咁凍, 即刻嗱嗱聲問吓個fd有無暖風機/暖爐可以借用.

其實暖風機只係幾舊水, 買一個都無咩問題, 但呢D野一年最多用幾日, 我唔想屋企越黎越多雜物, 我又知個fd屋企好多暖爐, 所以就問佢借一個, 租金係一餐飯.

個fd將個暖風機放咗喺元朗0既迷你倉, 本來等佢入完倉後我地就約喺元朗食lunch, 不過個fd去到倉搵唔到部暖風機, 於是夜晚返去問清楚佢屋企人, 先知原來放咗喺某個大盒入面, 於是佢夜晚晚又再入倉拎比我.

咁啱我果晚要喺元朗劇院睇舞台劇, 我見八點開場, 諗住兩粒鐘應該完場啦, 所以約個fd十點係元朗等. 點知原來套劇全長三粒鐘, 我九點半中場休息果陣即刻打比佢, 叫個fd唔好拎比我住啦, 因為咁夜咯, 不如我第二日先拎啦~

不過個fd好好人, 佢真係當晚入倉拎比我, 仲十一點幾喺元朗劇院等我完show後送上暖風機.

個暖風機當然暖啦, 但個fd 0既呢份心意真係令我更加暖在心頭, 真係唔該晒你呀~

另外我之前喺日本買咗個暖水袋, 今次終於用得著, 攬住黎訓覺, 加埋個暖風機, 真係暖love love呀~~

日本買既暖水袋, 1,680円. 日本有暖氣, 所以買咗都未喺日本用過:

2010年12月21日星期二

蘋果雪梨水 (附食譜)

天氣開始乾燥, 最好緊係煲番D滋潤既糖水飲吓啦~

材料:
1. 雪梨 4個 $5
2. 蘋果 3個 $4.5
3. 蜜棗 5粒
4. 冰糖兩小舊

步驟:
1. 雪梨及蘋果切件去芯

2. 半煲水下雪梨, 蘋果及蜜棗
3. 煲約1.5小時, 下冰糖至完全溶解, 即成

大約成本: $10

2010年12月20日星期一

打邊爐

上星期五, 天氣咁凍, 當然要黎次打邊爐啦~

因為訂位已經full晒, 所以我地6點就出到去尖東既德興酒家walk-in, 等埋個fd放工黎到, timing就啱啱好.

任食兩粒鐘, 我地加咗$9/位去"混醬"同埋叫咗個竹蔗水, 埋單每人都係$154.

間酒樓服務都幾好吖, 我覺得幾抵食, 不過可惜呢度既火鍋配料無竹笙...

食完飯只係八點幾, 我地再係附近既Charlie Brown Cafe飲吓野吹吓水.

我叫咗杯Charlie Mocha, 不過我覺得唔好飲...

2010年12月19日星期日

豉椒蒸排骨 (附食譜)

一個人在家食飯, 又唔想開鑊, 最好就係蒸餸, 唔駛煩.

食譜參考:
http://www.discuss.com.hk/viewthread.php?tid=8947638&extra=page=1&filter=0&orderby=dateline&ascdesc=DESC&page=1

材料:
1. 排骨粒(一字排) $14
2. 豆豉隨意
3. 蒜蓉少許
4. 指天椒 1隻

步驟:
1. 排骨用生抽, 糖, 胡椒粉先醃.
2. 再用麻油, 酒, 生粉, 油再醃
3. 豆豉刴碎, 指天椒切細
4. 排骨加入蒜蓉, 豆豉及指天椒絲撈勻

5. 蒸約15分鐘

大約成本: 約$15

簡單又好味, 正!!!

2010年12月17日星期五

雜錦海鮮墨魚汁意粉

今次整埋上次食剩既半包墨魚汁意粉, 不過今次特別D, 因為加埋魚子醬落去, 哈哈.

挪威買返黎既魚子醬:

連意粉同麵包一齊食:

一大罐魚子醬, 好快過期, 除咗連餅乾食之外, 仲可以有咩其他食法呢...?

狂躁發作

係咁既, 尋日我喺屋企, 房門後面本來放咗D野, 唔知點解無啦啦跌咗出黎, 咁啱整到我隻腳.

果一刻我好似發咗癲咁, 即刻拎起件野, 唔係將佢放番係原位, 而係重重咁將佢掟落地發洩, 期間對住呢件死物勁講粗口同咆哮喪叫, 掟咗落地之後, 我再大力踢多兩腳, 好鬼死火滾.

三秒後, 我係度諗:"我仲咩咁躁既? 呀, 係喎就黎M到喇喎". 唔知點解, 每次M到之前, 脾氣會極度暴躁, 我唔係專登令自己情緒低落架喎, 而係好多時只係發生小小事(好似上文提到咁), 成個人就會好似電線短路/突然HANG咗機咁, 突然間會變得好忟憎爆晒粗咁. 然後事後先反問自己"做咩咁躁既?", 再睇番D日子, 發覺都係D就快M到既日子.

好似我尋日剛剛發完癲, 今日就M到勒. 我知情緒係會受賀爾蒙影響, 但有無人好似我咁影響會咁大架? 我成日覺得呢個我唔係本來果個我, 點解我會發咁大脾氣架? 除咗發脾四之外, 我仲會成日亂諗野, 真係好討厭咁樣既自己.

到底我係咪應該睇吓醫生呢?