2007年3月4日(日) -- 買結婚D野

我地仲有好多結婚既野未買, 流沙包話佢今日得閒, 於是就打算今日出去買野, 但之前流沙包又同佢屋企人講我地今日會去買野, 於是就唔知點解要一齊去買勒. 因為流沙包一早又去佐做野, 我地約佐兩點係屯門等, 流沙包屋企人仲未到, 於是我同流沙包就去佐食野先. 食食下佢個妹打黎, 我都唔知流沙包同佢個妹點溝通, 講極都搵唔到對方既? 搞到流沙包個妹好嬲. 跟住我地去佐買龍鳳戒指, 奶奶話用黎送比我地兩個. 買完戒指我地去佐買海味, 我唔係好明點解買海味我同流沙包都一齊去既? 我地出黎打算買皮帶, 褲, 拖鞋, 枕頭之類既野呀...

由於禮品店個老細打黎話我地send比佢個design有D問題, 唔知點解D顏色變佐做綠色, 於是買完海味後, 我同流沙包就返元朗, 索性比隻手指個老細. 去到用手指開個file係無問題呀, 但輪到格式又唔啱, 字既顏色又要改.... 唉呀, 一個月後就要擺酒啦, 到而家都未搞掂D帖, 我真係超級忟呀!!! 於是我地就即刻返屋企, 流沙包即刻開電腦再改, 改佐幾個鐘, 再去番間舖頭將隻碟比老細, 佢話佢星期二朝早會去印刷廠喎, 到時有咩消息再通知我地, 希望一切順利啦~

結果我地今日話買野, 但最後就咩都無買到, 幾時先再得閒去買呀?? 流沙包先生...

 

目黑壽司 -- 不過不失

地址: 元朗朗日路8號新元朗中心商場2樓206-208號舖
電話: 2443-3606

2號果晚買完過大禮D野就近近地係新元中食飯, 去佐目黑壽司食, 我地叫佐好多野呀, 有花之戀啦, 壽司啦, 串燒帶子啦, 雞胸軟骨串燒啦, 炸薯餅啦, 咖喱雞鍋飯啦, 其他都唔係好記得勒. 食物都唔錯既, OK啦.

2007年3月2日 -- 買過大禮D野

我18號要過大禮, 所以今日放佐工就同流沙包去西鐵站果間請柬禮品專門店度買過大禮既野:

男家過大禮套裝:  $338
女家回禮套裝: $238
鬆糕大發: $188
睡衣: $38
茶具: $68
龍鳳碗筷兩套: $38

當初雙方家長又話一切從簡, 都唔明點解搞搞下要搞咁多野, 奶奶話我地女家回禮除佐鬆糕大發之外, 仲要回煎堆60個... 下? 到時D煎堆隔晒夜又淋pat pat, 派比人都無人會食架啦?

另外呢度仲可以幫人印請柬, 我地4月7日擺酒, 到今時今日都仲未印帖!!! 我地會自己設計再搵人印, 問佐價錢最少印300張每張$5(如果少過300張每張又貴少少, 即係價錢又係差唔多), 價錢都OK啦,  於是今晚返屋企e-mail個design比老細睇下, 無問題就可以係度印.

2007年3月2日(五) -- 終於死得去send個CV比agency

今日, 唔知點解, 終於死得去send個CV比agency. 傍晚個agency打黎問佐我D野, 以下係我地大致上既對話:

agency: 你想搵D咩野工呀?
我: 我唔想再做sales co呢行啦, 我覺得無前途呀.
agency: 咁你即係想搵D咩野工呀?
我: 其實我從來都無轉過工, 我都唔知而家出面個market係點, 不過我唔想再做電子零件呢D, 我想做D end products呀.
agency: 你無端端點解會想轉行架?
我: 我讀緊個course, 就黎畢業, 想試下第二D工作.
agency: 你讀緊D咩呀? (我估佢即刻望下我份CV) 哦, BBA咋麻, 好普通咋喎.
我: (我無話BBA好特別...) 但我真係唔想再做sales co呢行啦.
agency: 但你做佐sales co咁多年(都係兩年咋喎...), 都應該係番呢行發展, 日本公司多數都係sales co或者sales executive架啦喎...
我: ...
agency: 咁啦, 我地約個時間, 你上黎見一見啦...

於是乎我就約佐3月6日上去見agent勒.

不過講完呢個電話之後, 我真係好沮喪, 難道入佐行就真係唔駛旨意轉行? 點解人既前途同將來好似一定要取決於出黎做野頭果幾年時間? 如果做做下我真係發覺唔適合自己, 發覺無發展空間, 難道唔可以去試下其他野嗎?

(唔駛理我我都係得閒呻下)

找尋結婚音樂!!

我想問下大家有無以下音樂呀? 有的話可唔可以send比我呀?? 我e-mail係chingchingstarstar@yahoo.com.hk

同埋大家對擺酒時播放既音樂有無咩好提議呀?? 我既原則係盡量唔播廣東話歌, 盡量唔播行貨歌, 如上乳豬播麥嘜豬腩肉, 例牌播你的名字我的姓氏, 小玩意呢D我一律唔會播, 我多數會揀日文歌同英文歌黎播, 大家有無咩好提議比我呀??

感謝大家!!

以下是我想搵既音樂清單, 麻煩大家有既就send比我呀, 謝謝!!

愛是不保留

(婚禮版) 我信愛是恆久

遇見(純音樂)

大白鯊鯊魚出現時的音樂

This is where I came in (2001), from BeeGees有隻叫wedding day大碟

全因為你

98 Degree - I Do (Cherish You)

SAY YES (日劇101次求婚)

linkin park or slipknot

I WiSH-約束之日

日劇「天使之路 –VIRGIN ROAD」主題歌

Perhaps love

Two less lonely people in the world

Emiya -Kenji Kawai ver.

Imperial March

賽馬(William Tell Overture)

you are so high ( FF9 主題曲)

英超音樂

將軍令

Sometimes when we touch- Dan Hill

Mr. Children的and I love you

王力宏 - Forever Love

陶喆-就是愛你

今天你要嫁給我 ( 陶喆&蔡依琳 )

wonderful tonight

Quando, Quando, Quando

Truly, Madly, Deeply

celine dion - ''because you loved me''

The Wedding Singer--I Wanna Grow Old With You

L.O.V.E. by Nat King Cole

elvis costello - ''she'

A Whole New World

Phantom of the Opera的All I Ask of You

As the Deer

Wagner的 Bridal Chorus

J.S. Bach的Jesu, Joy of Man's Desiring

J.S. Bach 的 "Air" from Orchestral Suite No. 3 in D Major

LOVE LOVE LOVE-dream comes true

世界で一番君が好き？ 平井堅http://www.9ymp3.com/song/116239.htm

EVERYTHING MISIA http://www.9ymp3.com/song/114313.htm

天長地久KIRORO  http://www.9ymp3.com/song/47541.htm

手提電話

其實我用佐手提電話差唔多10年, 大家估下我總共用過幾多部電話?? 我相信大家換電話既次數應該多到都未必記得. 但係我好記得喎, 因為... 我10年黎只係用過三部電話, 即係平均3年先轉一部, 勁哩~?!!

記得中學A-level出佐第一部電話, 果陣間公司好似叫1+1, 因為果陣阿媽比錢, 所以出佐部好舊款黑色一舊, 好似係Ericsson既電話, 記得果陣部電話好快無電, 備用時間得十零廿個鐘, 通話時間只得幾個鐘, 每日返去都要叉電.

後尾入佐U, 我就轉佐台去One2Free, join佐佢個學生plan, 改佐電話號碼之餘(果陣都未有攜號碼轉台), 仲買佐部新電話, 型號係Sony Ericsson既T-28, 當時黎講算係最新, 機價我記得好似成三千蚊. 部機一用就用佐差唔多四年, 用到由最新款既電話, 變成最老土既電話, 因為之後個個都用緊彩芒, 和弦鈴聲, 可以上網, 影相既手提電話, 而我仲用緊一部黑白芒, 得普通鈴聲, 一部四年前出品既史前電話. 我果陣拎部電話出黎都要左遮右遮, 講電話果陣就盡量用手或者頭髮遮住, 費事比人睇到我仲用緊部咁舊既電話.

T28

到佐三年幾前, 雖然部電話仲未壞, 但係我頂唔順啦, 終於死去買部新電話, 係當時算係新既Sony Ericsson T630, 呢部電話用佐幾耐?? 我用佐三年到而家都仲用緊喎... 我幾時會轉?? 唔知呀, 等到有一日我拎個電話出黎又要左遮右遮先算啦~ (雖然而家用電話已開始遮遮掩掩). 其實我個人比較懶, 我覺得轉電話要由頭適應部新電話既用法係一件好煩既事, 我又懶睇說明書, 所以只要個電話一日未壞, 我對換電話呢樣野都可免則免, 因為我又唔係果D幾個月就要轉款既人, 有時間係度追新款, 做information search, brand evaluation, 比時間適應新電話, 我不如用D時間黎溫下書, 休息下好過.

T630

(鬼叫annual dinner抽唔中新電話呀, 哼!!)

高價徵求!! Keroppi結婚公仔~

N年前Keroppi有出過一對結婚公仔, 記憶中當時售價係$199, 果陣成日見到, 但係就無諗過買, 亦都無諗過買定第時結婚用.

到今時今日, 搵車頭公仔, 先回憶起呢一對Keroppi結婚公仔, 可惜已經太遲, 已經再見唔到街度有得賣. 我上所有拍賣網睇過, 香港的, 日本的, 台灣的, 完全發現唔到有呢對公仔賣. 很沮喪...

請問各位有無見過仲有邊度有得賣? 或者有無人願意割愛? 本人願意高價收購~! 感激不盡!!

仲有一個月就擺酒了, 點解我無咩特別感覺既...??

到現時為止仲有以下事情未做:

1. 訂購過大禮物品(3月18日過大禮, 之後才能派帖)
2. 買長褲(新郎及新娘)
3. 買襪兩對
4. 買銀包(女家回禮to新郎)
5. 買皮帶(女家回禮to新郎)
6. 碗筷2套(新郎及新娘)
7. 男家買海味過大禮用
8. 茶具(敬茶用)
9. 買cushion(敬茶用)
10. 買餅卡(3月中去婚紗展買)
11. 到酒樓取餅卡及酒
12. 到酒樓商討菜單及細節
13. 印請帖
14. 揀音樂
15. 商討場地佈置
16. 訂花球(網友推介屯門雅都商場2樓芊芊花店)
17. 租車
18. 訂煎堆(女家回禮用)
19. 買車頭公仔(我想搵Keroppi N年前出過果對結婚公仔呀!!)
20. 造簽名布+買簽名筆
21. 訂回門豬
22. 買回禮利是封
23. ???

你做過D咩兼職?

我中四開始就已經做兼職, 果陣係一間琴行仔學琴, 個miss兼老細就叫我星期六, 日落去做睇舖. 當然中五既暑期工亦都係果間琴行度做啦, 我仲好記得當時既時薪係$18.

入U前果年我又做過輕鐵既臨時調查員, 即係企係車卡門口位置, 不停遊車河到每個站數下有幾多人上車落車咁.

然後我又係女青年會做過鋼琴教師, 不過佢呢份係超剝削兼刻薄既廉價勞工, 通常你去琴行教, 學生既學費係同琴行一人一半, 老師唔需要操心學生有無交學費, 去邊度買書呢D事. 但係女青教, 佢唔會幫你睇下個學生有無交學費, 試過有學生上完堂, 個staff先話個學生無交學費, 個學生又死都話交佐. OK咁算囉, 我當free果堂唔收錢勒. 點知女青佢PK到話唔會出果堂人工比我不特止, 仲要扣我人工, 因為佢話D學生既學費仲包括租用琴室既費用, 所以即使我唔收果堂人工, 佢都要我嘔番果堂既「琴室租用費」出黎, 離晒譜!!

你請我黎教咩都唔包, 唔負責追學費唔包買書, 咁我搵D學生上自己屋企教都得啦, 我做咩仲要同你對分學生D學費呀!! 我果陣連琴書都要幫學生去買呀! (其實我可以不負責任地寫個書名叫D家長自己去買, 但黎得女青學琴既仔女家長都係D屋村師奶, 咩都唔識, 英文又唔識多個(琴書全部都係英文名), 我當好心幫手買埋)

之後我又做過日本語能力試驗既監考員, 做監考員真係好悶, 行行企企又唔傾得計.

然後我又做過源吉兆庵既禮盒包裝員, 果陣係新年前, 係賣禮盒既高峰期, 你知日本D禮盒包裝得幾咁精美架啦, 款款都有唔同包裝, 唔同既包裝紙, 包完又要係外面加條繩縛蝴蝶果隻. 果陣工作地點係SOGO地庫, 類似貨倉既地方. 果陣公司都算係咁, 如果果日生意額超過唔知幾多十萬, 就會派$50利是, 都幾和味架.

當然我仲有做過補習啦, 上門同D小學生補習, 呢個最好搵, 因為小一都最少收$50/hr, 小六就好似收$70~80/hr. 我果陣同時有補屋村既學生同住私人樓既學生. 私人樓學生真係補得輕鬆D, 因為佢地通常自己一間房, 我地就係房入面補習, 所以我可以同學生傾下計, relax D. 但係同屋村學生補, 佢地唔會有房, 要係廳補, 個阿媽就坐正係隔離, 我就覺得好大壓迫感, 同埋個阿媽又成日出聲, 又話佢個仔咁又咁, 過晒鐘都無意思停口比我走, 餐餐都補突一個鐘(我補私人樓學生都唔會準時一個鐘即走咁肉酸, 都會補多五至十分鐘先走, 但呢個係我自願囉), 又唔補水, 所以我好憎補屋村學生.

你地又做過咩兼職?

南山谷韓國居食屋 -- 唔錯唔錯~

地址: 尖沙咀金巴利道25號1樓
電話: 2739 6681

今個月既同學聚會去佐南山谷, 食韓國料埋, 我地叫佐香芒蝦沙律, 芝士雞, 豬肉芝士卷, 海鮮煎餅, 雞肉石頭飯, 魚湯, 拉面, 三文魚蝦卷同一個菜.

整體黎講都幾好食呀, 食到好飽. 個芝士雞同豬肉卷都好食, 不過就幾熱氣幾heavy, 我覺得個三文魚蝦卷好好食, 隻蝦仲脆仲熱架喎, 不過我覺得個香芒蝦沙律好似差佐D, 其他都OK.

是次每人消費約$100