麗新美食坊 -- 幾抵架~

地址: 元朗教育路

上星期日去完羅浮宮試衫鬼咁攰, 試完衫就返佐屋企. 夜晚我地去佐教育路算係新開既麗新美食坊食飯. 佢今晚既set dinner唔係魚就係牛, 兩樣野我都唔食, 加上下午飲茶仲飽緊, 我又要節食, 所以我只係叫佐個雞絲湯檬粉, 流沙包就好似叫佐個T骨扒, 佢個set dinner又前菜又甜品, 都係四十蚊左右, 好似幾抵喎.

是次每人消費約$30

八月花 -- 舒服地飲茶

地址: 九龍塘又一城G25店
電話: 2333-0222

星期日去羅浮宮試衫之前去佐八月花飲茶, 我地叫佐個名為心心相印既花茶, 叫佐個雀籠點心, 一個奶黃流沙包, 同一個檸香叉燒酥. 雀龍點心包括水晶鮮蝦餃, 鮑魚滑燒賣, 瑤柱翠苗餃, 黃金蘿蔔酥, 特大鮮蝦露筍春卷和燕窩蛋撻.

但係離晒大譜流沙包食果舊燒賣裏面竟然有大塊骨係度, 好彩無整親啫. 流沙包呢D咁溫文爾雅既人有咩事都唔會追究, 就咁就算. 我就唔係D咁既人, 有問題有不滿我一定會出聲投訴. 於是我叫個經理過黎, 個經理就話free番個點心比我地, 任我地揀咩都得. 但個鮑魚燒賣已經算係最貴果樣點心, 我地求求其其要佐個XO醬炒蘿蔔糕. 呢餐食到好飽~

我投訴完無幾耐, 再有另一個應該係經理既人埋黎再道歉, 同埋解釋番點解會有舊骨係燒賣裏面既可能性. 但講真我做佐廿幾年人飲茶飲過無數次, 從來未試過食燒賣會有舊咁大既骨係裏面囉, 你話係屋村酒樓都算啦, 話晒呢度都算係sell高格調喎...

是次每人消費約$115

去羅浮宮揀衫, 途中見到房祖明~?

星期日先出佐金都睇鞋, 最後流沙包都訂造埋鞋啦~ 之後落又一城既八月花飲茶, 然後三點半去羅浮宮試衫, 途中經過成蟲間屋, 竟然見到房祖明剛剛返到黎落車開閘門, 感覺上真人比上鏡靚仔喎.

我地準時去到羅浮宮, 個staff先比佐四本晚裝相簿, 五本婚紗相簿我揀(雖然話有五本婚紗相簿, 但最後果本得幾張係度, 而且D相仲係同之前本相簿重覆既添, 所以嚴格黎講都係得四本婚紗相簿), 可以各揀五件黎試. 我用佐四十分鐘先揀到total十件出黎. 但係試上身發覺好多都唔啱自己, 後尾個staff再拎佐D佢認為適合我既衫比我再試, 大約試佐廿件左右, 到最後揀既果件婚紗同晚裝, 都唔係我當初睇相簿所揀既, 係個staff自己拎比我試既, 早知就唔嘥咁耐時間睇相簿啦, 哈哈~~ 因為個staff對慣咁多人, 佢一眼就會知道邊D款襯你多D, 邊D款唔啱你著, 所以有時佢地幫你揀好過你自己睇相簿揀. 因為一來睇相簿唔夠真實, 二來影出黎靚唔代表你著上身都一樣咁靚.

另外有樣野一定要講, 話說上星期日上Global Wedding試帶去關島既婚紗, 我咪好猶豫究竟揀第一件好定第二件好既, 點知去到羅浮宮睇相簿, 竟然比我發現羅浮宮有條一模一樣既第一件蝴蝶款. 羅浮宮既衫款果然成日比人抄襲. 於是我就好振奮咁睇下會唔會有埋第二件成熟款, 但係就搵唔到...

新寶粥麵茶餐廳 -- 貨真對版喎~

地址: 元朗教育路50號兆明樓地下
電話: 2475-2566

星期六流沙包要朝十晚十工作, 一朝早出去(義務)教波, 之後去浸大吹大專盃, 夜晚返朗屏又(義務)教波. 之前講好等埋流沙包教完波返黎先一齊食飯, 等到十一點都未收到電話, 好肚餓呀, 谷鬼氣!! 十一點幾先一齊出去食飯, 我地去佐新寶茶餐廳, 叫佐個揚州窩伊面, 估唔到佢實際同影出黎張相幾對版喎, 算幾大碗同幾多料, 可能因為肚餓啦, 所以覺得好食.

買佐絲花球, 拎佐婚紗鞋~~

星期五去元綠食完飯落佐金都, 因為要買絲花球for12月1號影相用, 同埋順便去拎婚紗鞋, 流沙包亦要去造鞋. 行均成個金都, 都唔係好多間賣絲花球, 有D閒閒地嗱起手都話要$350個, 好似貴佐D喎. 最後去佐一樓既藝苑花店買, 圓形絲花球連新郎襟花共$238(拖尾款就$268). 果度擺出黎既款唔算太多, 不過本相簿就有好多款式. 最後我係太陽花與香檳色玫瑰襯紫色花花下作出決擇. 其實想揀太陽花, 因為幾sharp, 但係我唔知影婚紗相究竟揀個咩花球先適當, 同埋又驚唔襯件婚紗, 所以最後都係大路咁揀番玫塊.

然後再落地庫甜蜜蜜拎我早前訂造好既婚紗鞋, 價值$338. 本來流沙包打算訂造埋鞋, 但老闆話有款好正既boot款聽日會返, 極力推介, 所以我地決定星期日再黎睇過.

之後再去朗豪坊食Pappagallo, 因為之前買雪糕月餅送佐張買一送一雪糕coupon, 要今個月內用佐佢. 之後就行去搭車勒.

元綠壽司 -- 久唔久去試新野

地址: 旺角西洋菜南街138號
電話: 23967288

星期五落佐旺角食飯, 因為又要去金都, 唔想食得太濟, 所以去佐元綠食. 我地主要係試新野, 好似豚肉芝士卷, 軟殼蟹pizza, 燒凡立貝串, 鮮芒三文魚壽司等等, 樣樣野都好好食.

其實我以前鍾意去元氣多過去元綠, 但而家就鍾意去元綠多D. 因為元綠既食物種類多D, 唔似元氣咁主要都係食壽司, 同埋元綠時不時會有新野出, 可以吸引到我久唔久就去幫襯. 但元氣就要隔好耐先有興致再去.

銀行服務

某日下午趁有空檔, 鼠佐落去HSBC同恒生拎信用卡, HSBC就係自己張信用卡到期去拎張新卡(我想轉做金卡呀, 但銀行話無得咁樣轉, 一係就再申請多張卡). 恒生就係拎流沙包申請比我既中大platinum附屬卡. 先去到HSBC, 我記得以前係按button攞飛等叫籌, 唔同既戶口按唔同既button, 當然如果係普通紅簿仔戶口既籌應該就要等耐D. 自從海港城間HSBC裝修完之後我都無去過用teller服務, 裝修完細佐, 無佐按button攞籌, 要自己排隊. 我記得以前好似有一個counter係專for拎卡唔駛排人龍架麻...?? 而家無佐都唔知排邊, 好彩我係運籌理財, 唔駛排主人龍, 長到死...

拎完再去恒生銀行, 今次無辦法要排果條長人龍, 鬼死咁耐先輪到我. 講真我去拎張卡都要排餐矇真係嘥時間, 既然銀行都減少緊呢類non-value added既服務, 點解唔好似AE咁直頭寄張卡去你屋企啫??  搞佐大半個鐘先返到公司.

La Brasserie -- 好味好味, 但冷氣勁凍

地址: Gateway, Marco Polo Hotel
電話: 2113-7925

星期日試完衫去佐SOGO行街買野, 買佐好多Keroppi呀, 多謝老公~~ 跟住去佐尖沙咀Marco Polo Hotel既La Brasserie食法國菜, 我地叫佐個Oyster plate, 頭盤要佐鴨肝, 主菜要白鴿, 甜品要佐個chocolate pudding with ice-cream. 樣樣都好味呀, 睇相啦, 正~~

是次每人消費約$624 (流沙包join佐Marco Polo Club所以半價, 埋單total $624即每人約$315)

南京小廚 -- 下次去番北京水餃店好過

地址: 元朗擊壤路金寶大廈地下7號舖
電話: 2478-3813

星期日約佐兩點鐘上Global Wedding試衫, 出去前去佐南京小廚食lunch, 我叫佐個排骨雞絲担担面, 流沙包叫佐個燻魚雲吞担担面. 比起隔離間北京水餃店, 呢間南京小廚真係差幾皮. 首先D排骨似豬扒多D, 又靱; D所謂既担担面得D湯底有D花生醬味, 但你搵唔到一粒肉碎, 咁都算担担面??? 流沙包碗面D雲吞... 唔, 下次去番北京水餃店好過.

是次每人消費約$26

2006年11月11日(六) -- 德國啤酒節

星期六晚同流沙包屋企人一齊去佐德國啤酒節, 裏面既食物種類唔多, 都係牛扒, 排骨, 豬手, 春雞, 腸之類... 但價錢唔平囉, $98份, 豬手要$108一份. 甜品就有黑森林蛋糕, 士多啤梨撻, cheese cake, 蘋果卷之類, $38份. 飲品當然有啤酒, 仲有橙汁, 汽水. 橙汁比啤酒貴, 啤酒好似三十零蚊杯, 橙汁要$55杯.

因為帳幕裏面無晒位, 所以我地係用餐區度食野, 但食完野我地都無乜入去裏面睇表演, D表演主要都係有隊鬼佬band係度唱歌跳舞咁. 不過裏面好焗, 我又唔鍾意D人多又嘈既地方, 所以食完飯都只係喺用餐區度繼續呆坐, 我未來姨仔帶佐佢意大利個老細黎, 食完飯大家呆坐既時候係度吹下水, 跟住入一入去帳幕裏面睇下show, 講真我唔係果D會好投入去玩好投入去睇表演既人, 見人地睇show睇得好開心, 手舞足蹈, 打晒拍子, un身un勢. 我就係果D碌木企係度齋睇表演既人囉.

到佐十點幾左右我地就走勒, 拎住兩個水杯番去, 我同流沙包又無帶大袋, 好論盡.