好多show等睇, 好多婚宴會參加, 好多玩樂等出發~

2010年仲有兩個幾月就過去, 但期間仍然係多姿多彩.

睇show
我講既show唔係演唱會果D喇, 我唔鍾意睇演唱會, 我講既係舞台劇, talk show同埋音樂會呀.

黎緊會睇既show包括:
10月 -- 我的援交日記; 爆響口之唔出得街
11月 -- 瘋狂夜宴搞偷情(未買飛); 黃子華棟篤笑娛樂圈血肉史II; 破地獄與白菊花
12月 -- 久石讓音樂會; 快樂無罪9(未買飛)


婚宴
11月會去3個婚宴, 分別係中學同學, 舊同事同埋表姐結婚.


玩樂
10月 -- 去澳門睇水舞間, 順便住2日1夜
12月 -- 去上海陪流沙包出席佢個master course既"境外學習";  屋企人黎我屋企開除夕party

試衫

我個妹出年年頭結婚, 前排同埋阿媽同阿妹一齊去試衫.

阿媽試佐起碼十套八套衫, 終於好難先搵到件啱佢心水既, 於是我個妹即刻落訂.

而我都係果度租埋衫啦, 我揀佐呢件, 我自己就幾鍾意個款同隻色, 唔知大家點睇?

老實講, 我咁大個人係一次姊妹都未做過, 可能我無咩好朋友啦, 哈哈~ 連唯一有機會做果次, 都因為果排我有親戚過身, 所以就無得做姊妹啦... 

我都要減肥啦, 成身都係肉, 手臂勁粗, 唉...

芝士焗西蘭花 (附食譜)

上次既闊太lunch聚試整佐個芝士焗西蘭花, 趁記得寫埋個食譜出黎先.

材料:
1. 西蘭花 1個 $3
2. 忌廉雞粒蘑菇湯 半罐 $4
3. 芝士碎(我用巴馬芝士) 隨意
4. 牛油 少許
5. 鹽 少許

步驟:
1. 滾水下牛油+鹽, 放入西蘭花略煮後瀝乾
2. 先將一半忌廉湯倒入焗碟, 鋪上西蘭花, 再將餘下一半的忌廉湯倒在西蘭花面
3. 鋪上芝士碎

4. 入爐220度焗20分鐘

大約成本: $7

事後檢討:
1. 我第一次整, 時間預得唔好, 焗得D西蘭花老佐

自己剪頭髮

我因為額頭生得唔靚, 塊面又長, 所以通常都會留前陰.

煩就煩在即使後面D頭髮唔剪, 前面D陰點都要隔2, 3個月左右修一修.

之前貪方便同貪快去佐QB House剪, 本來都諗住花$50去修一修D陰(順便修吓髮尾囉).

但我呢D慳家C9, 連$50都唔想比, 於是把心一橫, 決定自己剪.

其實我中學時期都間中會自己剪陰, 但次次都剪得太齊葺葺, 變到成個傻婆咁.

所以自從出佐黎做野又搵到錢之後, 就無再幫自己剪陰啦.

今次我都驚又會剪到成個低B婆咁, 所以專登過晒中秋, 唔駛出黎見人, 先引刀一快.

結果...? OK喎, 起碼我自己接受到先囉~~ 哈哈~~~

剪陰前:

剪陰後:

 

芒果布甸 (附食譜)

今次整D唔駛焗既野, 就係芒果布甸勒.

因為今次D布甸有小朋友會食, 所以我唔用D要落蛋黃既食譜啦.

我見好多人整布甸都係落淡奶黎整, 我就偏唔落淡奶, 我分別試用牛奶同埋淡忌廉去整.

材料(約5杯):
1. 芒果味啫喱粉 一包(90g) $3.8
2. 芒果肉 隨意 $6
3. 淡忌廉/牛奶 250ml $10
4. 熱水 250ml

步驟:
1. 啫喱粉用熱水開勻
2. 加入淡忌廉(下面第一張圖)/牛奶(下面第二張圖)拌勻

3. 芒果切粒

4. 先加少量芒果肉係杯仔, 再倒入溶液, 放入雪櫃

5. 雪到半凝固, 再加芒果肉落杯仔, 繼續雪至完全凝固

大約成本: $19.8

事後檢討:
1. 用牛奶整果D, 無咩特別, 唔係好香
2. 用淡忌廉整果D好香, 但感覺有D杰, 下次試吓落少D淡忌廉, 落多D水

越黎越難食的美心冰皮月餅...?

今年本來想買半島酒店出既奶皇月餅, 因為聽人講話好好食. 有同事話託佢個friend買有唔知幾多折, 本來我都搭單買埋一份, 但後尾話好多人訂, 唔接新order, 所以我最後就求其係教協買佐美心冰皮($105)勒.

之前都有試過美心冰皮, 但今年我覺得美心冰皮原來真係好鬼難食, 都唔知自己食緊咩. 我以後都唔會再買美心冰皮架啦, 下年一定買試半島既奶皇月餅!!! 

朱古力石板街:

夏威夷果仁芝麻:

滑滑奶黃:

宇治金時:

心太軟:

意大利咖啡芝士:

楊枝甘露:

芒果脆脆:

法式無焦糖布甸 (附食譜)

呢個布甸係跟香港寬頻504台既《今日食乜餸》整既.

材料(4~5杯):
1. 淡忌廉 480g
2. 全蛋 2隻
3. 砂糖 50g
4. 云呢嗱香油 少許

步驟(焗爐180度預熱約15分鐘):
1. 將淡忌廉煲熱, 不用煲滾, 見有少少煙出就要熄火
2. 雞蛋+砂糖人手打勻

3. 將淡忌廉慢慢倒入雞蛋, 一路倒要一路攪拌
4. 加入少許云呢嗱香油, 拌勻

5. 隔渣倒落杯仔, 160度焗35分鐘, 座水焗

6. 出爐後係表面加上砂糖, 薄薄一層便可, 用火槍將砂糖燒焦(如果凍食, 可雪凍後才做呢一步)

大約成本: $40 (其實唔駛咁貴, 因為我盒淡忌廉係百佳買, 所以先咁貴)

事後檢討:
1. 我無火槍, 所以無整焦糖果層, 不過我自己就加佐D喺日本買返黎既巨峰提子乾落去(入爐焗佐十幾分鐘後先放入提子乾)
2. 中間食落好滑, 不過我覺得個面好似鞋鞋地, 唔係幾靚仔, 到底本身會係咁, 定係我焗得耐得濟?

關島結婚之旅 -- 後記

係咪好奇怪點解無啦啦寫個咁既關島後記? 我關島結婚都已經係3年幾前既事啦...

其實係咁既, 我以前寫blog通常都喺公司寫, 仲係開住公司e-mail黎寫, 扮晒做緊公事咁(無法啦, 係TDK果陣鬼咁得閒, 平時多數都無咩野做既). 寫完之後就send去自己yahoo個e-mail, 返到屋企先再copy & paste落去自己個blog.

呢幾日見得閒就清吓我N年未清過既yahoo e-mail啦, 發覺原來有D野我明明寫好晒, 但係一直都未放上blog. 咁寫佐唔好嘥麻... 所以呢篇後記咪隔佐咁耐先面世囉~~

好勒, 廢話少講, 內容如下:

關島真係一個好地方, 去到個人可以好relax, 真係好放假feel. 果度D海水真係好清, 即使D水好深都可以見到海底. 關島真係勁多日本人, 差唔多周圍都有日文指示, 周圍都有人講日文, 所以連當地既店員, 巴士司機等等都識得幾句簡單日文, 日本人既勢力(同財力)真係強大呀! 導遊話日本每日都有12班飛機到關島喎(嗱, 呢個係3年幾前既事). 就連我地搭南部線, 巴士上既講解都係得日文, 雖然話就話有其他翻譯, 但我見巴士上根本就無耳筒, 聽鬼聽馬咩... 同埋果邊D人都以為我地係日本人, 一見到我地就用日文打招呼, 我話我唔係日本人, 對方就話我個樣好似日本人喎(然後流沙包話因為日本人都係眼細細喎, 哼!!)

娛樂方面, 去到關島點可以唔試下當地既水上活動?? 無論係酒店泳池又好, 沙灘又好, 出海睇海豚又好, 浮潛又好, 潛水又好, 我覺得點都要試下既. 雖然我去關島前好驚會曬黑變到賓妹咁返香港, 所以都有諗過唔玩水, 但去到關島唔落水真係枉你話去過關島, 最後我都唔理咁多玩佐先算. 不過好彩我去玩水上活動果日有時會陰天落吓雨, 唔係全日都曬.

購物方面, 我個得GPO一定要去, 反而個Micronesia Mall就無咩特別. 如果無時間只能去一處, 我推介一定要去GPO, 裏面有好多平野買, 首選既係Levi's, 真係超平, 好多牛仔褲都只係US$19.99, 29.99 only, GPO裏面有間Levi's outlet, 甚至有D US$9.99既牛仔褲添喎! 我除佐推介GPO呢間Levi's outlet買牛仔褲平之外, 係Micronesia Mall既Macy's都有個corner賣牛仔褲, 又係好平只係US$19.99起, 同埋果度比較free, 你自己摷啱邊條牛仔褲就拎入試身室試, 試唔啱拎返出黎放番係原位, 唔駛經過店員, 即係你點試, 試幾多條都得, 無人會係你側邊招呼你令你唔自然唔好意思. 不過問題係果度既牛仔褲size都係超大條, 嗱起手條條都係三十幾腰圍, 我都要好辛苦先可以摷到D廿幾腰既啱我著. 反而GPO裏面間Levi's outlet就會多少少廿幾腰的. (3年後既今日, 我想講好多牛仔褲買佐番黎之後, 一路都係未著過囉... 因為我去完關島無耐就轉佐工, 會計師樓返工唔著得牛仔褲呀!)

但千祈唔好係關島買All Stars, 價錢無咩分別. 另外想講去關島行教堂結婚, 同埋親友去 個氣氛真係好好多, 否則全間教堂空盪盪咁真係怪怪地囉...

因為我地請埋屋企人一齊去, 所以呢個關島之旅差唔多駛佐十萬銀, 肉痛...  

闊太lunch聚

某星期六下午有兩個舊同事上佐黎我屋企聚一聚, 於是我係屋企整佐D小食, 有焗薯啦, 焗芝士西蘭花啦, 焗牛扒雞翼啦, 蒜蓉包啦, 仲有親手整既曲奇餅...

食完飯由Abe媽教授化妝技巧, 我決定又要買堆眼線膏, 眼部遮瑕, 眉筆同埋眼影base.

早知一早叫Abe媽開班教, 唔駛之前嘥千幾二千蚊出街學啦~~ 呵呵~~

希望我學既skill用得著出席你11月既大日子啦~~

超鬆化牛油曲奇 (附食譜)

買佐焗爐之後, 第一次自己試整曲奇.

我無出街學啦, 自己上網搵D整曲奇食譜試吓自己整.

因為自己都鍾意食Jenny Bakery既曲奇餅, 所以我搵佐個話味道似Jenny Bakery既食譜.

材料(我每塊搓到五蚊銀左右大, 約整到50~60塊):
1. 牛油(golden churn果隻) 200g $16.8
2. 糖霜(icing sugar) 50g $1.25
3. 低筋麵粉 150g $3
4. 粟粉 50g $1.1

步驟:
1. 牛油+糖霜打滑, 打至淡黃色
2. 慢慢篩入麵粉+粟粉, 攪勻成麵團

3. 將麵團唧花/搓成小舊, 放上已鋪有牛油紙的焗盤

4. 入爐180度焗12~15分鐘

大約成本: $22.2 (約55塊, 平均約$0.4/塊)

事後檢討:
1. 下次試吓整靚D, 唧吓花/買D曲奇餅模返黎整吓先