2007年9月6日(四) -- 出佐成績, GPA3.91, 終於畢業啦!!

等佐好耐, 終於出埋最後一科既成績, 都係我預計既A, 最後既GPA係3.91, 攞唔到4添, 哈哈哈~~

本來之前報佐個QP conversion course既master, 不過佢唔收我, 所以呢一年我都未有咩讀書計劃, 暫時係報佐今年日本語能力試驗1級. 黎緊睇下好無學番琴或者學番flute, 不過結婚後既新居無鋼琴, 所以如果學番琴似乎就難D, 無琴練. 學flute我又唔夠氣, 唔識用丹田.

同埋我會增值下自己既英文同普通話, 睇多D英文報紙同明珠台, 迫流沙包得閒同我用英文溝通.

仲有咩野可以做呢?

2007年9月2日(日) -- 睇示範單位

9月2號難得流沙包無野做, 於是就兩條友無無聊聊去睇示範單位, 目標係天水圍既栢慧豪園. 我地其實根本無諗住買既, 要換樓我都唔會再搬番入天水圍, 去睇樓只係諗住過下日神. 係元朗有專車送你去示範單位, 我果時先知原來個示範單位係紅磡漁人碼頭.

 

一路上有個agent姐姐跟住我地, 佢話咁多座已經賣晒咁濟, 而家得番第一座. 去到睇佐三個示範單位, 一個3房七百幾呎, 一個2房六百幾呎, 同埋一個好似2房五百幾呎? 其實我都唔太記得D呎數啦, 只係睇完覺得唔掂, 個廳細到死, 即使係七百幾呎果個單位, 個客廳係無辦法放到電視櫃架囉, 超窄, 個示範單位都只係擺張梳化, 一張茶几仔, 個電視已經按佐係牆上面, 根本再擺唔落電視櫃.

 

同埋個主人房又係勁細囉, 佢個示範單位好似只係放普通雙人床而已, 加埋個衣櫃都無咩位淨. 我地訓開queen size架喎, 點搞呀? 個agent話我地住開低密度既, 唔能夠用低密度住宅果種眼光去睇呢D「標準樓」喎... 雖然果D幾廿層高既「標準樓」個會所真係幾吸引, 不過我暫時都係鍾意住番D低密度樓.

稻香 -- 服務超唔掂!!!

地址: 元朗馬田路38號怡豐花園地下32舖
電話: 2475-9251

上個再上個星期六朝早同流沙包飲茶, 呢度裝修完之後我第一次黎, 但感覺呢度既服務水準就差佐好幾皮, D阿姐完全唔掂囉, 無禮貌. 首先入到去無人招呼既, 我差D以為返番去以前自己搵位隨便搭抬果隻呀. 我入到去棟係度D阿姐見到我都無人埋黎serve.

食物就唔講啦, 飲茶都係果D野啦, 不過另一個例子就係我地D野食唔晒叫阿姐比個盒我地打包拎走啦, 個阿姐都唔知聽唔聽到, 佢唔應你囉. 轉個頭行埋黎比個盒你, 但聲粒唔出淨係搵個盒頂下你示意你接住, 嘩, 你算係咩服務態度呀?? 離晒譜!! 元朗咁多間酒樓, 我短期內都唔會再黎幫襯呀!!!

 

三上日本料理 -- 都算幾好既

地址: 元朗大棠路紅棉大廈B-C舖
電話: 2411-1807

上個再上個星期五晚約佐個舊同事食飯, 元朗最多日本料理, 所以我地都去佐食日本野. 我地叫佐個蟹籽沙律, 鐵板帶子, 幾件壽司, 三文魚軟殼蟹卷同一個豬軟骨拉面.

呢度既食物質素都OK, 我覺得個鐵板帶子幾抵食, 用鐵板上大約有6粒帶子, size都唔算細.

是次消費每人約$90

 

 

Turin Cafe 都靈 -- 不妨一試~

地址: 元朗又新街61號運興樓地下2號舖
電話:  2473-9108

8月30日又係出job既日子, 地點都係果間公司, 係觀塘. 我開始熟習點樣做呢間公司, 有少少滿足感耶, 同埋好順利咁balance到條數, 果種感覺係幾有成功感, 哈哈~ (如果計黎計去都平唔到條數我會發忟憎)

放佐工約佐流沙包係元朗食飯, 個衰人係西貢玩完wakeboard, 要成兩個幾鐘先返到入黎元朗, 我就係餐廳等佐大半個鐘, 哼!!

食物方面, 呢度既set dinner有餐湯, 頭盤, 主菜, 餐飲及甜品. 呢度既頭盤我覺得就普普通通啦, 主菜方面都OK既, 不過上菜實在上得太慢啦...

至於環境同氣氛, 我覺得呢度比未搬之前差D囉.

 

 

悔不當初

做人, 真係有時唔知好過知. 只要你不知道, 你還會活在幸福當下; 但是一知道真相, 就立刻要面對殘酷的事實.

 

係我唔好, 我唔應該將一D根本不應說的事情說出口, 傷害了別人. 我知道事實後, 我內心也不好受, 自從果次之後, 我一直都好唔安樂. 而那件事更加速導致了一件我不想它發生的事終於都發生了, 只怪我! 這幾天, 我一直在內疚, 傷心, 痛苦, 不安, 難過... 是我對不起他, 但是一切都已經太遲, 沒有辦法彌補. 我一直怪自己當初不應將答案告訴他!!!

 

對不起, 是我不好! I wish you have a better future!!! I believe you can!

 

恋人以外の男性のため 泣いたのは…初めてだろう…

2007年8月29日(三) -- 探BB

今晚放工返佐奶奶度食飯, 食完飯上去流沙包個妹屋企探BB, 個BB一星期大, 我仲試下抱佢添喎, 軟冧冧, 好可愛耶~

 

不過BB肚餓扭計喊, 所以我地睇佐陣BB就要走啦~

下次再探過外甥仔啦~~ (D相好昏暗, 因為我地無開晒D燈, 又費事用閃光燈影相嚇親BB) 

另外大家覺得BB滿月買咩好呢? 係咪多數會買金鈪仔, 金牌仔, 金鍊仔果D架? BB用品就唔買啦, 佢應該已經應有盡有的了.

一遊日本料理 -- 好味好味~~

地址: 尖沙咀諾士佛臺1號其利中心4樓
電話: 2366-2999

上星期二係gathering日, 我地去佐呢間日本料理, 呢度環境氣氛幾好, 好昏暗, 幾有情調. 我地叫佐好多野食, 不過無影相.

 

想推介果度既藍莓茶, 勁好飲~

 

是次每人消費約$215

 

 

流沙包榮升大專講師~~

上個星期一係流沙包返新工既日子, 流沙包終於脫離小學, 由今個學期開始正式進軍大專行列, 恭喜流沙包!!!

 

似乎結佐婚之後, 我同流沙包既轉變都幾大喎, 我就離開佐工作佐4年既TDK; 流沙包仲勁, 離開教佐十幾年既小學. 我地都朝住人生既另一個目標繼續進發~

 

係咪因為我旺夫呢?? 流沙包以前想轉工都轉唔成, 結婚後就可以教大專, 我仲唔係旺夫?? 哈哈哈~~~~

新星海鮮火鍋酒樓 -- 都係咁啦~~

地址: 元朗青山公路元朗段49-63號金豪大廈地下至3樓
電話: 2478-2011

我地上星期日去試佐新酒樓, 我地叫佐個沙律明蝦角, 餃類拼盤, 叉燒腸粉, 流沙包同桂花糕. 價錢又唔算好貴既, 食物既質素同味道都一般啦, 無咩特別.