2009年6月13日(六) -- 終於考晒試啦~~

今日終於甩難啦, 終於考晒試啦~~

 

考完試, 一班同學仔去佐沙田麗豪酒店食buffet, yeah!!

 

煮飯仔

雖然我黎緊要考試, 呢排都係匿埋係屋企溫書. 但係唔知點解突然想煮下飯, 可能係之前整親隻腳, 要麻煩佐流沙包照顧佐我好耐, 所以我想做番D野咁啦.

 

因為我懶得搭車出去街市買菜, 所以只係去佐樓下百佳睇吓有咩材料煮.

 

今晚既晚餐有:

 

中湯一大煲

 

麻婆豆腐

 

排骨炒菜心 (我都係唔識炒菜, D菜比我炒到出晒水既?)

2009年5月27日(三) -- Scout Centre最後一堂

今日係PDPA係Scout Centre既最後一堂, 幾位同學仔都帶佐相機返黎影相.

 

可能小班既關係啦, 加上同學仔既性格都好active, 所以同同學仔既關係好似close好多. 回想以前係CityU讀BBA果陣, 即使讀佐三年, 但係同熟果幾位同學都無咁close, 起碼唔會定期約出黎搞D咩聚會.

 

反而同而家呢班同學仔, 有D只係識佐半年, 但係就已經出黎食過幾次飯. 而且好多時一出黎就係一圍枱十幾人, 我好鍾意呢種熱鬧既感覺~

 

所以最後一堂, 好似都有少少依依不捨既感覺.

 

由於翌日係端午節假期, 所以放學後一行13人仲一齊去咗佐敦食宵夜~~

 

另外我地已經約佐13號考完試果日去中大隔離果間hotel食buffet, 好期待耶~~

 

我好快就要離開香港喇, 希望同呢班同學仔可以繼續keep in touch啦~

 

 

血拼血拼~~

隻腳腫佐咁耐, 就困足係屋企咁耐(但當然都要返工啦, 意思係放工/放假都唔可以出街行下). 趁隻腳消佐腫, 即刻去SOGO shopping~

可能太耐無行過街啦, 所以一口氣買佐好多野:

 

 

 

買佐咁多野都係千四蚊咋, 隻花茶杯係流沙包送既~

點解D男人要留長手指尾既指甲?

成日都會見到D男人專登留長手指尾既指甲, 到底係咩原因呢? 有次搭地鐵見到個男人, 手指尾既指甲成吋長咁濟, 好核突耶...

 

我估計佢地係咪要留黎撩耳屎? 真係諗極都唔明留咁長做咩呢? 點解淨係留手指尾呢?

 

有無人知點解?

我以為咩野事排晒長龍, 原來係...

我今日出佐元朗廣場巴士總站搭968過海返工, 離遠見到一大條人龍, 心諗: "唔係化? 已經咁多人排隊等車?"

 

再行近D, 原來D人唔係排隊等巴士, 係排隊等攞免費報紙呀!

 

說話頭條日報會係巴士站對出派發報紙, 但係朝早D報紙仲未運到黎, 淨係得兩個派報紙嬸嬸企係度ready, 而D人就排晒隊係度等攞報紙.

 

唔係化? 痴線咩! 我仲以為咩野大件事, 條人龍長到差唔多有成六, 七十人咁濟.

 

平時一至四都見唔到有人排隊等攞報紙架喎, 今日星期五既報紙有咩咁特別呀?

車箱中化妝的人

我返工搭巴士果陣成日都見到有女士會係車度化妝, 真係佩服佢地可以0係行走中既車箱度畫眼線, 塗睫毛液... 佢地既專注力同穩定性一定好強.

 

不過我真係唔多明點解要係車度化妝? 我知係可以慳番D時間, 不過正如好多人所講, 咁做真係好似無咩禮貌囉... 正如你應該都唔會係車裏面敷面膜, 吱暗瘡掛?

 

同埋見佢地變臉既過程, 我覺得最恐怖既係, 化妝前同化妝後都無咩分別咋喎, 係面頰好誇張地多佐兩撻紅色野囉, 都唔知化黎做咩... 點解要話比全世界知你化妝同唔化妝既樣都係無補於事呢?

 

爛腳...

話說之前扭親隻腳趾, 於是去佐睇跌打, 翳佐一次藥(已經沖涼前拆佐架啦), 之後翳藥果個位就開始又痕又紅勒.

 

但係之後果個禮拜都無日得閒:

 

星期一要留係公司上堂;

星期二去學化妝;

星期三返學;

星期四學日文;

星期五做facial;

星期六返學(但逃佐學)+同中大同學仔食飯;

 

到佐星期日先至有時間去睇醫生.

 

但隻腳已經發到豬蹄咁勒.

 

但係醫生D藥膏我越搽越腫咁, 未搽之前都無水pop既, 搽完之後開始起水pop.

 

於是今日終於頂唔順去佐睇皮膚專科, 盛惠$700.

 

嗚嗚, 又痕又痛, 隻腳腫到無辦法平放係地下, 最慘連腳板底都腫埋, 行一步痛一步. 仲有好多水"pop"出水添喎, 救命呀~~

 

 

火炭大排檔食飯

星期六本來要返學的, 但係星期六果堂係taxation, 我以前BBA果陣已經讀過啦, 所有野我都已經聽過晒; 再加上我而家咪做緊taxation囉, 所以每次返去上堂都悶到嘔(又唔比我exempt呢科喎...), 終於頂唔順走堂. (而且我覺得中大呢個阿sir教得hea hea地. 以前我讀BBA果陣, 阿sir係本textbook既作者, 而且仲係律師, 講稅法我覺得講解得更加清楚)

 

中大同學仔之前plan佐放學後一齊去食飯, 於是我就淨係出去join佢地食飯~

 

今次既地點係火炭既大排檔, 我地11人, 叫佐好多碟野呀, 我覺得幾好味喎, 埋單每人都唔駛$80, 好抵呀~~

 

熱熱鬧鬧好開心, 希望就算畢業後我地都仲可以keep住出黎食飯啦~

又買notebook

我地又買多佐部新notebook啦, 今次買佐Lenovo既Y430, 流沙包話功能上呢部機比我部Fujitsu強, 但係個款就無咁靚囉...

 

今次呢部腦唔係我地自己用架, 係要黎送比我墨魚媽的.

 

其實阿媽都唔識用電腦, 但就話想買部notebook, 於是就買部番黎比佢自己篤下按下玩下啦~