cushion 1

年份: 2002
產地: Ellon
價錢: -
購買地點: Tommy送
新舊程度: 全新
呎吋(高X濶): 13.5x15"

2006年9月3日(日)

星期日一個人自己係屋企, 朝早先出佐去還書, 然後係大快活買佐個外賣返屋企食. 我今日想落去游水, 點知雷暴警告去到兩點半, 諗住等一陣. 但兩點半過後又延長到三點半, 等到三點半終於見到佢無佐雷暴警告, 即刻換衫落去游水, 大約游佐一個鐘, 跟住上水沖涼, 抖一陣就搭車出佐敦食buffet.

樂怡閣(大華酒店) -- 咁既貨色收咁既價錢?!!!

地址: 油麻地彌敦道348號大華酒店一樓
電話: 2781-1333 Ext2388

星期日晚同屋企人去佐大華酒店樂怡閣食buffet, 完全唔得, 食物種類少, 佢今期話係東南亞美食, 但就無咩款式囉. 生蠔就無擺出黎, 佢話係為佐食物新鮮喎, 只要叫waiter order就得, 咁都唔緊要. 但問題係, 乜D生蠔咁細隻既? 我真係未見過去食自助餐D生蠔係咁細隻, 係平時食開既一半, 甚至只係三分之一.

佢每人送一個所謂煲仔翅, 不知所謂, 水就好多囉, 仲好稀添, 翅就真係要尋寶先發現得到.

飲品就淨係得橙汁同酸梅湯任飲, 你估而家打邊爐咩, 少唔少D呀? 雪糕竟然係牛奶公司家庭裝雪糕, 噢~?! 有無搞錯呀? 我平時去食buffet通常都會食雪糕, 但今次係例外囉~  

仲有D甜品, 不知所謂, 款式都唔係多架啦, 仲要樣樣都咁難食, 芒果布甸硬到呀, 勁多魚膠粉. 黑森林蛋糕仲難食過美心, 無cherry既都夠膽死叫做黑森林蛋糕? 係個燕窩燉蛋同個豆腐花叫做合格.

仲有呀, D枱鬼死咁密, 坐到鬼咁迫, 要出去攞野食既話要附近D人坐入D先有位行出去.

結論係完全唔掂呀, 仲要收$228一位, 雖然四位送一位, 但咁既價錢, 我駛鬼黎呢度食咩...

是次每人消費約$200元

金泰釧 -- 硬係覺得D蔬菜類唔好食

地址: 元朗西菁街好順泰大廈28-29號舖
電話: 2478-9808

星期六晚同流沙包屋企人黎佐呢度食飯, 我地都叫佐唔少野, 有蝦刺身(必叫食物), 豬頸肉蝦片, 咖喱蟹, 魚, 生菜包, 馬拉盞通菜, 薄餅, 蝦醬炒飯. 整體黎講都好好食, 只係個馬拉盞通菜淡佐D, 總之就覺得呢度既蔬菜類唔好食, 上次食果個炒什菜又係唔好食.

是次每人消費約$110元

珊瑚堡 -- 總之以後就避之則吉啦!

地址: 屯門屯順街1號屯門市廣場1期高層地下UG18-23及25號舖
電話: 2430-0663

星期六落佐屯門同中學同學食tea, 因為我遲到既關係, 所以佢地決定佐去珊瑚堡. 如果我唔係遲黎, 我一定會反對黎珊瑚堡, 因為我知道係維苑餐廳集團, 同椰林閣集團一樣, 我要逃出佢地既魔掌呀~~

我叫佐個雞翼+叉燒拉面, D雞翼OK既, 但D叉燒就太靭啦~ 不過十八蚊算係咁啦. 但係呢度既侍應就完全唔掂, 可能太新啦, 有個女仔執執下野, 個男侍應又戇居居咁企正係佢後面唔識讓開少少, 於是兩個人撞佐一下, 個女仔盤上面既杯就跌佐落地, D水差D濺到人. 個男既睇見咁情況竟然唔幫手執番D野, 有得個女仔去擺低個盤轉個頭先黎執番個杯抹返D水.

又有個女侍應埋黎幫我地放刀叉擺位, 擺完無啦啦私私縮縮咁問我地有無擺錯, 喂我點知有無擺錯啫, 求其都係有筷子刀叉架啦, 傻下傻下咁.

總之維苑集團又好, 椰林閣集團又好, 以後就避之則吉啦~~

是次每人消費約$20元

台灣太陽與海珍珠紅茶坊 -- OK既~

地址: 元朗炮仗坊14-D號
電話: 2478-4579

其實好幾年前黎過一兩次, 之後都無再去過, 知道佢咁多年都未執,  於是星期五晚同流沙包黎呢度食飯, 我叫佐個魯肉飯, 流沙包叫佐個蚵仔泡飯, 另外我地仲叫佐個鹽酥小食拼盤.

食物都OK啦, 不過我覺得D鹽酥小食好似無以前咁好食. 價錢唔算貴, 不過距離屋企就遠佐D囉.

是次每人消費約$50元

買佐結婚戒指啦~~

我地十二月尾就過關島行禮, 我知道係時候要買戒指, 因為戒指好多時都要預訂(就算佢有現貨我都希望要全新啦, 我點知佢D現貨比人戴過幾多次), 安全起見, 我覺得三, 四個月前去買定就差唔多.

其實我一直以黎都搵緊買咩牌子好, 我覺得Cartier實在貴佐D, 好似為佐買佢個牌子而買咁, 我覺得唔值囉. 去 Tiffany睇過, D款又少又唔得, sales服務又差. 去過Pink Box同MaBelle睇過, 但都無咩心水, 周生生周大福果D我就更加諗都無諗過.

我為人就比較固執, 買野之前一定要做晒research, 上新婚生活易果度睇人地D評價, 見到Van Cleef & Arpels呢個牌子好似幾好, 未來洪太都話幾好, 於是尋日終於拉佐男友去半島果間度睇.

我地揀佐好耐, 最後我自己揀佐Infini既signature果款$9000, 流沙包揀佐plain果款$6500. 我地兩隻都預訂, 所以只係比佐一半訂金, 可望十二月頭可以拎貨.

好開心, 又了佐件心事~~

滾滾紅茶 -- 難食, 唔會再黎第二次!!

地址: 青衣青衣城166 號鋪
電話: 2434-1519

星期二男友係青衣教波, 我放佐工就落青衣等佢然後去食飯. 都唔知食咩好, 求其黎佐呢度, 我叫佐個雪菜鴨胸面+紅油抄手; 男友叫佐個海鮮大碗面. 個紅油抄手好鬼辣, 痴痴地, 我都未食過D咁辣既紅油抄手. 個鴨胸面好一般, 唔覺得好食, 湯底麻麻. 男友個海鮮大碗面有青口, 蝦, 魷魚, 我試過D蝦, 一食就知佢唔知擺佐幾多日, 唔新鮮仲有陣怪味.

唔會再幫襯第二次.  

是次每人消費約$50元

點解我用唔到MSN?

我想問下點解我係公司開唔到MSN web messenger既?? 我知公司block佐係開唔到ICQ同MSN, 所以我有時會開ICQ2GO黎用, 我係公司開ICQ2GO係開到用到架喎. 但office hour都唔會有人上ICQ, 通常D人只會上MSN, 所以我想開到MSN黎用, 我試過開MSN web messenger, 但係無辦法開到, 只係出到以下咁既畫面, 每當我click「開始使用MSN web messenger」, 網頁底部就會出現「網頁出現錯誤」呢行字. 究竟點解呢??

我有無辦法可以用到MSN呢? 我見公司有D人都開到MSN架喎, 點解我開唔到呢? 連MSN web messenger都開唔到??

求求有無人教下我可以點做呀??

糖朝 -- 一加加三蚊, 以後都唔幫襯呀~!!

地址: 尖沙咀廣東道88號G-F
電話: 2199-7799

話說糖朝就係我公司附近, 佢lunch有D外賣飯, 要你自己落去拎, $23送甜品, 我有時無帶飯都會叫糖朝外賣食. 有一排好耐都無叫過, 上星期有日無飯帶打算又叫糖朝外賣飯, 點知阿姐話個外賣menu已經改佐, 佢fax佐張新既比我, 款式少佐, 由以前有24款揀cut到而家得番18款, 都算. 最最重要既係, 佢加佐價呀!! 仲要一加加3蚊咁多, 由$23加到去$26, 有無搞錯呀?!! 加成10%有多, 離晒譜架, 唔買啦~ 我食杯面好過. $26我駛鬼食你呀?!!