貓相一堆

喺我學飾物DIY果度, 養咗兩隻貓貓, 影落咗一堆貓相, 借呢個BLOG放晒出黎.

我發覺自己真係唔可以養小動物, 因為我一定會鼻敏感發作. 每次我一去到上堂, 坐低無耐我就會係咁流鼻水, 我初初以為天氣轉涼令鼻敏感發作; 但後尾我發覺應該係貓毛引起既鼻敏感. 睇黎就算我第時想養貓貓狗狗都唔得架啦...

火腿炒蛋+是日晚餐

火腿炒蛋其實應該係落蛋炒咗先加火腿, 定係落火腿略煎先加雞蛋呢?

材料:
火腿 3片 $4.35
雞蛋 5隻 $5

步驟:
火腿切細片
雞蛋拂勻, 加少許生抽及油
油熱下火腿略炒, 然後加蛋兜勻, 完成

大約成本: $10

是次晚餐(total $46), 3個餸, 不過無湯飲:

我的手作仔

油牆假期期間, 一路想搵樣可以打發吓時間, 有D野整吓搞吓, 整完出黎有製成品睇到, 件完成品可以用得著/送到比人既興趣. 諗咗好耐, 終於比我諗到, 就係玩串珠仔, DIY自製飾物.

上網search過, 唔見屋企附近有得學, 見到最似樣果間要去到觀塘, 叫做灰姑娘飾物教室.

http://www.c-jewelry.com/index.html

雖然觀塘對我黎講係遠咗D(去觀塘既車程仲耐過我出銅鑼灣), 不過流沙包係附近返工, 咁我有時去上完堂, 等埋流沙包放工去APM食個飯, 都唔錯吖~ (雖然流沙包都無乜幾何 放咗工可以陪我食飯)

我報既係穿珠類飾物D.I.Y.基本技巧課程(上)+(下), 每堂大約上4小時, 視乎你既進度而定, 總之上晒成個course會整到6件完成品, 包括4條手鍊及2條頸鍊.

第一堂
第一堂整既比較簡單, 第一條手鍊整咗3個鐘, 第二條整咗1個鐘.

第二堂
用咗4小時去完成一條頸鍊, 唔好睇條鍊好似好簡單咁, D珠珠要逐粒串上釘針/圈針, 然後親手用鉗去撟圈, 撟到手指痛...

第三堂
都係用咗4小時去整, 睇落好似好複雜, 但如果你識用勾針織冷衫, 應該會無難度, 因為手法類似. 手鍊個扣都係自己用金屬線撟架, 唔係現成扣黎架~

第四堂
今次呢條用咗3小時就整到, 不過好難整得靚, 因為D圈係用手自己撟自己整pattern, 但學既咁多條手鍊當中, 我最鍾意呢個款式.

第五堂
估唔到呢條鍊我用咗5個鐘先整得完, 撟D圈撟到我手指勁痛... 

上完五堂, 完成晒成個基本課程啦. 我買咗少少材料整第三堂學果款手鍊, 同埋買咗一set鉗. 希望我唔會半途而廢啦~

蒜蓉西芹炒帶子 (附食譜)

食譜參考:
http://www.wretch.cc/blog/DolphinRita/8857500

材料:
1. 帶子 (我用咗好細粒既扇貝咋) $4
2. 西芹 $11.7
3. 蒜蓉
4. 薑

步驟:
1. 西芹切件, 薑切片
2. 油熱下蒜蓉及薑片爆香, 加入西芹炒勻
3. 加入上湯, 蓋鑊蓋, 煮熟西芹
4. 加入扇貝兜勻

5. 水+雞粉/上湯, 麻油, 生粉, 糖, 鹽, 胡椒粉, 酒開芡, 倒入鑊內與材料炒勻至汁杰, 完成

大約成本: $16

事後檢討:
1. 下次會用番帶子整架啦

勁勁勁難食!! KFC新出既焗芝士家鄉雞皇飯

我每逢星期一都會出去做facial, 然後再上日文堂. 我上堂既地方係油麻地, 每次搵地方食飯都令我幾頭痛, 附近果D餐廳, 就算我同流沙包一齊 都未必想入去幫襯, 更何況我自己一個女仔... (我唔係好鍾意自己一個人係出面食飯麻)

某個星期一就去咗KFC食飯啦, 見到佢新出咗個焗芝士雞皇飯, 咪諗住試吓囉, 點知就中招勒. 個飯D汁又少, 又乾掙掙, D雞仲要得果兩小粒.

我摷勻成個飯盒, 淨係見到呢兩粒雞肉囉... 少到吖! 真係不知所謂!!!:

我相信我自己整都一定整得好食過佢N倍囉... 無下次呀!!! 

鮮茄洋蔥魚柳 (附食譜)

屋企用剩好多材料係度, 如果再唔煮埋佢, 應該又會擺到變壞, 所以呢餐飯我唔需要落街買餸, 全部用屋企既剩餘物資 自己想配搭整出三道菜. 分別有鮮茄洋蔥魚柳, 西芹炒扇貝(本來應該炒帶子, 但我屋企只係得扇貝), 同埋火腿炒蛋(因為D火腿就黎到期).

食譜參考:
http://shirleyliving.mysinablog.com/index.php?op=ViewArticle&articleId=1419637


材料:
1. 魚柳 1~2件 $13.4
2. 番茄 3個 $3.675
3. 洋蔥 半個 $1.15
4. 茄汁 3湯匙
5. 薑 少許

步驟:
1. 魚柳解凍, 抹乾, 下鹽及胡椒粉醃半小時
2. 番茄切件, 洋蔥切絲, 薑切片
3. 魚柳上少少蛋及生粉, 熱鑊滾油下薑+魚柳煎熟, 盛起, 切成小塊

4. 熱鑊滾油下洋蔥爆香, 加入番茄炒勻
5. 加小半碗水及茄汁, 煮滾後下糖調味
6. 下魚柳炒勻, 煮至汁杰即成

大約成本: $20

事後檢討:
1. 有人話魚柳下檸檬汁可以辟腥味, 應該係邊個step落呢?
2. 魚柳應該煎完先切件, 定係切咗件先煎呢?
3. 有人教我煎魚柳先上蛋及生粉, 目的是什麼呢? 係用以索乾水份等煎果陣D油唔會勁彈出黎? 定係可以令到件魚柳無咁易煎散? 還是什麼原因?

用咗曲奇模整既曲奇餅

某日落個fd屋企打麻雀, 於是整咗D北海道牛乳布甸同埋曲奇餅去.

我終於買咗曲奇模啦, 分別係心形, 米奇頭同埋圓形波浪形.

好似好難先搵到呢D可以做到中間通窿既曲奇模, 有無姊妹知道邊度仲有得賣?(我見過City Super有, 但價錢唔平):

仲係二德惠買咗個曲奇餅罐($18), 靚晒:

食譜可參考呢度 (我參考咗fat12565既意見, 用少咗牛油, 我今次只係用咗150g, 口感幾好, 下次都會用少D牛油去整, 健康D)

係度想呻兩句, 我個米奇頭同圓形波浪形模係元朗華都商場1樓某間烘焙店買, 由於我之前無格過價, 行過見到咪買囉, $8/個.

點知過幾日去咗元朗同益廣場1樓果間Cake Secret, 見到只係賣$6個, 嗚...

再過幾日, 我去咗荃灣二德惠買野, 見到一模一樣款既曲奇模, 只係賣緊$3.5/個咋, 又當場噴血!!

不過最想講既係, 我買$8個都覺得自己死蠢啦, 有日去咗元朗區大家普遍認為價錢最平既果間家政坊, 我見同款既曲奇模, 果度竟然賣緊$10/個???!!! 唔係化...? 有無搞錯呀? 咩家政坊唔係已經係全元朗最平既呢咩? 點解會賣成$10/個架?? 以後真係要好好格吓價先得.

野菜豚肉燒 (附食譜)

食譜參考: 自己諗

材料:
1. 切片豚肉 $6
2. 野菜 (我用咗娃娃菜1棵) $0.83
3. 洋蔥半個 $1.15
4. 薑
5. 蒜頭
6. 生抽

步驟:
1. 洋蔥, 薑, 蒜頭切片
2. 生抽落鑊煮熱, 加入砂糖及胡椒, 盛起

3. 油熱下蒜頭爆香, 加入豚肉炒至半熟, 再將剛才的生抽倒入
4. 加入洋蔥, 薑, 菜炒熟, 上碟  

大約成本: $8

事後檢討:
1. 菜唔係好夠, 下次落2棵