2008年2月1日(五) -- 又到佐呢一日...

今日又到佐一年一度唔想過既日子. 如常返工, 朝早十點幾無啦啦有個男人拎住紮花入佐黎office叫我簽收, 好surprised呀!!! 勁驚喜超開心, 嚴格黎講今次係我成世人第一次正式收花(之前收得一枝果D, 或者畢業收果D唔算呀~), 之前拍拖D ex, 從來都無送過花比我, 不過都好既, 因為第一次收花就係流沙包送既, 哈哈,  原來收花既感覺係咁開心的!

 

Lunch就同佐成班同事出佐去食, 放工就同流沙包一齊上山頂, 好凍呀!! 我地搭纜車上去, 上到去就係太平山餐廳食飯, 食飯果陣都有驚喜, 好開心呀! (詳情留番下篇食評講)

好耐未試過呢一日過得咁驚喜特別, 多謝你呀流沙包!

都係覺得自己結婚既成長片段比較特別D... 嘻嘻~~

啱啱個星期日要同流沙包一齊去飲, 其實呢餐飲宴既主角原則上我係唔識佢地, 個新郎係流沙包個細佬既中學同學, 所以同流沙包屋企人都熟, 我地結婚果陣都有請佢黎飲. 今次到佢結婚佢就請流沙包伉儷去飲. 所以我除佐知佢叫John Tam之外, 我對佢一無所知.

 

今次去飲既地點係銅鑼灣, 所以我同流沙包就早D出佐銅鑼灣行街, 我買佐好多新衫新褸呀, 仲買佐D賀年禮盒, 買佐blueberry tea, 好開心~

 

今次去飲既呢餐, 由於我都唔識兩位主角, 所以其實幾悶. 通常開席前都會播一D主角既成長照, 睇佐咁多都係覺得自己結婚時整既成長片段比較特別(比較特別啫, 我無話好特別呀~), 因為起碼有D特別效果睇下咁, 感覺上無咁悶.

 

飲完之後我再搵番我結婚時播既成長片段出黎懷緬下, 睇番都覺得幾悶架喎, 哈哈~

 

我地果陣段片有咩特別? 我偉大D放上黎比大家品評下啦, 哈哈~~~ (重申: 都幾悶架, 哈哈)

 

2008年1月26日(六) -- 震騰騰燒野食

上星期六陪佐個同事去雅麗睇結婚租既衫, D衫靚佐好多呀, 仲靚過我果陣結婚果D衫. 雅麗D staff好勁架, 我舊年四月結婚, 佢地仲認得我, 仲記得我叫咩名, 記得流沙包既職業係咩, 勁呀!!

之後就去佐荃灣既川龍BBQ, 好凍呀, 咁既天氣BBQ, 真係另有一番風味, 舊煨蕃薯都好食D, 哈哈~~

Bistro Delifrance -- 完全唔掂

地址: 銅鑼灣勿地臣街1號時代廣場地庫
電話: 2506-3022

上星期五係銅鑼灣食飯, 天氣凍唔想食日本野, 又唔知食咩好, 行行下又腳痛, 見到Delifrance於是就決定黎試下.

我地叫佐個2人套餐A, 有餐湯, 蒜蓉包四件, 一個雞肉野菌意粉, 一個焗豬扒飯, 兩杯飲品. 我地仲加佐$18要個brownie.

個雜菜湯稀到好似飲水咁, 好淡, 未飲過咁難飲既雜菜湯. 個雞肉野菌意粉得幾粒仔雞肉, 個味道又唔得. 個豬扒飯, 味道好怪, 流沙包話大家樂果D都好食過佢. 個brownie... 一句講晒, 唔係好好食囉...

同埋呢度D服務唔得, 果個所謂既assistant manager, 比人既感覺係輕佻浮躁囉...

我唔知係呢間分店先係咁差呀, 定全線都係咁既哩?

鈴木咖啡館 -- 普通

地址: 上環德輔道中199號維德廣場地下G07-08號鋪
電話: 2854-1616

話說我同GM及幾個同事耐唔耐就有飯局. 之前幾次都諗唔到去邊又無咩idea, 所以次次都係去萬宜大廈既Kuraudo, 起碼都食佐四, 五次. 今次我就提議黎Suzuki Cafe呢度, 因為開佐無幾耐. 呢度既set dinner包餐湯, 主菜同甜品, 但就唔包括飲品(可能呢度都主力賣coffee, 想你地另外比錢叫掛?)

 

餐湯係蕃茄湯, 我覺得鹹佐D. 主菜係咖喱雞肉奄列紅飯, 但個奄列就舖係飯面, 而唔係包住D飯, 味道其實唔錯, 可惜雞肉少佐D, 得果幾條少少.

 

反而個甜品幾好食, 係熱辣辣既窩夫, 連GM都話成餐飯最好食既係個甜品.

2008年1月19日(六) -- 南生圍

今日同流沙包去佐傳說中既南生圍, 由於我今日三點先正式起身(我九點幾果陣起佐身架, 流沙包果陣未醒我就做下自己野, 之後又再訓過咋麻), 所以入到南生圍都已經四點幾. 我地係紅毛橋果個巴士站落車, 然後一直行, 一直行, 一直行, 一直行... 點解行極都仲係果條路, 未見到柳暗花明又一村架...?

行佐成個鐘都仲係果條路, 行極都好似行唔完咁. 然後到差唔多日落, 先見到一處種佐好多樹既地方, 傳說中話好靚既南生圍係咪就係果塊地? 我地沿住個「樹林」一直再行, 終於無路, 要搭果D橫水渡過對面岸, 好得意幾好玩~

 

之後再行番出去, 就係元朗西鐵站勒.

 

果晚我地去佐西鐵站隔離既西鐵燒烤樂園BBQ, 好滿足的一天~~

2008年1月18日(五) -- 十下十下打邊爐

入佐黎呢間公司未夠一年, 但不知不覺間我同另一位同事好似成為發起同統籌公司聯誼活動既負責人咁. 繼羽毛球+壁球運動日, 碌ling同樂日, BBQ之後, 今次我地搞十下十下打邊爐. 地點係灣仔既德興.

 

我地今次一行九人, 食物就任點任食, 但飲品就要另計. 食物種類都算幾多, 上得算快, 同埋都算幾新鮮. 飲品方面我地叫佐兩jar竹蔗水, 兩jar橙汁同叫佐壼茶. 最後埋單每人$135.

 

今次唔記得帶相機, 無影相. 不過我地個個掛住食, 就算帶佐相機都未必得閒影, 哈哈~~

2008年1月17日(四) -- 心情超壞

呢個星期心情都好差, 因為日日都忙到顛, 得閒死唔得閒病, 吊頸都無時間抖氣.

幫D客去銀行問野, D死人staff態度又超差, 又晦氣, 恒生果D係咁, HSBC果D又係咁, 一D禮貌都無, 仲要句句「得」埋黎. 我又受氣, 搞到我條氣好唔順.

終於send佐個mail比GM話我頂唔順, 我好大壓力.

放工本來諗住去配副新眼鏡, 流沙包帶我去佐深水埗某一眼鏡舖, 但一來我心情唔好, 二來叫佢地介紹下D款比我, 佢地淨係話「擺晒係度架啦」, 我唔滿意佢地既服務態度, 於是發流沙包晦氣, 無配到眼鏡就走佐出眼鏡舖.

今日心情真係好差, 差到好核突咁忍唔住係條街度喊, 真係羞家.

然後又話無胃口食飯, 扭扭擰擰咁話咩都唔食.

如果我好似HEROS裏面既Hiro咁可以穿越時空去見番果刻既自己, 我相信我都會忍唔住好想摑當時既我一巴囉... 好彩流沙包EQ高, 無論我幾無理取鬧都容忍我氹我.

流沙包, 對唔住呀. 我知我係好任性好細路女. 不過有你呢個好老公, 我先可以有地方宣洩下任性下. 多謝你呀~!!

米線大王 -- 平到你唔信

地址: 元朗阜財街20A1號舖
電話: 2477-9420

上星期一本來諗住買餸返屋企玩煮飯仔, 但最後都係決定係出面食就算. 我地第一次黎米線大王食, 叫佐個二人餐, 有湯, 雞半隻, 桂花魚一條, 咖喱薯仔雞翼, 菜一碟, 白飯一大碟, 米線一碗, 飲品兩杯. 大家估下呢個二人餐要幾錢??

開估啦~ 盛惠七十蚊. 係咪好痴線呀? 我地叫既呢個二人餐算貴啦, 仲平D都有呀. 真係唔知佢地點樣有錢賺.

當然, 衞生同服務就無乜架啦. 總算食完無肚痛.

2008年1月12日(六) -- 昂坪360

今日我地去佐搭昂坪360, 行佐昂坪市集同上佐大佛. 今日天氣好好, 陽光普照.

 

pipi誠心向佛: