蝦多士+芝士火腿煙肉焗薯

之前整紐約芝士餅買佐盒酸忌廉, 一盒235g, 但整紐約芝士餅只需要用50g, 剩佐一大盒都唔知做咩好, 酸忌廉只可以擺幾日唔可以放得耐, 於是上網搵吓可以整D咩用埋D酸忌廉.

蝦多士 $11

呢個食譜算係我自創, 因為我無跟到食譜.

材料:
1. 蝦3隻(我用佐雪藏蝦) $5.3
2. 煙肉 半片 $1.9
3. 火腿 半片 $0.9
4. 麵包 3片 $1.9
5. 芝士 半片 $1
6. 酸忌廉隨意

步驟:
1. 蝦用鹽醃一醃, 然後落鑊煎一煎
2. 煙肉及火腿切粒, 落鑊炒一炒
3. 烘多士
4. 牛油搽麵包, 隨喜好放上蝦, 煙肉及火腿粒, 鋪上芝士及酸忌廉, 再放入焗爐焗一焗

芝士火腿煙肉焗薯 $9.8

材料:
1. 美國焗薯 2個 $6
2. 煙肉 半片 $1.9
3. 火腿 半片 $0.9
4. 芝士 半片 $1
5. 酸忌廉隨意

步驟:
1. 薯仔先用熱水烚15分鐘
2. 用錫紙包好薯仔, 放入200度焗爐焗45分鐘
3. 煙肉及火腿落鑊炒一炒
4. 取出薯仔, 中間用刀切開約三分二, 用手掰開
5. 薯仔中間放入煙肉及火腿, 舖上芝士及酸忌廉, 再放入焗爐令芝士變溶

事後檢討:
1. 薯仔好似唔夠香, 下次試吓係薯仔表面搽上牛油才放入煙肉及火腿
2. 酸忌廉其實唔係好知點整, 點樣先做到出面餐廳咁樣, 比較流質做到醬汁? 而家我只係一pat pat咁直接撻上面就算...

紐約芝士餅(附食譜)

買佐焗爐返黎, 第一時間試吓整紐約芝士餅先.

學整餅果陣, 食譜話忌廉芝士要280g, 但由於我買既忌廉芝士只有250g, 所以我自行adjust過D材料份量.

材料(6吋蛋糕):

餅底
1. 消化餅碎/芝士餅碎 75g(約五塊消化餅) $3.8
2. 牛油 28g $1.7

芝士餡
1. 忌廉芝士 250g $29.9
2. 糖 53g
3. 全蛋 2隻 $2
4. 檸檬汁 1茶匙 $2.8
5. 檸檬青(即檸檬皮) 1/4茶匙

6. 牛油 53g $3.3

餅面
1. 酸忌廉 50g $3.2
2. 糖 25g

步驟:
1. 預熱焗爐180度
2. 將消化餅壓碎

3. 用熱水助溶牛油, 然後將消化餅及溶牛油撈勻

4. 將消化餅舖勻蛋糕模, 壓實做成餅底, 記得邊位一定要壓得實一點

5. 將已放室溫變軟的忌廉芝士切開一舊舊, 用打蛋機打一打散
6. 將糖分3次加入忌廉芝士打滑(用1度打), 每次打十零秒就要停機, 記得每打完1次後, 先用蛋糕挖將邊邊果D撥番去中間, 然後先再加糖再打

7. 將蛋分3~4次加入忌廉芝士, 每次打10秒/8秒要停機(以免做成"分離"), 記得每打完1次後, 先用蛋糕挖將邊邊果D撥番去中間, 然後先再加蛋再打 
8. 拌入檸檬汁及檸檬青, 加入牛油, 人手拌勻(不用機打)
9. 將芝士餡倒入蛋糕模, 放入180度焗爐焗40分鐘, 由於用的是蒸焗法, 記得在焗盤加水焗(我用的是隔水焗, 蛋糕模放網架, 不是直接放焗盤, 所以無用錫紙包底, 焗完出黎中間位亦不會凹陷入去; 如果想邊位高, 中間凹, 請座水焗, 用甩底蛋糕模的話記得包錫紙才放落注有熱水的焗盤上焗) 

10. 餅面變金黃色後, 將蛋糕取出

11. 將酸忌廉加糖用手攪勻, 舖在餅面上, 然後將蛋糕再放入焗爐, 不用開爐, 只用餘溫烘5~10分鐘

12. 取出蛋糕, 起模, 室溫攤凍後, 可隨意放上朱古力字, 生果(如放士多啤梨, 記得不要用水洗, 只能用濕布抹, 否則很快會爛)等等. 放入雪櫃, 雪凍後即可食用

 

大約成本: $46.7.

事後檢討:
1. 我用自己焗爐開180度焗佐40分鐘都未得, 最後焗佐差不多50分鐘, 才聞到蛋糕香味, 個蛋糕面才轉金黃色, 係咪因為我喺焗盤放得太多水去焗呢?
2. 我覺得個餅底唔夠厚, 下次可能用多兩三塊消化餅

超市陰濕掠水?

我轉型做C9之後, 對於價錢呢D野就更加敏感.

我通常買野都係去PK, 因為成日試過被收多佐錢, 所以我而家買完野一定會即時check單. 我發覺超市有時真係好老土, 我試過"被呃"既例子有:

1. (試過N次) 好多時佢個label標明某個價錢, 但比錢之後發覺佢收貴佐囉... 我知可能係佢D價錢牌未update得切, 或者電腦未改得切. 但如果唔check單, 咪白白比貴佐?

2. (又唔只試過一次) 有時同一樣貨會分別放係兩個不同位置(唔係附近, 唔係同一個貨架的), 明明件貨一樣, 但價錢係會唔同架囉... 比錢後check單發覺佢收佐貴果個價錢, 我同個收銀講, 有時D職員去番貨架check價錢check唔到平果個, 反而問番我件貨係邊度拎...

3. (最近中佐兩次招, 好激氣) 有兩件唔同牌子既貨, 明明右面件貨下面個價錢牌係$10, 左面件貨下面個價錢牌係$8, 於是我就拎左面$8果件貨啦, 點知比錢果陣佢收佐我$10, 於是我比完錢之後入番超市, check清楚個價錢牌啦. 我先發覺佢件貨同個價錢牌對調佐囉... 真係好鬼老土架, 原來左面件貨下面$8個價錢牌跟本就唔係呢個牌子, 真正$10果個價錢牌放佐係隔離囉(有次仲離譜, 件貨既真正價錢牌係放佐係隔離再隔離再隔離件貨果度囉)!!! 或者你會問係咪其他客無手尾擺亂佐呀? 我可以答你絕對唔係囉, 因為貨架埋面D貨都係照咁樣擺法架~ 我覺得真係超級老土囉, 趁人睇少兩眼就呃人買佐件貴貨!!! 下次真係要價錢牌上逐隻字睇清楚, 再對比埋手上件貨既牌子, 重量, 名稱先好比錢呀!!! 

其他老土野包括:
1. 個價錢牌成日雞乸咁大隻字寫住破底價, 但個價錢根本無平過囉...
2. 所謂既特價, 只係平時"正價"時特登標高個價錢, 所謂既"特價"只不過係回復番佢正常既價錢囉...
3. 有D特價野, 價錢都唔算平, 但"特價"果陣, 只係平佐一毫子咁大把囉...

最近最激氣既野:
就係個焗爐囉, PK買要$402, 點知實惠賣緊$299咋!!!!! 豈有此理, 下次我會格清楚價先買, 總之而家超市D野越黎越貴, 有時反而7仔萬寧果D仲會平D囉...

焗爐送到

之前物色佐焗爐一段時間, 都幾煩.

焗爐雖然唔係D咩貴價野, 只係幾百蚊貨仔, 不過如果事前無睇清楚, 買佐返黎先知唔啱用, 咁就唔係幾好啦.

因為我廚房唔大, 所以焗爐唔可以買得太大個.

之前學整餅果陣, 兩間舖頭既miss都話要焗得蛋糕既焗爐, 最少要有22公升以上, 同埋要夠高, 咁焗出黎既蛋糕先無咁易燶.

另外之前上網睇過, 話有D焗爐個焗盤唔可以單獨直接入爐, 要下面放網架托住先得, 所以我要搵D個焗盤可以單獨入爐既model.

到最後, 終於決定買Rasonic既焗爐, 型號係REN-D23/W. 佢有23升, size又幾適合我廚房個位, 所以就係百佳買佐啦, $402. (其實DSC直銷中心個價錢仲平, 不過我貪係百佳買有埋送貨服務)

點知... 我早幾日經過實惠, 見到賣緊$299咋, 即刻當場噴血呀!!!!!

左手廢佐...

前兩日約佐另一個油牆friend去打羽毛球, 打佐兩粒鐘, 果晚隻左手已經廢佐+雙腳無力...

唉, 我自己一個人打一粒鐘壁球都無咁痛, 今次打完兩粒鐘羽毛球即刻成個人散晒, 唔通羽毛球同我唔夾??

我同個friend book佐星期四既下午兩點至四點麻, 換完衫一入球場, 咦? 乜成個場得我同個friend兩個人咋?? 但係看台上面就有十幾廿人坐佐係度, 有D係公公婆婆, 有D我相信係失業(待業)人士, 另外仲有班C9, 我估佢地應該係等緊接仔女放學, 未夠鐘所以成班C9坐係體育館涼吓冷氣兼吹水.

黎涼冷氣既人多過黎打波既人, 搞笑...


********************************************************************

今天是911, 老土都要講句: 希望世界和平.

京都汁雞翼+番茄炒蛋

上兩個星期六, 終於有機會煮飯, 因為要等D人練完習返黎, 所以呢餐飯係十點幾先開飯, 見咁夜就唯有煮D簡單野啦~

京都汁雞翼 $15.2
呢個菜係睇都市閒情學番黎既, 不過我覺得個味唔夠濃, D雞翼唔夠入味, 到底係咩原因呢(我明明跟住食譜份量架喎...)?

材料:
1. 雞翼8~10隻 $12
2. 番茄1個切細 $1.2
3. 洋葱1個切條 $2

4. 蒜頭1粒

京都汁:
浙醋(3湯匙), 喼汁(1茶匙), 茄汁(1湯匙), 水(3湯匙), 糖(1.5~2湯匙), 鹽(1/8茶匙)

步驟:
1. 雞翼用生抽(半湯匙), 鹽(1/3茶匙), 胡椒(少許), 麻油(少許)先醃最少半小時

2. 油熱放雞翼落鑊煎, 煎至7至8成熟後盛起

3. 蒜頭, 洋葱落鑊爆香
4. 加入番茄
5. 加入京都汁
6. 加入雞翼, 不停兜讓雞翼入味, 收汁後可以上碟

番茄炒蛋 $5.4

材料:
1. 番茄2個 $2.4
2. 蛋3個 $3
(整完後發覺份量太少, 下次我會整蛋5隻, 番茄3~4個)

步驟:
1. 番茄在底部界十字, 放落熱水煮一煮

2. 煮熱後, 被界了十字的番茄皮會翻出, 易於去皮, 此時將被及蒂去除
3. 將番茄切爛

4. 想雞蛋滑些, 將蛋白及蛋黃先分開, 蛋白不要打, 只發勻蛋黃. 然後將蛋白及蛋黃mix番埋, 但不要打, 只輕輕了吓輕拌勻便可. 加入豉油再輕輕拌勻, 再加少少油(阿蘇的教法)

5. 燒紅鑊再加油, 油勁熱後落雞蛋, 落下後要不停兜, 7至8成熟後盛起

6. 將番茄落鑊煮, 加少少鹽, 猛火煮.
7. 略收水後, 可加少少生抽及茄汁

8. 將步驟5的雞蛋加落番茄, 兜一兜後上碟

除了雞翼唔夠入味外, 其他都好滿意.

兩餸合計: $20.6.

師奶生活之: 睇烹飪節目

呢期轉型做C9, 當然要做番D C9野, 就係睇烹飪節目啦~

首先每日都會睇都市閒情, 睇吓教整咩野餸.

亦會睇吓有線, 因為重播緊阿蘇果個咩鬼1粒鐘真人蘇.

係電視前面一路睇, 一路快快手炒低D食材同埋煮法.

睇完之後真係手痕痕好想即刻自己試吓, 不過有D人晚晚都唔返黎食飯, 墨魚媽又要加班唔得閒上黎食飯, 唔知我幾時先有機會"大顯身手"呢?? 

懇請指教, 點解個妝慢慢會變佐熊貓眼...?

油牆假期前學過化妝, 諗住係假期裏面"鑽研"吓D化妝術, 因為我想試吓化到D日本妹台灣妹咁, 化妝(or黃子華講既喬裝)化到完全變佐第二個人咁.

我其實係完全唔識化妝, 所以都專登上過兩次化妝班(每次都係四堂, 學D基本野啦), 上星期約佐班friends出黎食飯, 於是pat pat痕戴埋con化個妝出街啦.

老實講我果日個妝化佐兩粒鐘, 因為用佐好多時候係對眼度, 我係嚴重大細眼, 左眼雙眼皮但係右眼單眼皮, 本來買佐枝雙眼皮膠水想黐一黐隻右眼, 但係搞佐大半個鐘都搞唔掂, 乾佐後D"膠水皮"一舊舊咁撻住係眼皮上面, 又做唔到雙眼皮既效果, 激死人!!!

咁算啦, 唯有淨係用眼線筆將右眼畫大D啦, 但出到街不時要拎塊鏡出黎照吓, 因為我好唔明點解眼肚個位開始變到黑忟忟? 好似熊貓咁, 好肉酸呀, 搞到要不停用tissue抹佐D黑色.

返到屋企後即刻叫流沙包幫我影D相, 諗住放上網問吓各位姊妹既意見, 我想問點解我對眼下面位置會好似捃佐黑邊咁既? 我明明淨係畫佐上眼線(痴佐半截假眼睫毛, 但無搽mascara), 無畫到下眼線架?? 

點解呀點解呀?? 嗚嗚...

 

北上揼骨

8月21日, 同班friends北上深圳揼骨.

深圳通i小姐揀佐南山區既東方雅典水療俱樂部, 所以我地就經深圳灣北上勒.

 

今晚係裏面食埋飯, 唔記得我呢個係乜鬼炒飯:

係裏面按吓腳, 按吓身, 過埋夜, 沖埋涼, 食埋飯, 埋單都係人民幣2百幾.

第二朝係周邊影吓相:

點解呢棟建築物咁特別既, 凸出黎既部份係點起架??"

 

跟住我地去佐購物中心站果個Coco Park食lunch, 5個人叫佐7樣野, 勁!!

 

 

 

 

 

 

然後去佐超市行佐陣, 跟住就返香港啦:

無聊一提, 我去國內既超市通常都係為佐買酸奶, 我都唔明, 大陸有酸奶, 日本有飲むヨーグルト, 點解香港竟然無出呢種飲品?!!!

勁燥勁down

呢幾日, 脾氣勁差, 心情勁down.

自從星期一發生馬尼拉慘劇之後, 心情一直沒有舒展過.

我知自己M到前會勁忟憎, 但呢幾日成個人好似癲佐咁, 獨自一人在家都會對住D死物咆哮.

再加上我真係好討厭果隻爛鬼流沙包.

我已經講過N次, 唔鍾意佢同D學生咁close!!!!

人地學生今日做過咩, 同邊個係邊度食飯, 幾時去邊度, 關你乜野事呀? 成日來來回回send埋晒D咁既SMS, 我真係眼火爆呀!!!! 我覺得呢D咁既SMS係情侶之間先至會做架咋??!! 果隻流沙包話呢D係閒話家常喎!!! 就算佢有時同我落街食飯或者去超市買野, 條友都會拎部電話出黎唔知SMS定Facebook緊, 總之一有時間就對住部電話係咁篤篤篤, sorry囉, 我阻倒你囉, 阻住你同D學生"閒話家常"囉!!!

我唔知呢一代既教師係點樣, 自己既手提電話, Facebook, MSN都比埋D學生, 條友仔已經差唔多每晚都有野做, 每晚成十點, 十一點先返黎屋企. 返到黎屋企第一時間係開電腦囉, 然後不停咁同人MSN, Facebook. 我覺得自己似同屋主多D囉. 咁又係, 我都已經係一件C9扒啦, 比我都寧願上網對住D十零歳既妹妹仔啦!

有時佢D學生打電話黎, 我係側邊都會聽到佢地講咩, 我聽到D學生會話"好掛住你呀!", 我嬲係咪好正常呀?? 有時又會見到佢D唔知send比邊個既SMS寫住話"很想念你!", 我發脾氣係我太小器嗎? 得! 第時我同男性朋友一日幾廿個SMS噓寒問暖, 係咁話好掛住你, 日日send埋D無聊SMS講大家今日要去邊, 要做D咩, 幾點會返屋企之類果陣, 你都唔好過問我!!

講真, 如果以前唔係發生過唔止一次既不愉快事件, 我都唔會將呢D野睇得咁重. 如果之前唔係發生過D唔開心既野, 以上所述, 我可能都會覺得呢隻流沙包係一個比較關心學生既阿sir囉. 但講真, 自從不愉快事件發生後, 我已經唔係100%信任佢. 每次見佢收/send SMS or MSN, 我心裏就忍唔住問"邊個黎架? 你同佢咩關係呀? 學生? 真係學生?", 我真係好辛苦呀, 我無辦法擺脫到我既心理陰影, 你話我成日亂諗野?!! 如果你唔係做過D咁既野, 我而家駛成日亂諗野??!!!!! 呢D完全係你一手造成架!!! 你之前應承過我既野有照做嗎??!! 完全係得個講字!!! 我睇吓幾時自己頂唔順谷爆既時候, 唯一既解脫就係同你離婚!!! 我唔想好似潑婦罵街咁, 儲埋隔幾個月就頂唔順發作, 又拎番呢D野出黎嘈呀!!! 又或者等我死L佐, 就無人再阻住你啦!!! 咁樣你滿意啦!!

而家暑假, 做教師既唔係應該都有D假放既咩? 我知佢忙, 好多兼職, 又好多野要練習. 但呢個七, 八月, 佢每個月都有時間同人遊船河3, 4次, 但就無一日空閒可以全日陪我囉. 呢個暑假裏面, 八月開始我已經油牆中啦, 但我地完全無一日係一齊出過街玩囉. 佢有時週末晚返倒黎同我食飯, 我已經要覺得好恩賜架啦, 妄想話佢可以陪我去行街睇戲食飯啦!!!