Sweet Coffee -- 值得再去~

地址: 元朗西菁街23號富達廣場G30舖

電話: 2944 6949

 

上星期五諗住做完facial趕返屋企參加屋苑搞既慶中秋活動, 點知都係趕唔切, 激死人啦~ 搬佐入黎兩年, 一次都未參加過呢D慶祝活動, 無得去玩, 無得去食, 無得去抽奬...

 

趕唔切返黎玩就唯有去食飯啦, 都唔知食咩好, 盪下盪下去佐呢間餐廳食.

 

我地叫佐兩個set dinner share黎食, 一個係雞扒焗天使面, 一個係燒豬肋骨拼薯菜.

 

感覺上呢間餐廳幾用心去煮, 因為個焗雞扒天使面唔錯, 配料算多, 賣相幾靚, 味道都幾好.

 

不過我就稍嫌個rib麻麻地, 唔知點解佢呢個rib勁多骨, 骨與骨之間都無咩肉既, 唔抵食. 同埋薯菜原來係切粒薯仔, 如果係薯條/薯塊就好勒...

 

晚餐甜品我地揀佐芝士蛋糕同芒果布丁, 個cheese cake好食; 但個芒果布丁就完全唔掂, 淡而無味, 不過佢既質感唔錯喎, 好滑.

 

同埋杯熱檸茶都唔錯, 我以為係茶餐廳果D, 片檸檬篤多兩篤浸多兩浸就會變苦; 但呢度既檸茶唔同茶餐廳果D, 茶既味道好好, 同埋一D都唔苦~

 

是次消費每人約$150.

 

 

拍賣網 Vs 以物易物網 (下)

但估唔到而家竟然會興起barter, 於是我又好似以前咁, 將屋企所有唔等駛既野都放晒上網, 希望環保之餘(因為有D野如果無人要, 最後都會被我掉落垃圾筒), 又可以換番D有用既野返黎, 幾好架, 一舉兩得~

 

呢排我成日將屋企一D唔要既野放上去兩個香港主要既以物易物網, 分別係:

 

http://www.rever.com.hk/index.php

 

http://www.tradeduck.com/

 

我個人就比較推介Tradeduck, 因為呢個網多D人用, 同一樣物件, 放上Rever可以一直無人問津; 但放上Tradeduck, 有D野post上網唔夠十分鐘, 就已經收到好多回應.

 

同埋我覺得Tradeduck既functions同設計都好D~~ 起碼你可以知道每一樣貨品有幾多人要求交換, 咁就知道果樣野有幾人氣~

拍賣網 Vs 以物易物網 (上)

其實我相信每個人都有好多野係買佐返黎覺得唔啱 / 用佐幾次已經無再用 / 年紀大佐唔再適合用 等等既物品, 如果掉佐去又好似好浪費... 所以我由讀書果陣開始已經係拍賣網站既常客.

 

我第一個用既拍賣網叫「點點紅」, 想當年不知幾咁紅, 紅到0係各個旺區都設有交收站. 不過後來網站開始收費(唔記得係咪比人收購佐), 我就已經無再用, 而佢既氣勢同受歡迎程度亦已大不如前.

 

點點紅收費後我轉佐用Yahoo Auction, 當時仲係免費用, 我通常會係網站度賣CD, 書本等等; 而我買返黎既野多數係教科書, Keroppi既野等等.

 

後尾連Yahoo Auction都要收費既時候, 我就退出佐auction界lu.

 

或者你會問仲有個e-Bay架喎, 但唔好意思, e-Bay HK雖然我有登記過, 但就無買賣過, 因為e-Bay HK完全係不成氣候, 貨種又少, 係香港又唔夠popular. 我只係試過係外國既e-Bay幫朋友bid佐盒Lego玩具返黎, 僅此而已.

 

當年都好似仲有個拍賣網叫GO2HK既, 不過都好似執埋囉...

~~日本同事的飯盒~~

好開心, 尋日個日本同事幫我帶飯~~

 

有豆腐, 豆, 南瓜, 豬肉, 芋頭, 好味道~~

 

2008年9月6日(六) -- 返中大上堂

今個星期終於都要返學啦, 星期三就返Scout Centre, 星期六就返中大campus上堂. 每堂都要上三個半鐘, 都真係幾難捱.

 

星期六果堂就好D, 講Business Law, 一來同我工作上有直接關係, 我上堂都專心D, 二來阿sir都幾風趣幽默, 時間好快就過.

 

但係星期三上Financial Management, 一來D野又悶又難, 二來阿sir又悶講D野又深, 時間好難捱呀~ 阿sir好似assume我地已經識好多野咁, 好多technical terms我都聽唔明, 黎睇我要返去溫番以前學過既野先得... 

 

我要努力呀!! GPA如果唔過3, 就上唔到第二年Master架啦~~ (雖然讀1年已經可以考QP, 唔一定要讀埋第二年Master)

 

(本來諗住星期日溫下書, 但係掛住打NDS, 咩都無溫過, 嗚...)

 

2008年8月29日(五) -- orientation dinner @ CUHK

今日放工後入佐中大, 因為今晚有個orientation dinner, 七點半開始, 我七點五左右去到, 佢按人名一早劃好晒位, 可能我個姓排得前, 所以坐係第二枱.

 

我去到果陣我果枱已經坐佐一半人, 我左面係個女仔, 右面係個男仔, 其他既都係年過三十歳既中年男士, 仲安排佐每枱有一個黎緊會教我地既Professor. 成枱人計埋我就係得兩個女仔.

 

dinner七點半開始, 首先係介紹下我地呢個course, 然後當晚請佐HKICPA既Vice President黎講野, 跟住介紹下D Professor, 然後就有得食啦~

 

今晚餸菜都唔錯喎, 好好味, 有雞有魚有炒飯有伊面有紅豆沙, 同我尋晚去飲 食果D野差唔多, 差別係今晚呢餐唔駛錢.

 

除佐食之外, 當然要同其他人傾下計啦, 當晚識佐三個新朋友, 雞啄唔斷, 搞到有人問我地係咪本身已經認識, 話覺得我地好friend咁. 我地大家仲交換佐MSN同電話~ 唔知點解, 我對住一D新相識初見面既人可以好多野講架喎; 但識耐佐果D我反而提唔起興趣去同佢傾計.

 

另外席間有位男士突然問我:「睇你個樣好似fresh grad咋喎, 點解會黎讀呢科既?」嘩, 開心死我~~~

 

呢餐飯食得幾開心~ 

我對婚宴的想法

上一篇blog引黎好多回響添~ 可能我講得唔太清楚, 意思表達得麻麻地. 其實我最想表達既係: 點解而家既婚禮流程一定係播片, 進場, 切蛋糕, 敬酒, 致詞既呢? 點解係婚宴上一定要做呢D野呢? 係幾時開始約定俗成要咁做既呢? 舉個例, 我地父母果一代結婚, 科技無咁先進, 應該唔會有播成長片段呢個環節呱? 到底係幾時開始, 婚宴上要播放成長片段的?

 

又例如, 以前D人係婚宴上好興玩新娘新郎, 但而家大部份既婚宴都無佐呢個環節. 咁又係幾時開始呢part節目開始消失既呢? 

 

我想講既係, 點解而家既婚宴一定要做果幾樣野? 依時代既變遷, 可能將來唔會再播成長片段; 可能又會出現其他趨勢. 我相信當初於婚宴播成長片段, 應該係由一小撮人開始, 最後變成係人結婚都一定會播片. 會唔會有人黎緊再帶領"潮流", 唔再沿用而家大家結婚用緊既公式流程, 自己去創出一些新的安排出來呢?

 

所以黎緊就結婚既朋友, 你唔需要為我上一篇blog而感到壓力, 我想講既只係而家婚宴流程既趨勢, 而唔係想針對話咁樣咁樣真係好悶...

2008年8月28日(四) -- 去飲

星期四晚去佐九龍灣飲, 我以為平日去飲會早D開席添. 原來都係九點先開始, 播片進場敬酒致詞等等, 九點三起菜.

 

其實我一直都覺得結婚飲宴好公式化, 一定係:

-先播成長片段(大部份都幾悶, D相又無咩特別, 除非我同你由細玩到大有共鳴, 否則我對你既成長其實無咩興趣)

-進場(例牌一定要放花炮)

-切蛋糕(明知個蛋糕係假的)

-敬酒

-新人致詞(你唔講我都估到你實係多謝爸爸媽媽, 另一半既父母, 多謝另一半為佐籌備婚禮辛苦晒, 然後就請大家今晚玩得開心D)

-起菜(一定係起音樂然後D侍應好「浩浩蕩蕩」咁捧住D乳豬入黎.

-再上菜(來來去去都係食果D野)

-新人連成班鄉村父老逐枱去敬酒(明知你手上果杯只係茶/汽水)

-再上菜(魚, 雞, 飯, 面, 糖水走唔甩)

-送客(佢對手掂下你力都無用下就叫握佐手...)

 

講真其實都幾悶, 但係我結婚果陣都一樣沿用番呢條公式. 其實我有諗過到底結婚飲宴可唔可以搞D咩新意思呢? 個個飲宴都係咁毫無特色, 幾年後我都唔記得你個婚宴到底係點...

 

所以如果你地係未結婚既, 我覺得你地不妨搞搞新意思, 唔好個個人結婚都係做埋同一樣既野, 比自己同賓客留下更深的回憶~~ 

葵樹坊 Casa Cafe & Restaurant -- 唔錯呀~~

地址: 元朗大棠路48A-48K昌發大廈8-9號舖
電話: 2474-6868

星期日同阿妹預祝生日, 一家人黎佐呢度食飯. 我唔知係奧運閉幕既關係, 定呢間餐廳一向都無咩生意, 星期日晚八點半都無人既? 我地差唔多包場咁濟, 成間餐廳得兩, 三枱客...

 

我地叫佐個晚餐(有前菜, 鱈魚拼雞扒飯, 生果), 田螺, 牛扒拼鵝肝, 忌廉莧菜, 薑汁豚肉薄餅, 帶子鵝肝炒飯, 三文魚蟹子意粉.

 

總括黎講D野都唔錯呀, 個薄餅幾好食. 不過佢地話個牛好韌, 同埋我覺得鵝肝麻麻地.

 

是次每人消費約$130.

2008年8月22~23日(五, 六) -- 打風放假

星期五, 又打風, 唔駛返工. 打風係聯誼既好日子, 所以我地落佐屯門同班friends一齊飲茶, 跟住就去振宇屋企玩~~

 

而家D食肆真係勁, 9號風球都照常營業, 夜晚都唔駛驚無飯食. 我地由朝玩到"清晨"過後三點幾先走, 真係攰過返工.

 

黑仔到暈, 輸佐成五舊水麻雀.

 

 

星期六, 到振宇佢地上黎我地屋企打邊爐. 我搬佐入黎約兩年, 都好似未試過係屋企打邊爐.

 

陣沙嗲味係屋度兩日都未散, 勁呀~~~